ސުޕްރީމް ކޯޓަށް އައްޔަންކުުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހުށަހެޅުއްވި އަންހެން ބޭކަނބަލުންނަކީ އެކަމަށް ވަރަށް ގާބިލް ބޭފުޅުންތަކެއް ކަމަށާއި، އެ ނިންމެވުމަށް މަރުހަބާ ދަންނަވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ސުޕްރީމް ކޯޓުގެ ފަނޑިޔާރު ކަމަށް އައްޔަންކުރެއްވުމަށް ރައީސް ސޯލިހު ފޮނުއްވާފައިވަނީ ސިވިލް ކޯޓުގެ ކުރީގެ ފަނޑިިޔާރު އަދި ބާ ކައުންސިލްގެ މެމްބަރު އައިޝާ ޝުޖޫން އާއި ހައި ކޯޓުގެ ކުރީގެ ފަނޑިޔާރު އަޒްމިރަލްދާ ޒާހިރުގެ ނަންފުޅު އެވެ.

ޖޭއެސްސީގެ ލަފަޔަކަށްއެދި ރައީސް ސޯލިހް ދެ ނަންފުޅު ހުށަހެޅުއްވުމާއެކު އަންހެން ފަނޑިޔާރުން އައްޔަންކުރުމާއި މެދު ބައެއް ފަރާތްތަކުގެ މެދުގައި ވަނީ ހިޔާލުތަފާތުވުން އުފެދިފަ އެވެ.

އާދިއްތަ ދުވަހުގެރޭ ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ރާއްޖޭގެ ބޭރުގެ އިލްމުވެރިންގެ ރައުޔުގެ މަތިން ސުޕްރީމް ކޯޓަށް އައްޔަންކުރަން ރައީސް ސޯލިހު ނަންފުޅުތައް ފޮނުއްވެވި ދެ އަންހެން ބޭކަނބަލުންނަކީ އެކަމަށް ވަރަށް ގާބިލު ފަރާތްތައް ކަމަށެވެ. އަދި އެ ނިންމެވުމަށް ރައީސް ނަޝީދު ވަނީ ރައީސް ޞާލިހަށް މަރުހަބާ ދަންނަވާފައެވެ.

އަންހެން ފަނޑިޔާރުން އައްޔަން ކުރުމާއި ބެހޭ ގޮތުން ސަރުކާރު ކޯލިޝަން ގައި ހިމެނޭ އަދާލަތު ޕާޓީން ނެރެފައިވާ ބަޔާނެއްގައި ބުނީ، ފަނޑިޔާރު ކަމަށް އަންހެނަކު އިސްކުރުމުގެ މައްސަލައަކީ އިސްލާމީ ފިގުހުވެރިންގެ މެދުގައި ޚިޔާލުތަފާތުވެފައިވާ މައްސަލައެއް ކަމަށެވެ. އެގޮތުން ބައެއް ރައުޔުތައް ބުރަވަނީ ފަނޑިޔާރުކަމަށް އަންހެނަކު އައްޔަންކުރުމަކީ ހުއްދަނޫން ކަމެއް ކަމަށެވެ.

އެހެން ނަމަވެސް ހިލާފީ މައްސަލައެއްގައި ވަކި ރައުޔެއް އިހްތިޔާރުކުރާ މީހާ އޭނާއަށް އިހްތިޔާރު ކުރެވުނީ އެކަމުގައި އޮތް ގޯސް ރައުޔުކަމުގައި ވީނަމަވެސް ފާފަވެރި ނުވާނެ ކަމަށް އަދާލަތު ޕާޓިން ނެރުނު ބަޔާނުގައި ވަނީ ބުނެފައެވެ.

ރައީސް ނަޝީދު ނިސްބަށްވެ ވަޑައިގަންނަވާ އެމްޑީޕީން އެކަމާއި ބެހޭ ގޮތުން އާދިއްތަ ދުވަހުގެރޭ ނެެރުނު ބަޔާނެއްގައިވާ ގޮތުން ގާނޫނުއަސާސީ އަށް ރިއާޔަތް ކުރާއިރު ފަނޑިޔާރުކަމުގެ މަގާމަށް އަންހެނަކު ޢައްޔަން ކުރުމަކީ ގާނޫނުއަސާސީ އާއި ރާއްޖޭގައި އަމަލުކުރަމުން އަންނަ އެއްވެސް ގާނޫނަކާ ޚިލާފު ކަމެއް ނޫނެވެ.

ރާއްޖޭގައި އެންމެ ފުރަތަމަ އަންހެން ފަނޑިޔާރެއް އައްޔަން ކުރެވިގެން ދިޔައީ ވެސް ރައީސް މައުމޫންގެ ވެރިކަމުގައި 2007 ވަނަ އަހަރުއެވެ. ރާއްޖޭގެ އެންމެ ފުރަތަމަ އަންހެން ފަނޑިޔާރަކީ ސުޕްރީމް ކޯޓަށް އައްޔަންކުރައްވަން ރައީސް އިބްރާހިމް މުހައްމަދު ސޯލިހަށް ފެނިވަޑައިގެންނެވި ދެ ބޭފުޅުންގެ ތެރޭގައި ހިމެނިވަޑައިގަންނަވާ މ. ކޮކާހަނދުވަރު، އައިޝާ ޝުޖޫން މުހައްމަދެވެ. 2007 ވަނަ އަހަރު ޝުޖޫނާއެކު އިތުރު ފަނޑިޔާރަކުވެސް އައްޔަންކުރެއްވި އެވެ.

ޑރ. އަޒްމިރަލްދާ ޒާހިރަކީ ހައި ކޯޓުގެ ފަނޑިޔާރުކަން ގިނަ ދުވަސްތަކެއްވަންދެން ކުރެއްވި ބޭފުޅެކެވެ. ހައި ކޯޓުގެ ދެކުނު ގޮފީގެ ފަނޑިޔާރުކަމުގެ މަޤާމުގައި ހުންނެވުމަށްފަހު އިސްތިއުފާދެއްވީ މަޖުބޫރީ ހާލަތްތަކެއް ކުރިމަތިވެވަޑައިގެންފައިވާކަމަށް ވިދާޅުވުމަށްފަހު 2016 ވަނަ އަހަރުގެ މެއި މަހުގެ ތެރޭގައެވެ.

މި ދެބޭފުޅުން ސުޕްރީމް ކޯޓުގެ ފަނޑިޔާރުކަމަށް އައްޔަންކުރުމާއެކު ވެވަޑައިގަންނަވާނީ ދިވެހިރާއްޖޭގެ ސުޕްރީމް ކޯޓަށް އައްޔަންކުރެވޭ ފުރަތަމަ ދެ އަންހެން ފަނޑިޔާރުންނެވެ.