މި ސަރުކާރުން ރައްޔިތުންނަށް ވެފައިވާ ވައުދުތައް ހުރީ ފުނިޖެހިފައި ކަމަށާއި، ކޯލިޝަންގެ ލީޑަރުން ތިއްބެވީ ފިލާކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ބުރާސްފަތި ދުވަހުގެރޭ ޕްރޮގްރެސިވް ކޮންގްރެސްއިން ކާނިވާ ސަރަހައްދުގައި ބޭއްވި ''ދަވާލައިފި'' ޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވީ، މި ސަރުކާރުން ކޮންމެ މަޝްރޫއޫ ނުހިންގުނީމަ ބަހަނާ އަކަށް ދައްކަނީ ކުރީގެ ސަރުކާރު ކަމަށެވެ. އެމަނިކުފާނުގެ ސަރުކާރުން ފާސްކުރި 30 މިލިއަން ރުފިޔާގެ ބަޖެޓް މި ސަރުކާރުން ''ދިރުވާލި'' ކަމަށް ވިދާޅުވެ ފާޑުވިދާޅުވަމުން ރައީސް ޔާމީން ވިދާޅުވީ، ރައްޔިތުން ގުރުބާނީތަކެއް ވެގެން ގެނައި ކޯލިޝަން ސަރުކާރުން ވެފައިވާ ވައުދުތައް ނުފުއްދި އެ ވައުދުތައް ފުނިޖެހެމުންދާ ކަމަށެވެ.
މާލޭގެ އިތުރުން ރާއްޖޭގެ އެކި ސަރަހައްދުތަކުގައި މަޝްރޫއުތަށް އަދިވެސް ނުފެށޭ ކަމަށް އެމަނިކުފާނު ވިދާޅުވި އެވެ.
ދެން ނުފެށި ހުރި މަޝްރޫއުތަކަށް ވަނީ ކިހިނެއްތޯ؟ އެންމެ ހިތްގައިމު ތިއޭޓަރަކަށް ގޮސް އަޅުގަނޑުމެން ސްކީރިން ބަލަހައްޓައިގެން ތިއްބާ އެންމެ ގަބޫލްކުރާ ފިލްމު މިއޮތް އަންނަނީ އަންނަނީ. އަންނަނީ. ދެން ރައްޔިތުންނަށް ވަނީ ކިހިނެއް؟ ހިނި އަންނަނީ.އަބްދުﷲ ޔާމީން ~ ކުރީގެ ރައީސް
ޖަލްސާގައި އިތުރަށް ވާހަކަފުޅުދައްކަވަމުން ރައީސް ޔާމީން ވިދާޅުވީ، ތަރައްގީގެ އެތައް މަރުހާލަތަކެއް ފަހަތައް ރާއްޖެ ޖެހިގެންދާނެ ކަމަށާއި، ކޮންމެ ބަޔަކު ވެރިކަމަށް އަޔަސް އާބަތުުރަ ފިލުވަން ދުވަސް ނަގާނެ ކަމަށެވެ. އެ ހުރިހާ ކަމެއްގެ ޒިންމާ ނަންގަވަން ޖެހޭ ލީޑަރު މިއަދު ފެންނާކަށް ނެތް ކަމަށާއި، އެ ލީޑަރުންގެވެސް އެ ގާބިލްކަން ނެތި މިހާރު ތިބީ ފިލާފައި ކަމަށެވެ. އެހެން ކަމުން އެކަމުގައި ހުރިހާ ރައްޔިތުން ނިކުންނަން ޖެހޭ ކަމަށް ސަޕޯޓަރުންނާ މުހާތަބު ކޮށް ރައީސް ޔާމީން ވިދާޅުވިއެވެ.
އެމަނިކުފާނު އެގޮތަށް ވިދާޅުވިނަމަވެސް ޕްލޭނިން މިނިސްޓްރީގެ ތަފާސް ހިސާބުތައް ދައްކާގޮތުން އަހަރުގެ މިހާތަނަށް ކުރިއަށްގެންދާ ޕްރޮޖެކްޓްތަކުގެ ޖުމްލަ އަދަދު 2.5 ބިލިއަން ރުފިޔާއަށް އަރަ އެވެ. އޭގެއިތުރުން އިންސާނީ ވަސީލަތް ތަރައްޤީކުރުމަށް މިހާތަނަށް ސަރުކާރަކުން ކުރާ އެންމެ ބޮޑެތި ހަރަދުތައް ކުރަނީ މި ސަރުކާރުންނެވެ.
އޭގެއިތުރުން ސަރުކާރުގެ ފުރަތަމަ 9 މަސް ދުވަހުގެ ތެރޭގައި 9200 ހައުސިން ޔުނިޓްގެ އެއްބަސްވުމުގައި ސޮއިކޮށް، މަސައްކަތް ފެށުމަށް ތައްޔާރުވެފައިވާއިރު، ޔާމީންގެ ސަރުކާރުގެ 5 އަހަރުގައި ފަށެިފައިވަނީ ކުދި ހޮހޮޅަތކެއް ފަދަ އެންމެ 7000 ހައުސިން ޔުނިޓްގެ މަސައްކަތެވެ. ޔާމީންގެ ސަރުކާރުގެ 5 އަހަރު ދުވަހުގެ ތެރޭގައި އެންމެ ބްރީޖެއް އިމާރަތްކުރެވުނުއިރު، މި ސަރުކާރުން އަންނަނީ މާލެ އާއި ގުޅީ ފަޅު ގުޅާލުމުގެ ބޮޑު މަޝްރޫއާއި، ވިޔަފާރިވެރިންގެ ބަނދަރު ތިލަފުއްޓަށް ބަދަލުކުރުމުގެ ބޮޑު މަޝްރޫއުވެސް ފެށުމަށް ތައްޔާރުވަމުންނެވެ. އޭގެއިތުރުން ރާއްޖޭގެ އެކި ސަރަހައްދުތަކުގައި ހޮސްޕިޓަލްތައް ތަރައްްީކޮށް، ސިއްހީ މަރުކަޖުތަކުގެ އައު އިމާރަތްތަކުގެ މަސައްކަތްތައް ކުރިއަށްދާއިރު، މުޅި ސިއްހީ ނިޒާމަށް އިންގިލާބީ ބަދަލުތަކެއް ގެނައުމަށް ސަރުކާރުން އަންނަނީ ތައްޔާރުވަމުންނެވެ.
