ޔުއެފާގެ މޮޅު ކުޅުންތެރިޔާއަށް ވާދަކުރާ ތިން ކުޅުންތެރިންގެ ނަން އިއުލާންކޮށްފިއެވެ.
ޔުއެފާއިން ހޮވާ މޮޅު ކުޅުންތެރިޔާއަށް މިފަހަރު ވާދަކުރަނީ ޔުވެންޓަސްއަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އާއި ލިވަޕޫލަށް ކުޅެމުން އަންނަ ނެދަލޭންޑްސްގެ ޑިފެންޑަރ ވެންޑައިކް އަދި ބާސެލޯނާ އާއި އާޖެންޓީނާގެ ކެޕްޓަން ލިއޮނެލް މެސީއެވެ.
އެވޯޑަށް އަލަށް ވާދަކުރާ ވެންޑައިކް ވަނީ ނިމިދިޔަ ސީޒަނުގައި ލިވަޕޫލަށް ޔުއެފާ ޗެމްޕިއަންސް ލީގު ހޯދައިދިނުމަށް މުހިންމު ދައުރެއް އަދާކޮށްފައެވެ. މިދިޔަ ސީޒަނުގައި ބާސާއާއެކު ޗެމްޕިއަންސް ލީގުގެ ސެމީއަށް މެސީއަށް ދެވުނުއިރު، ޔުވެންޓަސްއާއެކު ރޮނާލްޑޯއަށް ދެވުނީ މުބާރާތުގެ ކުއާޓާއާ ހިސާބަށެވެ.
ލިވަޕޫލްއާއެކު މިދިޔަ ސީޒަނުގައި ވެންޑައިކްއަށް ޕްރިމިއާ ލީގު ކާމިޔާބު ނުކުރެވުނު ނަމަވެސް، އޭނާ ވަނީ ލީގުގައި މޮޅު ކުޅުމެއް ދައްކާ އެޓީމަށް ލީގުގެ ދެވަނަ ހޯދައިދިނުމަށް މުހިންމު ދައުރެއް އަދާކޮށްފައެވެ.
ރޮނާލްޑޯ ވަނީ ޔުވެންޓަސްއާއެކު މިދިޔަ ސީޒަނުގައި އިޓާލިއަން ލީގު ކާމިޔާބުކޮށްފައެވެ. އަދި އޭނާ ވަނީ ނިމިދިޔަ ސީޒަނުގައި އެޓީމަށް މޮޅު ކުޅުމެއް ދައްކައި މުހިންމު ލަނޑުތަކެއް ކާމިޔާބުކޮށް، އެޓީމާއެކު އިޓާލިއަން ކަޕްވެސް ކާމިޔާބުކޮށްފައެވެ.
މީގެއިތުރުން ރޮނާލްޑޯ ވަނީ މިދިޔަ ސީޒަނުގައި ޕޯޗުގަލްއާއެކު ފުރަތަމަ ފަހަރަށް ބޭއްވި ނޭޝަންސް ލީގު ކާމިޔާބުކޮށްފައެވެ.
ނަމަވެސް މެސީއަށް މިދިޔަ ސީޒަނަކީ ކާމިޔާބު ސީޒަނެއް ނޫނެވެ. އޭނާއަށް މިދިޔަ ސީޒަނުގައި ކާމިޔާބުކުރެވުނީ ހަމައެކަނި ބާސާއާއެކު ސްޕެނިޝް ލީގެވެ.
މި އެވޯޑު ހޮވުމަށް ހަމަޖެހިފައިވަނީ ނިމިދިޔަ ޗެމްޕިއަންސް ލީގު އަދި ޔޫރޮޕާ ލީގުގައި ޓީމުތަކަށް ކޯޗުކޮށްދިން 80 ކޯޗުންނާއި، 55 ނޫސްވެރިން ވޯޓު ލައިގެންނެވެ.
މި އެވޯޑަށް ނޮމިނޭޓްވި އެލިސަން ބެކާއަށް ހަތަރުވަނަ ލިބުނު އިރު، ސާޑިއޯ މާނޭއަށް ލިބުނީ ފަސްވަނައެވެ. އަދި މުހައްމަދު ސަލާހުއަށް ލިބުނީ ހަވަނައެވެ. މި ތިން ކުޅުންތެރިންނަކީވެސް ލިވަޕޫލްގެ ތިން ކުޅުންތެރިންނެވެ.
މޮޅު ކުޅުންތެރިޔާ އިއުލާން ކުރުމަށް ހަމަޖެހިފައިވަނީ މޮނާކޯގައި ބާއްވާ ޗެމްޕިއަންސް ލީގު ޑްރޯ ނެގުމަށް ބާއްވާ ރަސްމިއްޔާތުގައެވެ. މި ރަސްމިއްޔާތު އޮންނާނީ މި މަހުގެ 29 ވަނަ ދުވަހުއެވެ.
