މިޔަރު މަސްވެރިކަން ހުއްދަކުރާކަށް ނުވިސްނަން: ފިޝަރީޒް މިނިސްޓްރީ
25 އޯގަސްޓު 2019 | އާދީއްތަ 10:12މިޔަރުގެ މަސްވެރިކަން ހުއްދަ ކުރަން މަސްވެރިން ބޭނުންވޭ
ދަލެއް ޖަހައިގެން ހިފާފައިވާ މިޔަރުތަކެއް
ރާއްޖޭގައި މަނާކޮށްފައިވާ މަސްވެރިކަމުގެ ބާވަތެއް ކަމަށްވާ މިޔަރުގެ މަސްވެރިކަން ހުއްދަ ކުރުމުގެ ވިސްނުން ނުގެންގުޅޭކަމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން ބުނެފިއެވެ.
މިޔަރުގެ މަސްވެރިކަމަކީ ގެއްލުމެއް ނުވާކަމެއްނަމަ އެކަން ހުއްދަ ކުރުމަށް ރައްޔިތުންގެ މަޖިލީހުގެ އިޤްތިސާދީ ކޮމިޓީއަށް މަސްވެރިންގެ ފަރާތުން ހުށައަޅާފައިވާއިރު، އެކަމާ ގުޅޭގޮތުން މިނިސްޓްރީން ބުނީ، މިޔަރުގެ މަސްވެރިކަން ހުއްދަ ކުރުމުގެ ވިސްނުން މިނިސްޓްރީން ނުގެންގުޅޭ ކަމަށާއި، އެބާވަތުގެ މަސްވެރިކަން މަނާ ކުރުމުގެ ސަބަބުން ފައިދާވާ ކަމަށެވެ. އެގޮތުން އެކަމަކީ ބައިނަލްއަޤުވާމީ ގޮތުން ގިނަ ޤައުމުތަކުންވެސް ބަލައިގަންނަ ކަމެއްކަމަށާއި، މިޔަރުގެ މަސްވެރިކަމާ ގުޅޭ ދިރާސާތަކެއް ހަދައި އިތުރަށް ދިރާސާ ކުރުމަށްފަހު މެނުވީ އެކަން ހުއްދަ ކުރުމުގެ ވިސްނުމެއް ނެތް ކަމަށް މިނިސްޓްރީން ބުނެފައިވެއެވެ.
އޭގެ އިތުރުން، ބަޑި ބޭނުންކޮށްގެން މަސްވެރިކަން ކުރުން މަނާ ނުކުރުމަށް މަސްވެރިން އެދިފައިވާއިރު، އެކަމާ ގުޅޭގޮތުން މިނިސްޓްރީން ބުނީ، އަލަށް އެކުލަވާލާ މަސްވެރިކަމުގެ ބިލުގައި ހިމަނާފައިވާނީ "ދޫކުރާ ދަގަނޑު" ބޭނުންކޮށްގެން ކުރާ މަސްވެރިކަން (ސްޕިއަރ ގަން ފިޝިންގ) މަނާ ކުރުމަށް ކަމަށާއި، ސްޕިއަރ ގަން އަކީ މިހާރުވެސް ރާއްޖެއަށް އެތެރެކުރުން މަނާ އެއްޗެއް ކަމަށެވެ. ނަމަވެސް ދިވެހިން އާންމުކޮށް ކުރާހެން ދަގަނޑު ޖަހައިގެން ބޯވަ ނެގުން މި ބިލުގެ ދަށުން މަނާނުވާނެ ކަމަށް މިނިސްޓްރީން ބުނެއެވެ.
މިހާރު އަމަލު ކުރަމުންދާ 32 އަހަރުވީ މަސްވެރިކަމުގެ ގާނޫނުގެ ބަދަލުގައި، މުޅިން އަލަށް ތައާރަފްކުރާ 80 މާއްދާއެއްގެ މައްޗަށް އެކުލެވޭ ބިލް ރައީސް އޮފީހަށް ފޮނުވާފައިވަނީ ޖުލައި މަހުގެ ނުވަ ވަނަ ދުވަހުއެވެ.
