ބައިނަލްއަޤުވާމީ ޓީޗަރުންގެ ކޮންފަރެންސްއަށް 80 ކަރުދާސް ހުށަހަޅައިފި
ޓީޗަރުންގެ މެދުގައި ދިރާސާގެ ސަޤާފަތް ޤާއިމު ކުރެވޭނެ
(އެންއައިއީ) ގެ ފަރާތުން މިނިސްޓްރީގެ ސްޓޭޓް މިނިސްޓަރ ޑރ.އަބްދުﷲ ރަޝީދް
ބައިނަލްއަޤުވާމީ ޓީޗަރުންގެ ކޮންފަރެންސްގެ ފަސް ވަނަ ބައްދަލުވުމަށް އެކި ފަރާތްތަކުން 80 ކަރުދާސް ހުށައަޅައިފި ކަމަށް އެޑިއުކޭޝަން މިނިސްޓްރީން ބުނެފިއެވެ.
ބުރާސްފަތި ދުވަހު އޮތް ނޫސްވެރިންގެ ބައްދަލުވުމެއްގައި ނޭޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) ގެ ފަރާތުން މިނިސްޓްރީގެ ސްޓޭޓް މިނިސްޓަރ ޑރ.އަބްދުﷲ ރަޝީދު ވިދާޅުވީ، މިހާތަނަށް 80 ފަރާތަކުން ކަރުދާސް ހުށައަޅާފައިވާ ކަމަށެވެ. އެގޮތުން މި ކޮންފަރެންސްގެ މައިގަނޑު މަޤްސަދަކީ ސުކޫލުތަކުގައި މަސައްކަތް ކުރައްވާ ޓީޗަރުންގެ މެދުގައި ދިރާސާގެ ސަޤާފަތް ޤާއިމު ކުރުމާއި، އިލްމީ މަސައްކަތްތައް ކުރައްވާ ބައިނަލްއަޤުވާމީ ފަރާތްތަކަށް ރާއްޖެ ހުޅުވާލުމާއި، އެފަދަ ފަރާތްތަކުގެ މަސައްކަތްތައް ހިއްސާ ކުރާނެ ޕްލެޓްފޯމެއް ޤާއިމު ކުރުން ކަމަށް މިނިސްޓްރީން ބުނެއެވެ.
މި ކޮންފަރެންސް ސެޕްޓެމްބަރު މަހުގެ 4 އިން 5 އަށް ކުރިއަށްދާއިރު، މީގެކުރިން މި ބައްދަލުވުން ބާއްވަމުން ގެންދިޔައީ މާލޭގައި ނަމަވެސް މިފަހަރު މި ބައްދަލުވުން އޮންނާނީ އައްޑޫ ސިޓީގައެވެ. އެގޮތުން މިއަހަރުގެ ކޮންފަރެންސް އައްޑޫ ސިޓީގައި ބާއްވަން ނިންމީ ލާމަރުކަޒީ ގޮތުން އިދާރާތައް ހިންގުމަށް ސަރުކާރުން ގެންގުޅޭ ސިޔާސަތަށް އެއްބާރުލުން ދިނުމަށް ކަމަށް މިނިސްޓްރީން ބުނެފައިވެއެވެ.
މި ކޮންފަރެންސްއަށް ކަރުދާސް ހުށައެޅުމުގެ ފުރުސަތު 30 ޖުލައިއަށް ހަމަވެފައިވާއިރު، މި ބައްދަލުވުމުގައި ހުށައެޅޭ ދިރާސާތަކާއި މަސައްކަތްތަކުގެ އަލީގައި ސުކޫލުތަކުގެ ކިޔަވައިދިނުމަށް ރަނގަޅު ބަދަލެއް ގެނެވޭނެ ކަމަށާއި، މިއީ އައްޑޫ ސިޓީގައި މި ބައްދަލުވުން ކުރިއަށްގެންދާ ފުރަތަމަ ފަހަރު ކަމަށް އެންއައިއީއިން ބުނެއެވެ.
