"ވެށިފަހި މާލެ" އިން ބިން ދޫކޮށްލި ފަރާތްތަކަށް ބޯހިޔާވަހިކަން ހޯދައިދިނުމަށް މަޖިލީހަށް ގަރާރެއް
ގަރާރު މަޖިލީހަށް ހުށަހެޅުއްވީ ކެލާ ދާއިރާގެ މެމްބަރު އިބްރާހިމް ޝަރީފް
ގުޅީ ފަޅުން ގޯތި ގަނެފައިވާ ފަރާތްތަކަށް ބޯހިޔާވަހިކަން ފޯރުކޮށް ދިނުމަށް ގަރާރުގައި ވަނީ ގޮވާލާފައި
"ވެށިފަހި މާލެ" ޕްރޮގްރާމްގެ ދަށުން މާލެއިން ކުދި ބިންކޮޅު ދޫކޮށްލާފައިވާ ފަރާތްތަކަށާއި، ގުޅީ ފަޅުން ގޯތި ގަނެފައިވާ ފަރާތްތަކުގެ ތެރެއިން ބައެއް ފަރާތްތަކަށް އަދިވެސް ބޯހިޔާވަހިކަން ލިބިފައިނުވާތީ، އެ ކަމަށް ގާނޫނީ ހައްލެއް ހޯދުމަށް ސަރުކާރުގެ ސަމާލުކަމަށް ގެނައުމަށް މަޖިލީހަށް ގަރާރެއް ހުށަހަޅައިފިއެވެ.
މި ގަރާރު މަޖިލީހަށް ހުށަހެޅުއްވީ ކެލާ ދާއިރާގެ މެމްބަރު އިބްރާހިމް ޝަރީފްއެވެ. ގަރާރުގެ ފުރަތަމަކިޔުން ވަނީ އާދީއްތަ ދުވަހުގެ ޖަލްސާގައި އިއްވާފައެވެ.
ގަރާރުގައި ބުނެފައިވަނީ ވެރިރަށް މާލެއަކީ ބިމުގެ ޖާގައިގެ ދަތިކަން އިންތިހާއަށް ކުރިމަތިވެ މީހުން ތޮއްޖެހިފައިވާ ތަނަކަށްވާތީ، އެކަމުގެ ސަބަބުން މާލޭގައި ބިންކޮޅެއް އޮވެ، އެ ބިންކޮޅު ކުޑަވުމުގެ ސަބަބުން މާލޭގައި ދިރިއުޅެވެން ނެތި، ބޯހިޔާވަހިކަމުގެ ހައްގުން މާލޭގެ ގިނަ ރައްޔިތުންތަކެއް މަހްރޫމްވެފައިވާތީ ހުށަހެޅުނު ގަރާރެއް ކަމަށެވެ.
މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމުގެގޮތުން އެ ފަރާތްތަކަށް އަމާޒުކޮށްގެން "ވެށިފަހި މާލެ" ޕްރޮގްރާމްގެ ނަމުގައި ބޯހިޔާވަހިކަމުގެ ޕްރޮގްރާމެއް ހިންގާފައިވީނަމަވެސް، އެ ފަރާތްތަކުގެ މިލްކިއްޔާތުގައި މާލޭގައި ހުރި ކުދި ބިންކޮޅުތައް އެ ޕްރޮގްރާމްގެ ދަށުން ދޫކޮށްލަންޖެހި، އެފަދައިން ބިން ދޫކޮށްލާފައިވާ ބައެއް ފަރާތްތަކަށް އަދިވެސް ބޯހިޔާވަހިކަން ލިބިފައިނުވާ ކަމަށް ގަރާރުގައި ވަނީ ބުނެފައެވެ. ގަރާރުގައި ބުނެފައިވަނީ ތަފާތު ކުރުމެއްނެތި ހަމަހަމަކަމާއެކު އެންމެހާ ދިވެހި ރައްޔިތުންނަށް ބޯހިޔާވަހިކަން ކަށަވަރުކޮށްދިނުމަކީ ރިޔާސީ އިންތިޚާބު އަދި 19 ވަނަ ރައްޔިތުންގެ އިންތިޚާބުގެ ވައުދެއް ކަމަށެވެ.
ސަރުކާރުގެ ފަރާތުން ބޯހިޔާވަހިކަމާގުޅޭ ބިލެއް އެކުލަވާލައި، އެ ކަންކަމާއި ގުޅޭ އުސޫލްތަކާއި ސިޔާސަތުތައް ކަނޑައަޅައި، މާލޭގެ ރައްޔިތުންގެ ތެރެއިން އެފަރާތްތަކުގެ މިލްކިއްޔާތުގައި ހުރި ބިންތައް ދޫކޮށްލަންޖެހިފައިވާ ފަރާތްތަކަށް ދާއިމީ ބޯހިޔާވަހިކަން ގާނޫނަކުން ފަހިކޮށްދިނުމަށް ރިއާޔަތް ކުރަންޖެހޭ ކަންތައްތައް ގަރާރުގައި ވަނީ ހިމަނާފައެވެ.
ސަރުކާރުގެ އިދާރާތަކުން މި ކަމުގައި ކުރަންޖެހޭ މަސައްކަތް ކުރުމުގެ މުހިއްމުކަން މަޖިލީހުން ފާހަގަކޮށް، ސަރުކާރުގެ މަސައްކަތުގެ ދާއިރާގެ ތެރެއިން މި ކަމަށް ހައްލެއް ހޯދަންޖެހޭ ކަމަށް ގަރާރުގައި ވަނީ ބުނެފައެވެ.
