ޖޫނިއަރ ގައުމީ ޓީމުގެ ކޯޗަކަށް ނިޒާމްބެ ހަމަޖައްސައިފި

އައްޑޫ ސިޓީގައި ކުރިޔައްދިޔަ ޔޫއެފާ އެސިސްޓް މުބާރާތުގައި ރާއްޖޭގެ ޖޫނިއަރ ޓީމު ނެރުނު ދަށް ނަތީޖާތަކުގެ ސަބަބުން އެޓީމުގެ ހެޑް ކޯޗް އިބްރާހީމް ހަލީމް (ޖަޑާ) ވަކިކޮށް, އެ މަގާމަށް ޓީސީ ސްޕޯޓްސް ކްލަބްގެ ކުރީގެ ކޯޗު މުހައްމަދު ނިޒާމް (ނިޒާމްބެ) ހަމަޖައްސައިފިއެވެ.

އައްޑޫ ސިޓީގައި ކުރިޔަށްދިޔަ ޔޫއެފާ އެސިސްޓް މުބާރާތް ރާއްޖޭގެ ޓީމުން ނިންމައިލީ މުބާރާތުގެ ފުލުގައި އޮވެގެންނެވެ. ބައިކޮޅަށް ގިނަ ލަނޑު ތަކެއް ވަތްއިރު ރާއްޖެއަށް އެ މުބާރާތުގައި ކާމިޔާބު ކުރެވުނީ އެންމެ ލަނޑެކެވެ.

ފާއިތުވެދިޔަ ދެ އަހަރު ރާއްޖޭގެ އެންމެ މޮޅު ކޯޗުގެ މަގާމު ހޯދާފައިވާ ނިޒާމްބެ އިރުޝާދުގެ ދަށުން ޓީސީން ނިމިދިޔަ ސީޒަނުގެ ދިވެހި ޕްރިމިއާ ލީގު ކާމިޔާބުކޮށްފައިވާއިރު، އެޓީމުން ވަނީ ބަންގްލަދޭޝްގައި ބޭއްވުނު ޝައިހް ކަމާލް އިންޓަނޭޝަނަލް ކަޕް ވެސް ކާމިޔާބުކޮށްފައެވެ.

މީގެ އިތުރުން ނިޒާމްބެ އިރުޝާދުގެ ދަށުން ޓީސީ ވަނީ ދެވަނަ ޑިވިޝަނުން ފުރަތަމަ ޑިވިޝަނަށް ޕްރޮމޯޓްވެ، ވިދިވިދިގެން ތިން އަހަރު ދިވެހި ޕްރިމިއާ ލީގުގެ ދެވަނަ ހޯދާފައެވެ. އަދި ނިޒާމްބެ އިރުޝާދުގެ ދަށުން ޓީސީން ދެ ފަހަރު އެފްއޭކަޕްގެ ދެވަނަ ހޯދާފައިވާއިރު، ޕްރެޒިޑެންޓްސް ކަޕްގެ ދެވަނަ އެއް ފަހަރު ހޯދާފައި ވެއެވެ.