ފުރަތަމަ 6 މަސް ދުވަހު ފަތުރުވެރިކަމުގެ އެންމެ ބޮޑު ކުރިއެރުމެއް ފެނުނީ މިއަހަރު : އެމްއެމްޕީއާރްސީ
އަމާޒަކީ ނޮވެމްބަރު 17 ގެ ނިޔަލަށް 1.5 މިލިއަން ފަތުރުވެރިން ރާއްޖެ ގެނައުން
އެމްއެމްޕީއާރްސީގެ މެނޭޖިންގ ޑިރެކްޓަރ ތޮއްޔިބު މުހައްމަދު
ފާއިތުވެ ދިޔަ ފަސް އަހަރާ އަޅާބަލާއިރު އަހަރުގެ ފުރަތަމަ 6 މަސް ދުވަހު ފަތުރުވެރިކަމުގެ ދާއިރާއިން އެންމެ ބޮޑު ކުރިއެރުމެއް ލިބިފައިވަނީ މި އަހަރު ކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ބުނެފިއެވެ.
ބުރާސްފަތި ދުވަހު އޮތް ނޫސްވެރިންގެ ބައްދަލުވުމެއްގައި އެމްއެމްޕީއާރްސީގެ މެނޭޖިންގ ޑިރެކްޓަރ ތޮއްޔިބު މުހައްމަދު ވިދާޅުވީ، 2010 ވަނަ އަހަރުން ފެށިގެން ކޮންމެ އަހަރެއްގެވެސް ފުރަތަމަ ހަ މަސް ދުވަހުގެ ތަފާސްހިސާބުތަކަށް ބަލާއިރު، އެންމެ ބޮޑު ކުރިއެރުމެއް ލިބިފައިވަނީ މި އަހަރު ކަމަށާއި އެއީ 19 އިންސައްތައިގެ ކުރިއެރުމެއް ކަމަށެވެ.
ތޮއްޔިބު އިތުރަށް ވިދާޅުވީ، އެ ނަތީޖާ ހާސިލު ކުރުމަށް އެމްއެމްޕީއާރްސީން ގިނަ މަސައްކަތްތަކެއް ކުރެވިފައިވާ ކަމަށާއި، އެގޮތުން ތަފާތު ގިނަ ފެއަރ ތަކާއި ރޯޑް ޝޯތައް ބާއްވައި، ޖޮއިންޓް ޕްރޮމޯޝަންތަކާއި ލޯކަލް އިވެންޓުތައްވެސް ބޭއްވިފައިވާ ކަމަށެވެ. އެގޮތުން 2019 ވަނަ އަހަރުގެ ޖެނުއަރީ މަހުން ފެށިގެން އޯގަސްޓު މަހުގެ ނިޔަލަށް 12 މާކެޓަށް އަމާޒުކޮށް 15 މާކެޓިންގ ފެއަރއާއި، 13 މާކެޓަކަށް އަމާޒުކޮށް ބޭއްވި 05 ރޯޑް ޝޯ ހިމެނޭ ކަމަށް ތޮއްޔިބު ވިދާޅުވިއެވެ.
އޭގެ އިތުރުން، ކުރިއަށް އޮތް އަހަރުތަކަށްވެސް ގިނަ ކަންތައްތަކެއް ރާވާފައިވާ ކަމަށާއި، ރާއްޖެ އިސްތިހާރުކުރާއިރު ހަމައެކަނި މޫދާއި ކަނޑާއި ދޮންވެލިގަނޑު އިސްތިހާރު ކުރުމުގެ ވިސްނުން ބަދަލުކޮށް، އިތުރު ދާއިރާތަކުން ފަތުރުވެރިކަން ފުޅާކުރުމަށް ވިސްނަވާކަމަށްވެސް ތޮއްޔިބު ވިދާޅުވިއެވެ.
ކުރިއަށްއޮތް އަހަރަށް ރާވާފައިވާ ކަންކަން:
މި ހިނގާ އޯގަސްޓު މަހު ރާއްޖެއަށް 1 މިލިއަން ވަނަ ފަތުރުވެރިޔާ ޒިޔާރަތްކޮށްފައިވާއިރު، ސަރުކާރުގެ އަމާޒަކީ ނޮވެމްބަރު 17 ގެ ނިޔަލަށް 1.5 މިލިއަން ފަތުރުވެރިން ރާއްޖެ ގެނައުމެވެ.
