7 ގަޑިއިރަށް އައްޑޫސިޓީން ކަރަންޓް ކަނޑާލާނެ: ފެނަކަ
13 ސެޕްޓެމްބަރު 2019 | ހުކުރު 10:37ކަރަންޓް ކެނޑާލަނީ މާދަމާ ހެނދުނު 9 އިން ހަވީރު 4 އަކަށް
އައްޑޫސިޓީ
އައްޑޫ ސިޓީއަށް ދިމާވެފައިވާ ކަރަންޓު މައްސަލަ ހައްލުކުރުމަށް ހޮނިހިރު ދުވަހު 7 ގަޑިއިރަށް އައްޑޫސިޓީން ކަރަންޓް ކަނޑާލާނެ ކަމަށް ފެނަކަ ކޯޕަރޭޝަނުން ބުނެފިއެވެ.
ހުކުރު ދުވަހު ފެނަކަ ކޯޕަރޭޝަނުން ކޮށްފައިވާ އިއުލާނެއްގައި ބުނެފައިވަނީ އައްޑޫސިޓީގެ ގުޅިފައިވާ ރަށްރަށަށް ކަރަންޓް ދިނުމަށް ބޭނުންކުރަމުން އަންނަ ކޭބަލް ނެޓްވޯރކަށް ދިމާވި މައްސަލަ ހައްލުކުރުމަށް 14 ސެޕްޓެމްބަރ 2019 ވާ ހޮނިހިރު ދުވަހުގެ ހެނދުނު 9:00 އިން ހަވީރު 16:00 އަށް ކަނޑާލަން ޖެހޭ ކަމަށާއި ރޭވިފައިވާ ގޮތަށް އިތުރު މައްސަލައެއް ދިމާނުވެ މަސައްކަތް ކުރިޔަށް ގެންދެވިއްޖެނަމަ 7 ގަޑިއިރަށް ވުރެ އަވަހަށް ކަރަންޓް ދެވޭނެ ކަމަށް ލަފާކުރެވޭ ކަމަށެވެ.
8 ސެޕްޓެމްބަރުން ފެށިގެން އައްޑުސިޓީގެ ގުޅިފައިވާ ރަށްތަކަށް ކަރަންޓުގެ މައްސަލަ ދިމާވަމުން ދާއިރު މީގެކުރިން ފެނަކަ ކުންފުނީގެ މެނޭޖިންގް ޑިރެކްޓަރ އަހުމަދު ސައީދު ރާއްޖެ އެމްވީ އަށް މައުލޫމާތު ދެއްވަމުން ވިދާޅުވީ ކަރަންޓް މައްސަލަ ހައްލުކުރުމަށް ކެނޑިނޭޅި މަސައްކަތް ކުރުމުން ދާ ކަމަށާއި މާލެއިން އިތުރު އިންޖީނަރުން ފޮނުވައިގެން ކަރަންޓު ކެނޑެން މެދުވެރިވި ސަބަބު ހޯދަމުންދާ ކަމަށެވެ. އަދި ސައީދު ވަނީ ކަރަންޓު މައްސަލަ އެއްކޮށް ހައްލުކުރެވޭނީ އަންނަ މަހުގެ ތެރޭގައި ކަމަށް ވިދާޅުވެފައެވެ.
ފެނަކައިން ކޮށްފައިވާ އިއުލާނުގައި އިތުރަށް ބުނެފައިވަނީ ވަނީ ހިދުމަތް މެދުކެނޑިފައި އޮންނަ ވަގުތު ރައްޔިތުންނަށް ދިމާވެދާނެ ދަތިތަކަށް އެ ކުންފުނީގެ ފަރާތުން ނިހާޔަތަށް މައާފަށް އެދޭ ކަމަށާއި ރައްޔިތުން ދެއްވާ އެއްބާރުލުމަށް ޝުކުރު އަދާކުރާ ކަމަށެވެ.
