ލޯކަލް ކައުންސިލް އިންތިޚާބު ބޮޑެތި ބަދަލުތަކާއެކު އަންނަ އޭޕްރިލް މަހު!
ވޯޓު ފޮއްޓަކަށް ވޯޓުލާ އަދަދު 700 އަށް ވުރެ އިތުރު ނުވާނޭހެން ބަދަލު ކުރެވޭނެ
އިލެކްޝަންސް ކޮމިޝަނުގެ ރައީސް އަހުމަދު ޝަރީފް
އަންނަ އަހަރުގެ ލޯކަލް ކައުންސިލް އިންތިޚާބު ބޮޑެތި ބަދަލުތަކާއެކު ބޭއްވިގެންދާނެ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އިލެކްޝަންސް ކޮމިޝަނުގެ ރައީސް އަހުމަދު ޝަރީފް އެ ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވިދާޅުވީ ލޯކަލް ކައުންސިލް އިންތިޚާބް ބާއްވާނެ ސީދާ ތާރީޚެއް ކަނޑައަޅާފައިނުވާ ނަމަވެސް ބާއްވާނެ ވަކި ދުވަސްވަރެެއް ކަނޑައަަޅާފައިވާ ކަމަށެވެ. އެގޮތުން އަންނަ އޭޕްރިލް މަހުގެ ފުރަތަމަ ހަފްތާގައި ބޭއްވުމަށް މަޝްވަރާ ކުރެވެމުންދާކަމަށް ޝަރީފް ވިދާޅުވިއެވެ.
އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވީ މި ލޯކަލް ކައުންސިލް އިންތިޚާބް، ރިޔާސީ އިންތިޚާބާއި އަދި ރައްޔިތުންގެ މަޖިލީހުގެ އިންތިޚާބާއި ވަރަށް ބޮޑަށް ތަފާތު ވާނެކަމަށެވެ. ކައުންސިލް އިންތިޚާބުގެ ރޭވުންތައް އަމާޒުކޮށްފައިވާނީ މައިގަނޑުގޮތެއްގައި ކެންޑިޑޭޓުންނާއި ވޯޓުލާ ފަރާތްތަކަށް ފަސޭހަވާނެ ގޮތަކަށް ކަމަށެވެ.
އެހެން އިންތިޚާބުތަކާއި ޚިލާފަށް ކައުންސިލް އިންތިޚާބުގައި ނަތީޖާ ފާޅުކުރުމާއި ނަތީޖާ ސާފު ކުރުމަށްޓަކާ، ގިނަ ވަގުތުތަކެއް ހޭދަވުމުން އޮޅުން ބޮޅުން އުފެދެމުގެ ފުރުސަތު ބޮޑު ކަމަށް ވެސް ވިދާޅުވިއެވެ. ވަގުތު ސަލާމަތް ކުރުމުގެ ގޮތުން ވޯޓު ފޮއްޓަށް ލާ އަދަދު ވަރަށް ބޮޑު ތަން މަދު ކުރެވިފައިވާ ކަމަށް ވެސް ވިދާޅުވިއެވެ.
އެގޮތުން ކޮންމެ ވޯޓު ފޮއްޓަކަށް ވޯޓުލާ އަދަދު 700 އަށް ވުރެ އިތުރު ނުވާނޭހެން ބަދަލު ކުރުމަށް އެ ކޮމިޝަނުން މަޝްވަރާ ކުރަމުން ދާކަމަށާއި ވޯޓު ފޮއްޓަށް ވޯޓު ލާ އަދަދު މަދު ކުރެވުމުން ވޯޓު ފޮށީގެ އަދަދު އިތުރުވުމުގެ އިތުރުން އިންތިޚާބުގައި ހަރަކާތްތެރިވާ އޮފިޝަލުން ގެ އަދަދަދުވެސް އިތުރު ވާނެ ކަމަށް ޝަރީފް ވިދާޅުވިއެވެ. 6000 އާއި 7000 ދެމެދުގެ އަދަދަށް އޮފިޝަލުން އިތުރުވާ އިރު 178 ވޯޓު ފޮށި އިތުރަށް ބެެހެއްޓޭނެއެވެ.
މި އިންތިޚާބަކީ ކުރިމަގުގައި އިސްލާހު ކުރެވެމުންދާ ލާމަރުކަޒީ ގާނޫނާއި ގުޅޭ އިންތިޚާބެއްކަން ފާހަގަ ކުރައްވަމުން ޝަރީފް ވިދާޅުވީ މި ގާނޫނު ބައްޓަން ކުރަމުންދާ ރައްޔިތުންގެ މަޖިލީހުގެ ކޮމެޓީއަށް ގާނޫނަާށް ގެނެވޭ އިސްލާހުތަކާއި ގުޅިގެން މަޝްވަރާ ކުރުމާށާއި އިންތިޒާމްތައް ބައްޓަން ކުރެވިފައިވާ ގޮތާއި ކައުންސިލަރުންގެ އަދަދާއި މެދު މަޝްވަރާ ކުރެއްވުމަށް ރައްޔިތުންގެ މަޖިލީހަށް ސީޓީއެއް ފޮނުވާފައިވާ ކަމަށެވެ.
މީގެއިތުރުން މި ފަހަރުގެެ ކައުންސިލް އިންތިޙާބުގެ ތެރޭގައި ހަރަކާތްތެރިވާ އޮބްޒަރވަރުންނާއި، މަންދޫބުންނާއި، މޮނީޓަރުންނަށް ލިސްޓުގެ ކަރުދާސް ފައިލެއް ވެއްދުމާއި ނުވަތަ ލިސްޓުގެ ސޮފްޓް ކޮޕީއެއް ފޯނު، އައިޕެޑް ނުވަތަ ޓެބްލެޓް ފަދަ އިލެކްޓްރޯނިކްސް ބޭނުން ކުރެވޭ ގޮތް ހެދުމުގެ މަޝްވަރާ ކުރެވެމުންދާ ކަމަށް ވެސް ޝަރީފް ވިދާޅުވިއެވެ. މީގެ ސަބަބުން ވޯޓުލީ މީހުންނާއި ވޯޓު ނުލާ މީހުންނާއި އަދި ވޯޓުލާ މަރުކަޒުގެ ބޭރުގައި ތިބި ފަރާތްތަކާއި މުއާސަލާތް ކުރުމަށްޓަކާ ފަސޭހަ ލިބިގެން ދާނެ ކަމަށް ގަބޫލުކުރައްވާ ކަމަށް ވެސް ވިދާޅުވިއެވެ. ޝަރީފް ވިދާޅުވީ މި އިސްލާހު ގާނުނަށް ގެނައުމަށް ހުށަހަޅުއްވާނެ ކަމަށެވެ.
ކުރިއެކޭ ވެސް އެއްގޮތަށް ވަގުތުން ވަގުތަށް އިންތިޚާބު ހިނގަމުންދާގޮތް ބެލުމުގެ އިންތިޒާމް ހަމަޖެއްސުމުގެ މަސައްކަތް ކުރައްވަމުން ގެންދަވާ ކަމަށް ވެސް ވިދާޅުވިއެވެ. މި އިންތިޚާބާއި، ކުރިއަށް އޮތް އިންތިޚާބުތަކުގައި ވެސް ވޯޓު ލުމަށްފަހު ހުށަހެޅޭ މައްސަލަތައް ދިމާވާނެ ގޮތްތައް މަދުކުރުމުގެ މަސައްކަތް ކުރެވެމުންދާކަމަށް ވިދާޅުވިއެވެ. އެގޮތުން ކޮންމެ އިންތިޚާބީ މަރުކަޒެއްގައި ކަންހިނގާގޮތުގެ ރެކޯޑިންގް އެއް ބަލަހައްޓާ ގޮތްތައް ހަމަޖެއްސުމުގެ މަޝްވަރާތައް ކުރިއަށްދާ ކަމަށްވެސް ވިދާޅުވިއެވެ. ބަޖެޓުގެ ދަތިކަން ހުރުމުން އެކަމާއި ގުޅިގެން ފިނޭންސް މިނިސްޓްރީއާއި ބަޖެޓު އިތުރު ކުރުމުގެ މަޝްވަރާ ކުރެވެމުންދާ ކަމަށް ވެސް ވިދާޅުވިއެވެ.
މީގެއިތުރުން ސިޔާސީ ގޮތުން އަންހެނުން ބާރުވެރިކުރުމުގެ ގޮތުން ކައުންސިލްތަކުގައި އަންހެންބޭފުޅުންނަށް 33 އިންސައްތަ ކަނޑައެޅުމަކީ އަންނާނެ ބަދަލެއްކަމަށް ގަބޫލު ކުރައްވާތީ އެކަމަށް މަރުހަބާ ދަންނަވާ ކަމަށް ވެސް އެ ކޮމިޝަނުންވަނީ ބުނެފައެވެ.
