ވީޑިއޯ ކޮންފަރެންސް މެދުވެރިކޮށް ހެކިބަސް ނެގޭނެ އިންތިޒާމް ހަމަޖައްސަނީ
9 ސެޕްޓެމްބަރު 2019 | ހޯމަ 13:42އަދުލު އިންސާފު ހަރުދަނާ ކުރުމުގެ މަސައްކަތް ކުރިޔަށްދާކަން ފާހަގަކުރެއްވި
ޝަރިޔަތުގެ މާލާން
ރާއްޖޭގެ ހުރިހާ ކޯޓެއްގައި ވީޑިއޯ ކޮންފަރެންސް މެދުވެރިކޮށް ހެކިބަސް ނެގުމުގެ އިންތިޒާމު ހަމަޖެއްސުމުގެ މަސައްކަތް ކުރަމުންދާ ކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.
ހޯމަ ދުވަހު ޑީޖޭއޭ ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑީޖޭއޭގެ ހެޑް އޮފް ފައިނޭންސް މުހައްމަދު އަލީ ވިދާޅުވީ، ޖުޑީޝަލް ސަރވިސް ކޮމިޝަން (ޖޭއެސްސީ) ގެ ދަށަށް ޑީޖޭއޭ ގެނައުމާއި އެކީ އެ ޑިޕާޓްމެންޓުން ގިނަ ބަދަލުތަކެއް ތަންފީޒު ކުރަން ޖެހޭ ކަމަށެވެ.
ކުރިން ފަނޑިޔާރުން ކުރަމުން އައި ކަންތައްތައް ޑީޖޭއޭ އިން މިހާރު ކުރަން ޖެހޭކަން ފާހަގަކުރައްވަމުން މުހައްމަދު ވިދާޅުވީ، އަދުލު އިންސާފު ފޯރުކޮށްދިނުމުގައި އޭގެ އެންމެ ފަސޭހާ ގޮތްތައް ހޯދުމުގެ މަސައްކަތް ކުރަމުންދާ ކަމަށެވެ. ޖިނާއި އަދުލުގެ ނިޒާމު ތަރައްގީ ކުރުމަށްޓަކައި ޖިނާއި އިޖުރާތުގެ ގާނޫނު ގައި ބުނާ ވަސީލަތްތައް ގާއިމްކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
ރާއްޖޭގެ ހުރިހާ ކޯޓުތައް އެއް ވިއުގައަކުން މި އަހަރުގެ ކުރީކޮޅު ގުޅާލާފައިވާއިރު، އިދާރީ ދާއިރާތަކަށް ބޭނުންކުރާ ސޮފްޓްވެއާ ތަކަކީ ރައްކާތެރި ހަލުވި އަދި އިތުބާރު ހިފޭ ނިޒާމެއްގެ ގޮތުގައި ހެދުމުގެ ގޮތުން ޑޭޓާސެންޓަރެއް ވަނީ ގާއިމްކޮށްފައެވެ.
ޑީޖޭއޭ އަމާޒަކީ އަދުލު އިންސާފު ފޯރުކޮށްދިނުމުގެ ހިދުމަތް ތަރައްގީވެގެން ރައްޔިތުންނަށް ފަސޭހަ އަދި އަވަސް ކަމާއިއެކު ލިބޭ ހިދުމަތަކަށް ހެދުމެވެ. އެ ޑިޕާޓްމެންޓުން ދެމުން އައި ހިދުމަތްތައް ކުރިއެކޭ އެއްގޮތަށް ހަލުވިކަމާއި އެކު ކުރިޔަށްދާނެ ކަމަށް އެ ޑިޕާޓްމެންޓުން ބުންޏެވެ.
