ކަނޑު ދަތުރު ކުރުމަށް ރައްކާތެރިއެއް ނޫން: ފުލުހުން

ކަނޑު ދަތުރު ކުރުމަށް މިހާރު ރައްކާތެރި ނޫން ކަމަށް ފުލުހުން ބުނެފިއެވެ.

ފުލުހުން ކުރި ޓުވީޓެއްގައި ބުނީ، މޫސުން ގޯސްވެ ކަނޑުގަދަވުމާއި، ގުޅިގެން ދަތުރު ކުރުން މިހާރު ރައްކާތެރި ނޫން ކަމަށެވެ.

އެގޮތުން ފުލުހުން ބުނީ، މޫސުމާ ބެހޭ އިދާރާއިން މިހާރު "ޔެލޯ އެލާޓް" ނެރެފައިވާ ކަމަށާއި، ރައްކާތެރިކަމުގެ ފިޔަވަޅު އެޅުމަށް ފުލުހުން ވަނީ އިލްތިމާސްކޮށްފައެވެ.

މޫސުމާބެހޭ އިދާރާއިން ވަނީ ބ.އަތޮޅުން ފެށިގެން ދ.އަތޮޅަށް ޔެލޯ އެލާޓް ނެރެފައެވެ. އެ އިދާރާއިން ބުނީ، ހޯމަ ދުވަހުގެ ރޭ 19:00 އިން ފެށިގެން 21:30 އަށް މޫސުން ލަފާކުރެވޭ ގޮތުގައި އެ ހިސާބަށް ބޯކޮށް ވާރޭ ވެހުމާއެކު، ގުގުރުން އަދި ވިލާ ގަނޑުގައި 55 މޭލަށް ވައި ގަދަވާނެކަމަށް ލަފާކުރެވޭ ކަމަށެވެ.

ރާއްޖެއަށް މިހާރު ކުރަމުންދާ ވިއްސާރައިގައި ދެކުނުގެ ބައެއް އަތޮޅުތަކަށް އަންނަނީ ގެއްލުން ވަމުންނެވެ. އަދި ހާއްސަކޮށް އައްޑޫ ސިޓީއަށް ވަނީ ބޯކޮށް ވާރޭ ވެހި ގެތަކަށް ގެއްލުންތަކެއް ވެފައެވެ.

މީގެއިތުރުން، ފާހަގަކޮށްލަންޖެހެނީ ރާއްޖެއަށް ވާރޭ ވެހެން ފަށާފައިވަނީ އީދު ބަންދާ ދިމާކޮށް ގިނަ ބަޔަކު ދަތުރުފަތުރުތައް ފަށާފައިވަނިކޮށެވެ. އެގޮތުން އެތައް ބަޔެއްގެ ދަތުރުތަކަށް ވަނީ މޫސުމުގެ ސަބަބުން ބުރޫއަރާފައެވެ.