އާސެނަލް ދޫކޮށް އިވޯބީ އެވަޓަންއަށް ބަދަލުވެއްޖެ

އާސެނަލް ދޫކޮށް އެ ކްލަބަށް ކުޅެމުން އަންނަ ނައިޖީރިއާގެ ފޯވާޑް އެލެކްސް އިވޯބީ އެވަޓަންއަށް ބަދަލުވެއްޖެއެވެ.

އުމުރުން 23 އަހަރުގެ އިވޯބީ އެވަޓަންއަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުން 34 މިލިއަން ޕައުންޑަށެވެ.

އެވަޓަންގެ ކޯޗު މާކޯ ސިލްވާ ބުނީ، މިފަހަރުގެ ޓްރާންސްފާގައި އިވޯބީއަކީ އެވަޓަންއިން ހޯދަން އެންމެ ބޮޑަށް ބޭނުންވި ކުޅުންތެރިޔާ ކަމަށާއި، އޭނާ އަކީ ވަރަށް ހުނަރުވެރި ކުޅުންތެރިޔެއް ކަމަށެވެ.

އިވޯބީއަކީ ޒުވާން ކުޅުންތެރިޔެއްކަން ފާހަގަކުރަމުން މާކޯ ސިލްވާ ބުނީ، އަދި ވަރަށް ގިނަ ތަޖުރިބާތަކެއް ކުރަން އިވޯބީ ޖެހޭ ކަމަށާއި، އޭނާގެ ބޭނުން ކްލަބަށް ކުރިޔަށް އޮތް ތަނުގައި ހިފޭނެ ކަމަށެވެ.

އިވޯބީ ވަނީ މިދިޔަ އަހަރުގެ އޯގަސްޓް މަހު އޭނާ އާސެނަލްއާއެކު ހެދި އެއްބަސްވުން 2023 ވަނަ އަހަރުގެ ނިޔަލަށް އާކޮށްފައެވެ. ނަމަވެސް އޭނާ ވަނީ އެއްބަސްވުން ހަމަނުވަނީސް ގިނަ ކްލަބްތަކުން ހުށަހެޅުންތަކަށް ފުރަގަސްދީ އެވަޓަންއަށް ބަދަލުވެފައެވެ.

އާސެނަލްއިން ކެރިޔަރު ފެށި އިވޯބީ ވަނީ އެ ކްލަބަށް ކުޅުނު 149 މެޗުގައި 15 ލަނޑު ކާމިޔާބުކޮށް، އެ ކްލަބާއެކު އެފްއޭ ކަޕް އެއްފަހަރު، ކޮމިއުނިޓީ ޝިލްޑް ދެފަހަރު، ލީގު ކަޕް އަދި ޔޫރޮޕާ ލީގުގެ ދެވަނަ ހޯދާފައެވެ.

ނައިޖީރިއާ ގައުމީ ޓީމަށް ކުޅުނު 36 މެޗުގައި ހަ ލަނޑު ކާމިޔާބު ކޮށްފައިވާ އިވޯބީ ވަނީ ނައިޖީރިއާ ގައުމީ ޓީމާއެކު ކަޕް އޮފް ނޭޝަންސްގެ ތިން ވަނަ މި އަހަރު ހޯދާފައެވެ.

މީގެއިތުރުން އިވޯބީ ވަނީ 2016 ވަނަ އަހަރު ކޮންފެޑެރޭޝަންސް އޮފް އެފްރިކަން ފުޓްބޯލްގެ އެންމެ މޮޅު ޒުވާން ކުޅުންތެރިޔާގެ މަގާމު ހޯދާފައެވެ.