މިނިސްޓަރ ނަހުލާ ލަންކާގެ ކުރީގެ ރައީސާއި ބައްދަލުކުރައްވައިފި
8 ސެޕްޓެމްބަރު 2019 | އާދީއްތަ 08:01ދެގައުމުގެ ގުޅުން އިތުރަށް ބަދަހި ކުރުމަށް މަޝްވަރާކުރެއްވި
ސްރީލަންކާގައި ބޭއްވުނު ބައްދަލުވުމުގެ ތެރެއިން
މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ސްރީލަންކާއަށް ކުރެއްވި ދަތުރުފުޅުގައި އެގައުމުގެ ކުރީގެ ރައީސް މަހިންދާ ރާޖަޕަކްސް އާއި ބައްދަލުކުރައްވައިފިއެވެ.
2018 ވަނަ އަހަރުން ފެށިގެން ސްރީލަންކާ ސަރުކާރުގެ އިދިކޮޅު ޕާޓީގެ ލީޑަރަކަށް ހުންނަވާ ރާޖަޕަކްސަގެ ރަސްމީ ޓްވިޓްރ އެކައުންޓުން ކޮށްފައިވާ ޓްވީޓެއްގައި ބުނެފައިވަނީ މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ އާއި ޑެޕިއުޓީ މިނިސްޓަރ ހަމަދް އަބްދުލް ޢަނީ އިހްތިރާމްގެ ޒިޔާރަތެއް ކޮށްފައިވާކަމަށާއި ދެގައުމުގެ ދެމެދުގައި އިތުރަށް ގުޅުން ބަދަހި ކުރެވޭނެކަންތައްތަކާއި ބެހޭގޮތުން މަޝްވަރާކޮށްފައިވާކަމަށެވެ. ނަމަވެސް ބައްދަލުވުމުގައި ދެކެވުނު ވާހަކަތަކުގެ ތަފްސީލެއް ހާމަކޮށްފައެއް ނުވެ އެވެ.
އޭގެއިތުރުން މިނިސްޓަރގެ މި ދަތުރުފުޅާގުޅޭ މައުލޫމާތު މިނިސްޓްރީންވެސް ހާމަކޮށްފައެއް ނުވެ އެވެ.
ލަންކާއަކީ ސިވިލް އޭވިއޭޝަންގެ ދާއިރާއިން އެތަށް ދިވެހިންނެއް ތަމްރީން ހޯދަމުން އަންނަ ޤައުމެކެވެ.
މިނިސްޓަރ ނަހުލާ ވަނީ ސްރީލަންކާއަށް ކުރެއްވި ދަތުރުފުޅު ނިންމާލެއްވުމަށް ފަހު މާލެ ވަޑައިގެންފައެވެ.
