ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޢަބްދުالله ދީދީ ފަނޑިޔާރުކަމުގެ މަޤާމުން ވަކިކުރުމާއި ގުޅޭގޮތުން ޖުޑީޝަލް ސަރވިސް ކޮމިޝަން (ޖޭއެސްސީ) އިން ފޮނުއްވާފައިވާ މައްސަލަ ދިރާސާ ކުރުމަށް މަޖިލީހުގެ ޖުޑިޝަރީ ކޮމެޓީއަށް ފޮނުވައިފިއެވެ.
މިކަމާއި ގުޅިގެން މަޖިލީހަށް ފޮނުއްވާފައިވާ ޖޭއެސްސީގެ ސިޓީ އިއްވާފައިވަނީ މަޖިލީހުގެ އަމީން އާންމު ފާތިމަތު ނިއުޝާއެވެ.
އެސިޓީގައި ވަނީ ފަނޑިޔާރު ޢަބްދުالله ދީދީ މަގާމުން ވަކި ކުރުމަށް ހުށަހަޅާފައެވެ. އަދި މި މައްސަލައިގެ ތަހުގީގު ރިޕޯޓުގެ ކޮޕީއެއް ފޮނުވާފައިވާ ކަމަށް ވެސް އެ ސިޓީގައި ވެއެވެ.
އަންގާރަ ދުވަހު ބޭއްވެވި ޖޭއެސްސީގެ ޖަލްސާއަށް ފަހު ނެރުނު ނޫސް ބަޔާނެއްގައި ޖޭއެސްސީއިން ބުނެފައިވަނީ، ފަނޑިޔާރު ދީދީ ވަކިކުރަން މަޖިލީހަށް ފޮނުވަން ނިންމީ، އެ ކޮމިޝަނުގެ ތަހުގީގު ރިޕޯޓަށް ބަދަލެއް ގެންނަން ނުފެންނާތީ ކަމަށެވެ. ޖޭއެސްސީން ވަނީ ފަނޑިޔާރު ދީދީގެ ތަހުގީގީ ރިޕޯޓަށް ޖަވާބުދާރީ ވުމަށް ގާނޫނޫގައި ލާޒިމްކުރާ 30 ދުވަހުގެ މުއްދަތު ދީފައެވެ. ފަނޑިޔާރު ޑީޑީ އެކޮމިޝަނަށް ލިޔުމުން ޖަވާބު ދެއްވާފައިވާ އިރު، ޖޭއެސްސީން ވަނީ އެ ޖަވާބުގައިވާ ކަންކަމަށް ބެލުމަށް ފަހު ތަހުގީގު ރިޕޯޓަށް ބަދަލެއް ގެންނާނެ ތަނެއް ނެތް ކަމަށް ނިންމާފައެވެ.
