ސްޕެނިޝް ލަލީގާ: ސެލްޓަވީގޯ ބަލިކޮށް ރެއާލުން ފެށުން ރަނގަޅުކޮށްފި

ސްޕެނިޝް ލަލީގާގައި ރެއާލުން ކުޅުނު ފުރަތަމަ މެޗް ކާމިޔާބުކޮށް ލީގުގެ ފެށުން އެޓީމުން ރަނގަޅުކޮށްފިއެވެ.

ސެލްޓަވީގޯ އާއި ދެކޮޅަށް ރެއާލުން ކުޅުނު މި މެޗް ކާމިޔާބު ކުރީ 3-1 ގެ ނަތީޖާ އަކުންނެވެ.

ސެލްޓަވީގޯ ދަނޑުގައި ކުޅުނު މި މެޗު ގެ 12 ވަނަ މިނެޓުގައި ރެއާލުން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ބޭލްގެ އެހީތެރިކަމާއި އެކު ބެންޒިމާ އެވެ. ފޯރިގަދަ ކުޅުމެއް ފެނިގެން ދިޔަ މި މެޗުގެ ފުރަތަމަ ހާފު ނިމުމުގެ ކުރިން ކެލްޓަވީގޯގެ މަހްރޭޒް ވަނީ ލަނޑެއް ޖަހައިފައެވެ. ނަމަވެސް ވީއޭއާރް ބެލުމަށްފަހު ރެފްރީ ނިންމީ މަހްރޭޒް ޖެހި ލަނޑަކީ އޭނާ އޮފްސައިޑްގައި ހުރެ ޖެހި ލަނޑެއް ކަމަށެވެ.

މެޗުގެ ދެވަނަ ހާފު ފަށައިގެން ގިނަ އިރުތަކެއް ނުވެ ރެއާލްގެ މޮޑްރިޗް ކުރި ފައުލަކާއި ގުޅިގެން ރެފްރީ ވަނީ އޭނާ އަށް ރަތް ކާޑު ދައްކާ ދަނޑުން ފޮނުވައިލައިފައެވެ.

ދެވަނަ ހާފުގެ 61 ވަނަ މިނެޓުގައި ރެއާލުން ވަނީ އިތުރު ލަނޑެއް ޖަހާ މެޗުގެ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މިޑްފިލްޑަރ ކްރޫޒް އެވެ. ކްރޫޒްގެ ލަނޑަށްފަހު ވެސް ރެއާލުން ވަނީ ކެލްޓަވީގޯގެ ގޯލަށް ނުރައްކާތެރި ހަމަލާތަކެއް ފޮނުވައިލައިފައެވެ.

ރެއާލުގެ ފަހު ލަނޑު އެޓީމަށް ކާމިޔާބުކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެންނިކުތް ލޫކަސްއެވެ. މި ލަނޑު އޭނާ ކާމިޔާބު ކުރީ ބެންޒިމާގެ އެހީތެރިކަމާއި އެކުގައެވެ.

ސެލްޓަވީގޯއިން ކާމިޔާބުކުރި ހަމަ އެކަނި ލަނޑު މެޗުގެ އެންމެ ފަހު މިނެޓުގައި ކާމިޔާބުކޮށްދިނީ އެޓީމުގެ އީކާއެވެ.