ޑިމޮކްރެޓިކް ރިޕަބްލިކް އޮފް ކޮންގޯ (ޑިއާރްސީ) ގައި ވޯލްޑް ހެލްތް އޮގަނައިޒޭޝަން (ޑަބްލިއު އެޗްއޯ) ގެ ޑޮކްޓަރަކު މަރާލި މައްސަލައިގައި އެ ގައުމުގެ ތިން ޑޮކްޓަރަކު ހައްޔަރުކޮށްފިއެވެ.
އެޕްރިލް މަހު މަރާލާފައިވަނީ ކެމެރޫންގެ ޑޮކްޓަރެއް ކަމަށްވާ ރިޗާރޑް މޮޒޮކޯއެވެ. އޭނާ މަރާލީ ބުޓެމްބޯގައި ހުންނަ ހޮސްޕިޓަލެއްގެ ތެރޭގައި ދިން ބަޑީގެ ހަމަލާތަކެއްގެ ތެރޭގައެވެ.
ދުނިޔޭގެ ސިއްހަތު ޖަމިއްޔާގެ ފަރާތުން މޮޒޮކޯ ޑީއާރްސީއަށް ފޮނުވާފައިހުރީ އެގައުމުގައި ހަލުވި ދުވެއްޔެއްގައި ފެތުރެމުންދާ ނުރައްކާތެރި އެބޯލާ ވައިރަސް ޑިސީސް (އީވީޑީ) އެބޯލާ ފެތުރުން ހުއްޓުވުމަށް އެ ޖަމިއްޔާއިން ކުރަމުންދާ މަސައްކަތްތަކުގައި އެހީތެރިވުމަށެވެ.
ބުޓެމްބޯގެ އަސްކަރީ ޕްރޮސެކިއުޓަރެއް ކަމަށްވާ ކޮލޮނެލް ޖީން ބެޕްޓިސްޓް ކުމްބޫ އާއި ހަވާލާދީ އޭއެފްޕީގައި ރިޕޯޓްކޮށްފައިވާގޮތުގައި ހައްޔަރު ކުރި ޑޮކްޓަރުންގެ މައްޗަށް އަންނާނީ ޓެރަރިޒަމްގެ ދައުވާއެވެ.
ހައްޔަރު ކުރި ތިން ޑޮކްޓަރުން މުޒޯކޯ މަރާލުމަށް އެޕްރިލް މަހުގެ 14 ވަނަ ދުވަހު މަޝްވަރާ ކުރި ކަމަށް ވެސް އޭނާ ބުނެފައިވެއެވެ.
ބުޓެމްބޯގެ ބައެއް ޑޮކްޓަރުން ވަނީ ހައްޔަރު ކޮށްފައިވާ މީހުން ދޫކޮށްލުމަށް ގޮވާލާ މުޒާހަރާ ކޮށްފައެވެ. އެގޮތުން އެމީހުން ވަނީ ނުރުހުން ފާޅުކޮށް އެ ސިޓީގެ މޭޔަރަށް ސިޓީއެއް ފޮނުވާފައެވެ.
ޑީ.އާރް.ސީ ގައި ފެތުރެމުންދާ އެބޯލާ ވައިރަސް ކޮންޓްރޯލް ކުރުމަށްޓަކައި އެ ގައުމުގެ ސިއްހީ އެހީތެރިންނާ އެކު ދުނިޔޭގެ ސިއްހަތު ޖަމިއްޔާއިން ދަނީ ހަރަކާތްތެރިވަމުންނެވެ.
