ގައުމީ ޓީމުގައި ދަގަނަޑޭ ހިމެނެން ޖެހޭ: މިނިސްޓަރ މަހްލޫފް
14 އޯގަސްޓު 2019 | ބުދަ 19:50ދިވެހި ސަޕޯޓަރުންގެ އެދުން އެފްއޭއެމްއަށް ރަސްމީކޮށް ހިއްސާކުރާނެ ކަމަށް މިނިސްޓަރ ވިދާޅުވި
އަލީ އަޝްފާގު (ދަގަނޑޭ) (މ) އަދި މިނިސްޓަރ މަހްލޫފް (ވ)
ގައުމީ ފިރިހެން ފުޓުބޯޅަ ޓީމުގައި ގްރީން ސްޓްރީޓަށް ކުޅެމުން އަންނަ ގައުމީ ޓީމުގެ ކުރީގެ ކެޕްޓަން އަލީ އަޝްފާގު (ދަގަނޑޭ) ހިމަނަންޖެހޭ ކަމަށް ޔޫތު މިނިސްޓަރ އަހްމަދު މަހްލޫފް ވިދާޅުވެއްޖެއެވެ.
ބުދަ ދުވަހުގެ ރޭ މިނިސްޓަރ މަހްލޫފް ކުރެއްވި ޓުވީޓެއްގައި ވިދާޅުވީ، ދަގަނޑޭ އަކީ ގައުމީ ޓީމުގައި ހިމެނެން ޖެހޭ ކުޅުންތެރިޔެއް ކަމަށް ގަބޫލުކުރާ ކަމަށާއި، އެބޭފުޅާ ނަގާ ފުރަތަމަ 11 ގައިވެސް ދަގަނޑޭ ހިމެނޭނެ ކަމަށެވެ.
ގައުމީ ޓީމުގެ މެނޭޖަރ ކަމުގެ މަގާމުވެސް މީގެކުރިން އަދާކުރައްވާފައިވާ މިނިސްޓަރ މަހްލޫފް ވިދާޅުވީ، ދިވެހި ސަޕޯޓަރުންގެ އެދުން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އާ ރަސްމީކޮށް ހިއްސާކޮށްދޭނެ ކަމަށެވެ.
މިނިސްޓަރ މަހްލޫފް މިހެން ވިދާޅުވެފައިވާއިރު، ދަގަނޑޭ ގައުމީ ޓީމުގައި ނުހިމަނައިގެން އޭނާގެ ސަޕޯޓަރުން އަދި ފުޓުބޯޅަ ސަޕޯޓަރުން އަންނަނީ ހިތްހަމަނުޖެހުން ފާޅުކޮށް، އެފްއޭއެމް އަދި ގައުމީ ކޯޗު ޕީޓަރ ސެގާޓްއަށް ވަރަށް ބޮޑަށް ފާޑުކިޔަމުންނެވެ.
ކުރިޔަށް އޮތް ފީފާ ވޯލްޑް ކަޕް ކޮލިފައިންގެ މެޗުތަކަށް ގައުމީ ކޯޗު ނެގި 28 ކުޅުންތެރިންގެ ޕްރިލިމިނަރީ ސްކޮޑުން ދަގަނޑޭއަށް ޖާގަ ދީފައިނުވާއިރު، އޭނާ ވަނީ މިދިޔަ އަހަރު ރާއްޖޭގެ އެންމެ މޮޅު ފުޓުބޯލަ ކުޅުންތެރިޔާގެ އިތުރުން އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދައިފައެވެ.
ދަގަނޑޭއަށް ގައުމީ ޓީމުން ފުރުސަތު ނުދިނުން ޒާތީ ކަމަކަށް ވަނީ ބެލެވިފައެވެ. އަދި ކޯޗު ބުނާގޮތުންވިއްޔާ ދަގަނޑޭއަށް ޓީމުން ފުރުސަތުދޭ ވަރަށްވުރެ މުސްކުޅިއެވެ.
