ޔުނައިޓެޑުން ބޭނުންވާނަމަ ބަދަލުވާން ތައްޔާރު: އިބްރަހިމޮވިޗް

މެންޗެސްޓަރ ޔުނައިޓެޑުން ބޭނުންވާނަމަ، އެ ކްލަބަށް ބަދަލުވާން ތައްޔާރު ކަމަށް އެލްއޭ ގެލެކްސީއަށް ކުޅެމުން އަންނަ ޒަލަޓަން އިބްރަހިމޮވިޗް ބުނެފިއެވެ.

ސްކައި ސްޕޯޓްސްއަށް ދިން އިންޓަވިއުއެއްގައި އިބްރަހިމޮވިޗް ބުނީ، ޕްރިމިއާ ލީގުގައި މިހާރުވެސް ފަސޭހަކަމާއެކު ކުޅެވޭނެ ކަމަށާއި، ޔުނައިޓެޑުން ބޭނުންވާނަމަ ބަދަލުވާން ތައްޔާރަށް ހުރި ކަމަށެވެ.

ނަމަވެސް އިބްރަހިމޮވިޗް ބުނީ، ވަރަށް މައާފަށް އެދޭ ކަމަށާއި، މިވަގުތު އޭނާ ކުޅެމުން އަންނަނީ އެލްއޭ ގެލެކްސީއަށް ކަމަށެވެ.

އެގޮތުން އިބްރަހިމޮވިޗް ބުނީ، ޔޫރަޕްގައި ހާސިލުކުރަން ބޭނުންވި ކަންތައް ހާސިލުކުރެވިފައިވާ ކަމަށެވެ. އަދި 33 ތައްޓާއެކު، އެލްއޭ ގެލެކްސީއަށް ބަދަލުވީ ކާމިޔާބީތަކެއް ހޯދޭނެ ކަމުގެ އުންމީދުގައި ކަމަށެވެ.

ސްވިޑެންގެ މަލްމޯ އިން 1999 ވަނަ އަހަރު ކެރިޔަރު ފެށި އުމުރުން 37 އަހަރު އިބްރަހަމޮވިޗް ކުޅުން ހުއްޓާލާނެ ދުވަހެއް ނޭގޭ އިރު، އޭނާ ހޯދުމަށް ބައެއް ކްލަބްތަކުން އަންނަނީ މަސައްކަތް ކުރަމުން ކަމަށް ރިޕޯޓްތައް ބުނެއެވެ

ޔުވަންޓަސް، އިންޓަ މިލާން، ބާސެލޯނާ، އޭސީ މިލާން، ޕީއެސްޖީ އަދި ޔުނައިޓެޑަށް ވެސް ކުޅެފައިވާ އިބްރަހަމޮވިޗް ވަނީ މިހާރު ކުޅެމުން އަންނަ އެލްއޭ ގެލެކްސީ އަށް މިހާތަނަށް ކުޅުނު 49 މެޗުގައި 44 ލަނޑު ކާމިޔާބުކޮށްފައެވެ.

ސްވިޑެންގެ މޮޅު އެތުލީޓުގެ މަގާމު ހަތަރު ފަހަރު ހޯދާފައިވާ އިބްރަހަމޮވިޗް ވަނީ އޭނާ ކުޅުނު ކްލަބްތަކަށް ގިނަ ކާމިޔާބީތައް ހޯދައިދިނުމުގެ އިތުރުން އަމިއްލަ ގިނަ އެވޯޑުތައްވެސް ހާސިލުކޮށްފައެވެ.