އަލަށް ޒަވާޖީ ހަޔާތެއް ފަށާ ފަރާތްތަކަށް ގޯތި ދޫކުރުމާއި ގުޅޭ ގަރާރެއް މަޖިލީހަށް

ގެދޮރު ނެތް ފަރާތްތަކަށާއި، އަލަށް ޒަވާޖީ ހަޔާތެއް ފަށާ ދިވެހިރައްޔިތުންނަށް ގޯތި ދެވޭވަރުގެ ޖާގަ އޮތް ރަށްރަށުން ގޯތި ދޫކުރުމާއި ގުޅޭ ގޮތުން ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.

މި ގަރާރު މަޖިލީހަށް ހުށަހެޅުއްވީ ބާރަށު ދާއިރާގެ މެމްބަރު އަހްމަދު އަބްދުﷲ އެވެ.

ގަރާރުގައި ބުނެފައިވަނީ ގެދޮރު ނެތް ފަރާތްތަކަށާއި، އަލަށް ޒަވާޖީ ހަޔާތެއް ފަށާ ދިވެހިރައްޔިތުންނަށް ގޯތި ދެވޭވަރުގެ ޖާގަ އޮތް ރަށްރަށުން ގޯތި ދޫނުކުރެވި އޮތުމުގެ ސަބަބުން ދިވެހިރައްޔިތުންގެ ތެރެއިން ގިނަ ބަޔަކު ބޯހިޔާވަހިކަމުގެ ހައްގުން މަހްރޫވެ، އެކަމުގެ ސަބަބުން ގިނަ އާއިލާތަކެއް ބިކަވެ، ހާލުގައި ޖެހެމުންދާތީ، މި މައްސަލަ ސަރުކާރުގެ ސަމާލު ކަމަށް ގެންނަ ކަމަށެވެ.

ގާނޫނު އަސާސީގެ 23 ވަނަ މާއްދާގެ ދަށުން ބޯހިޔާވަހިކަމަކީ ކޮންމެ ދިވެހިރައްޔިތަކަށް ލިބިގެންވާ އަސާސީ އަދި އިޖްތިމާއީ ހައްގެއްކަމަށް ވީހިނދު، އަދި ދައުލަތުގެ ކެރިފޯރުންތެރިކަން ހުރި މިންވަރަކުން އެ ހައްގުތައް ރައްޔިތުންނަށް ހޯދޭނެ މަގުފަހިކޮށްދީ އާއިލާތަކަށް ރައްކާތެރިކަން ހޯދައިދިނުމަކީ ގާނޫނު އަސާސީން ދައުލަތަށް މަތިކޮށްފައިވާ ޒިންމާއެއްކަން ގާނޫނު އަސާސީން އިގޭ ކަމަށް ގަރާރުގައި ވަނީ ބުނެފައެވެ.

ގަރާރުގައި ބުނެފައިވަނީ ގެދޮރު ނެތް ފަރާތްތަކަށާއި އަލަށް ޒަވާޖީ ހަޔާތް ފަށާ، ދިރިއުޅުމަށް ނިކުންނަ ޒުވާނުންނަށް ބޯހިޔާވަހިކަން ފޯރުކޮށްދިނުމަކީ ސަރުކާރުގެ މައިގަނޑު އަމާޒަކަށް ކަމަށެވެ.

އެފަދަ ފަރާތްތަކަށް ގޯތިގެދޮރުގެ ތަނަވަސްކަން ފަހިކޮށްދިނުމުގެ ގޮތުން ދިވެހިރާއްޖޭގެ ރަށްރަށުގެ ތެރެއިން ގޯތިދެވޭވަރުގެ ޖާގަ ހުރި ރަށްރަށުން އެފަދަ ފަރާތްތަކަށް ގޯތިދޫކުރުން ލާޒިމްކުރާ ބިލެއް ސަރުކާރުގެ ފަރާތުން އެކުލަވާލައި، ދިވެހި ރައްޔިތުންނަށް ހައްގުވެގެންވާ ބޯހިޔާވަހިކަން ދާއިމީ ގޮތެއްގައި ކަށަވަރު ކޮށްދޭންޖެހޭ ކަމަށް ގަރާރުގައި ވަނީ ބުނެފައެވެ.

މި ކަމަކީ ވަރަށް ގިނަ ދިވެހިރައްޔިތުންތަކަކަށް ދިމާވެފައިވާ މައްސަލައަކަށްވެފައި، ސަރުކާރުގެ މަސައްކަތުގެ ދާއިރާގެ ތެރެއިން މިކަންކަމަށް ހައްލެއް ހޯދަވައިދެއްވުމަށް އެދި މަޖިލީހުން ގޮވާލުމަށް ގަރާރުގައި ވަނީ އެދިފައެވެ.