އާއިލާ މެމްބަރުންގެ ކުއްލި މަރާއެކު، ގައުމީ ޓީމުގެ ކޭމްޕް ދޫކޮށް އިއްބެ ރާއްޖެ އަންނަނީ

އާއިލާ މެމްބަރުންގެ ކުއްލި މަރާއެކު، ގައުމީ ޓީމުގެ ކޭމްޕް ދޫކޮށް މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެމުން އަންނަ ގައުމީ ޓީމުގެ މިޑްފިލްޑަރ އިބްރާހިމް ވަހީދު ހަސަން (އިއްބެ) ރާއްޖެ އަންނަން ދަތުރު ފަށައިފިއެވެ.

ބުރާސްފަތި ދުވަހު ހދ. ނޮޅިވަރަންފަރުން ފުރައިގެން ހދ. ހަނިމަދޫއަށް ދަތުރުކުރަނިކޮށް ޑިންގީއެއް ބަންޑުން ޖަހާލި ހާދިސާގައި މަރުވި ފަސް މީހުންގެ ތެރޭގައި އިއްބެގެ އާއިލާގެ ހަތަރު މީހުން ހިމެނެއެވެ.

ރާއްޖެއެމްވީއަށް މައުލޫމާތު ދެއްވަމުން ގައުމީ ޓީމުގެ މެނޭޖަރ ޔާމީން އިބްރާހިމް ވިދާޅުވީ، އިއްބެ އާއިލާއަށް ކުރިމަތި ހިތާމަވެރި ހާދިސާއާއެކު އޭނާ މިވަގުތު ހުރީ ރާއްޖެ ފުރުމަށް އެއާޕޯޓުގައި ކަމަށެވެ.

އެގޮތުން ޔާމީން ވިދާޅުވީ، މިވަގުތު ކަންކަން ހަމަޔަކަށް އެޅެންދެން އިއްބެ ހުރީ ގައުމީ ޓީމުން ދޫކޮށްދީފައި ކަމަށާއި، އޭނާގެ އާއިލާއަށް ދިމާވި ހިތާމަވެރި ވަގުތުގައި މުޅި ގައުމީ ޓީމު ބައިވެރިވާ ކަމަށެވެ.

މީގެއިތުރުން އިއްބެގެ އާއިލާއަށް ދިމާވި ހިތާމައިގައި ބައިވެރިވެ، ފުޓުބޯޅަ އާއިލާގައި ހިމެނޭ ގިނަ ބަޔަކު އަންނަނީ ތައުޒިޔާ ކިޔަމުންނެވެ.

ވޯލްޑް ކަޕް ކޮލިފިކޭޝަންގައި އަންނަ މަހު ގުއާމް އާއި ޗައިނާއާ ދެކޮޅަށް ރާއްޖެ ކުޅޭ މެޗުގެ ކުރިން ލަންކާގައި ގައުމީ ޓީމު އަންނަނަނީ ފަރިތަކުރަމުންނެވެ. އެ ފަރިތަކުރުމުގައި އިއްބެވެސް އައީ ބައިވެރިވަމުންނެވެ.