މިނިމަމް ވޭޖް ކަނޑައެޅުމުގެ މަސައްކަތްތައް އަންނަ އަހަރުގެ ކުރީކޮޅު ނިމޭނެ ކަމަށް އުއްމީދު ކުރަން : މިނިސްޓަރ ފައްޔާޒު
ސަރުކާރުން ބަލަން ބޭނުންވާ، އަދި ދިރާސާ ކުރަން ޖެހޭ ގިނަ ކަންތައްތަކެއް އެބަހުރި ކަމަށް ވިދާޅުވި
އިކޮނޮމިކް މިނިސްޓަރު ފައްޔާޒު އިސްމާއީލް
އެންމެ ކުޑަ އުޖޫރަ ނުވަތަ "މިނިމަމް ވޭޖް" ކަނޑައެޅުމުގެ މަސައްކަތްތައް އަންނަ އަހަރުގެ ކުރީކޮޅު ނިމޭނެ ކަމަށް އުއްމީދު ކުރައްވާ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ހުކުރު ދުވަހުގެ ރޭ އޮތް އެމްޑީޕީގެ ޕްރީ ކޮންގްރެސް ވޯކްޝޮޕްގައި ކުރެވުނު ސުވާލަކަށް ޖަވާބުދެއްވަމުންނެވެ.
ޕްރީ ކޮންގްރެސް ވޯކްޝޮޕްގައި ކުރިއަށް ގެންދިޔަ ޕެނަލް ޑިސްކަޝަންގައި ވާހަކަދައްކަވަމުން މިނިސްޓަރ ފައްޔާޒް ވިދާޅުވީ، ރައްޔިތުންގެ މަޖިލީހުން ބޭނުންވާ ނަމަ މިހާރުވެސް އެންމެ ކުޑަ މުސާރަ ކަނޑައެޅިދާނެ ކަމަށެވެ.
ނަމަވެސް އެންމެ ކުޑަ އުޖޫރަ ކަނޑައެޅުމުގެ ކުރިން، ސަރުކާރުން ބަލަން ބޭނުންވާ، އަދި ދިރާސާ ކުރަން ޖެހޭ ގިނަ ކަންތައްތަކެއް އެބަހުރި ކަމަށްވެސް މިނިސްޓަރ ފާހަގަ ކުރެއްވިއެވެ. އަދި މިކަމާއި ގުޅިގެން ދިރާސާ ކުރުމަށް އިންޓަނޭޝަނަލް ލޭބަރ އޯގަނައިޒޭޝަން (އައިއެލްއޯ) އާއި އެކު މަޝްވަރާ ކުރެވެމުން ދާކަމަށް ވެސް ވިދާޅުވިއެވެ.
އެގޮތުން އެންމެ ކުޑަ އުޖޫރައެއް ކަނޑައަޅަން ރަނގަޅީ މުޅި ރާއްޖެއަށް އެއް "މިނިމަމް ވޭޖްއެއް" ތޯ ނުވަތަ އެކި ދާއިރާތަކަށް ތަފާތު "މިނިމަމް ވޭޖެއް" ތޯ ބަލަމުންދާ ކަމަށް ވެސް މިނިސްޓަރ ވިދާޅުވި އެވެ. މިނިސްޓަރ ވިދާޅުވީ މަޖިލީހުގެ މަޝްވަރާއާއި އެއްކޮށް އެ މަސައްކަތް ނިންމާލެވޭނެ ކަމަށެވެ.
މިނިމަމް ވޭޖް ނުވަތަ އެންމެ ކުޑަ އުޖޫރަ ކަނޑައެޅުމަކީ ރައްޔިތުންގެ މަޖިލީހުގެ އިންތިހާބުގެ ކެމްޕޭނަށް އެމްޑީޕީން ހުށަހެޅި މެނިފެސްޓޯ "އެޖެންޑާ 19" ގައި ހިމެނޭ އެއްވައުދެވެ.
