ކަލައިދޫގައި ގެއެޅުމަށް އެދޭ ފަރާތްތަކަށް އެފުރުސަތު ހުޅުވާލައިފި
26 އޯގަސްޓު 2019 | ހޯމަ 06:3260 ހައުސިންގ ޔުނިޓު އެޅުމަށް ވަނީ ހަމަޖެހިފައި
ކަލައިދޫ ރައްޔިތުންތަކެއް
ލ. ކަލައިދޫގައި ގެއެޅުމަށް ނުވަތަ ފްލެޓް އެޅުމަށް އެދޭ ފަރާތްތަކަށް އެފުރުސަތު ހުޅުވާލައިފިއެވެ.
ކަލައިދޫ ކައުންސިލުން ބުނީ ސަރުކާރުގެ ބޯހިޔާވަހިކަމުގެ ތެރޭގައި ހިމެނޭ 20،000 ހައުސިންގ ޔުނިޓުގެ މަޝްރޫއުގެ ދަށުން އެރަށުގައި 60 ހައުސިންގ ޔުނިޓު އެޅުމަށް ހަމަޖެހިފައިވާ ކަމަށެވެ. އަދި މިހައުސިން ޔުނިޓުގެ ތެރެއިން، އެރަށުން ދިރިއުޅުމަށްޓަކައި ދޫކުރެވިފައިވާ ގޯތިތަކުގައި ގެ އިމާރާތް ކުރުމަށް ބޭނުންވާ ފަރާތްތަކާއި، އެހެން ބިމެއްގައި ރޯހައުސް ނުވަތަ ފުލެޓް އަޅަން ބޭނުންވާ އަދަދު ހޯދުމަށް ބޭނުންވާ ކަމަށެވެ.
ކައުންސިލުން ބުނީ ބޯހިޔާވަހިކަމުގެ ވައުދުގެ ދަށުން އަތޮޅުތަކުގައި ބިނާކުރަން ހަމަޖެހިފައިވާ ހައުސިންގ ޔުނިޓް އިމާރާތް ކުރުމާއިބެހޭ އުސޫލާއި އެއްގޮތަށް، އެރަށުން ދިރިއުޅުމަށްޓަކައި ދޫކުރެވިފައިވާ ގޯތިތަކުގައިގެ އިމާރާތް ކުރުމަށް އެދޭ ފަރާތްތަކާއި، އެހެން ބިމެއްގައި ރޯހައުސް ނުވަތަ ފުލެޓް އަޅަން ބޭނުންވާ ފަރާތްތަކުން އެކަމަށްޓަކައި އެއިދާރާއިން ދޫކުރާ 'ސަރުކާރުގެ ބޯހިޔާވަހިކަމުގެ ވައުދުގައި ހިމެނޭ ހައުސިންގ ޔުނިޓް އަޅައިދިނުމުގެ މަޝްރޫއުގެ ދަށުން ގެ އެޅުމަށް އެދޭ ފޯމް ފުރިހަމަކޮށް 2019 ސެޕްޓެމްބަރ 20 ވަނަ ދުވަހުގެ 14:00 ގެ ކުރިން ހުށަހެޅުމަށް އެދޭ ކަމަށެވެ.
ކައުންސިލުން ބުނީ ބޯހިޔާވަހިކަމުގެ ވައުދުގެ ދަށުން އަތޮޅުތަކުގައި ބިނާކުރަން ހަމަޖެހިފައިވާ ހައުސިންގ ޔުނިޓް އިމާރާތް ކުރުމާއިބެހޭ އުސޫލަށް އެއްވެސް ބަދަލެއް ގެނެވިއްޖެނަމަ އެބަދަލެއް އާއްމުކޮށް އިއުލާން ކުރެވޭނެ ކަމަށެވެ.
