ސަރުކާރުގެ މުޅި މިސްރާބު އަމާޒު ކޮށްފައިހުރީ، ރާއްޖެއަށް ބޭނުންވާ މަތީ ފެންވަރުގެ އިންސާނީ ވަސީލަތްތައް ގާއިމްކުރުމަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

2018 ވަނަ އަހަރުގެ ޘާނަވީ ތައުލީމު ނިންމާ އިމްތިޙާނުތަކުން އެންމެ ރަނގަޅު ނަތީޖާ ހޯދި ދަރިވަރުންނަށް އިނާމާއި، ހަނދާނީ ލިޔުން ދިނުމަށް ބޭއްވި ރަސްމިއްޔާތުގައި ރައީސް ސޯލިހު ވިދާޅުވީ ވަކި މަރުހަލާއެއް ތަފާތުނުކޮށް، ތައުލީމުގެ ހުރިހާ ފުރުސަތުތަކެއް ފަހިކޮށްދެނީ އުފެއްދުންތެރި ފަރުދުންތަކެއްގެ މުހިންމުކަން ބޮޑުކަމުން ކަމަށެވެ. އަދި ވިދާޅުވީ ތައުލީމީ ދާއިރާ ހަރުދަނާ ކުރުމަށް، ކުރަންޖެހޭ ކިތަންމެ ކަމެއް އެބަހުރިކަން ކަމަށެވެ.

ވަކިން ޚާއްސަކޮށް މި ދާއިރާއިން މީހުން ބިނާކުރުމަށް، ވަރަށް ގިނަ މަސައްކަތްތަކެއް މިހާރު ކުރަންޖެހޭ ކަމަށް ރައީސް ވިދާޅުވި އެވެ. އަދި އުމްރާނީ ގޮތުންނާއި ވަސީލަތްތަކުގެ ގޮތުންވެސް ސްކޫލްތަކަށް ބޮޑެތި ބަދަލުތަކެއް ގެންނަންޖެހޭ ކަމަށް ރައީސް ވިދާޅުވިއެވެ.

އިމްތިހާނުތަކުގައި ދަރިވަރުން ހޯދާ މަތީ ވަނަތަކުން ރަމްޒުކޮށްދޭ އެއް ކަމަކީ، އެކުދިންނަށް ކިޔަވައިދޭ އެދުރުންގެ އިލްމީ ފެންވަރާއި ބުރަ މަސައްކަތްކަން ފާހަގަކުރައްވައި ރައީސް ސޯލިހު ވިދާޅުވީ ފެންވަރު ރަނގަޅު ތައުލީމެއްގެ ބިންގަލަކީ ފެންވަރު ރަނގަޅު ޓީޗަރުން ކަމަށާއި، މިއީވެސް ޚާއްސަ ސަމާލުކަމެއް ދޭންޖެހިފައި އޮތް ކަމެއް ކަމަށެވެ. ވަކިން ޚާއްސަކޮށް، ރާއްޖޭން ޕްރައިމަރީ ޓީޗަރުން ނުލިބޭ މައްސަލައަށް، އަވަސް ހައްލެއް ބޭނުންވާ ކަމަށް ރައީސް ވިދާޅުވިއެވެ.

ރައީސް ސޯލިހު ވިދާޅުވީ ރާއްޖޭގައި ތިބެގެން، ނުހޯދޭ ކިތަންމެ އިލްމެއް، ރާއްޖޭގައި ތިބެގެން ހޯދުމުގެ ފުރުސަތު މިހާރު އެބައޮތް ކަމަށާއި، މިއީ ދަރިވަރުންނެކޭ އެއްފަދައިން ބެލެނިވެރިންނާއި މުދައްރިސުންވެސް ޚާއްސަ ސަމާލު ކަމެއް ދެއްވަންޖެހޭ ކަމަށެވެ.

ދަރިވަރުން ކުރިއަށް ދާން ބޭނުންވާ ދާއިރާއެއް ނުވަތަ ރޮނގެއް އިޚްތިޔާރު ކުރުމުގެ މުހިންމު ކަމުގެ ވާހަކައަށް އަލިއަޅުއްވާލައްވާ ރައީސް ސޯލިހު ވިދާޅުވީ ހަމައެކަނި ބަލަންވީ މަންމަ ނުވަތަ ބައްޕަގެ ހުވަފެން ހަގީގަތަކަށް ހެދޭތޯއެއް ނޫން ކަމަށާއި، ބަލަންވީ، ތިމާގެ ދަރިފުޅު ކުރާ އުންމީދުތަކަކީ ކޮބައިތޯ ކަމަށެވެ. އަދި އެދަރިފުޅުގެ ގާބިލުކަން ކުރީ ކޮން ދާއިރާއަކުން ކޮން ކަމަކަށްތޯ ކަމަށް ރައީސް ވިދާޅުވިއެވެ.

ރައީސް ސޯލިހު ވިދާޅުވީ ބެލެނިވެރިންގެ ދައުރަކަށް ވާންވީ، ވަކި ރޮނގަކުން ކުރިއަށް ދާން ދަރިވަރުންނަށް މަޖުބޫރު ނުކޮށް މަގުދައްކައިދިނުން ކަމަށާއި، ދަރިވަރުންނަށް ހިތްވަރުދީ، މަގުފަހިކޮށްދިނުން ކަމަށެވެ. އަދި އޭރުން އެ ކުދިންގެ ފަރާތުން އާއިލާއަށާއި ގައުމަށް ލިބޭ ފައިދާ މާ ބޮޑުވާނެ ކަމަށާއި، އެ ކުދިންގެ ކުރިމަގުވެސް މާ އުޖާލާވާނެ ކަމަށް އެމަނިކުފާނު ވިދާޅުވިއެވެ.

ރައީސް ސޯލިހު ވިދާޅުވީ އަބަދުވެސް އަޒުމަކަށް ވާންވާނީ، އިސްލާމްދީނުގެ ސައްހަ އަގީދާ މަތީގައި ސާބިތުވެ ތިބުން ކަމަށާއި، އިލްމު ހޯދުމަށް ނުވަތަ ދިރިއުޅުމެއް ފެށްޓުމަށްޓަކައި ދުނިޔޭގެ ހަތަރު ބިތަށް ދަތުރުކުރިޔަސް، ދިވެހި ފަސްގަނޑުގެ އުފަން ދިވެހި ދަރިންކަން، ހިނދުކޮޅަކަށްވެސް ހަނދާނުން ކައްސާލިޔަދީގެން ނުވާނެ ކަމަށެވެ.

މީގެ އިތުރުން ރައީސް ސޯލިހު ވިދާޅުވީ މިއީ އެންމެން އަބަދުވެސް ހައްގުތަކުގެ ވާހަކަ ދައްކާ ޒަމާން ކަމަށާއި، ހައްގުތައް ނުލިބިގެން ނުވަތަ ހައްގެއް ގެއްލިގެން އަޑު އުފުލާ ޒަމާން ކަމަށެވެ. އަދި ތިމާއަށް ލިބެންޖެހޭ ކޮންމެ ހައްގަކާއެކު ތިމާ އަދާކުރަންޖެހޭ ޒިންމާތަކެއްވެސް ހުންނާނެ ކަމަށާއި، މުޖްތަމައުގައި އަދުލުވެރިކަމާއި އުފާވެރިކަން ދެމިއޮންނާނީ، އެ ޒިންމާތައް އަދާކޮށްގެން ކަމަށް ރައީސް ވިދާޅުވިއެވެ.