ކުރީ ސަރުކާރުން ކޮށްފައިވާ ކަންކަން އިސްލާހު ކުރަންޖެހޭތީ މަސައްކަތްތައް ލަސްވޭ: ނަހުލާ
އެހެން ވިދާޅުވީ ނައިފަރު ދާއިރާގެ މެމްބަރުގެ ސުވާލަކަށް ޖަވާބުދެއްވަމުން
ޓްރާންސްޕޯރޓް މިނިސްޓަރ އާއިޝަތު ނަހުލާ
ކުރީގެ ސަރުކާރުން ނުރަނގަޅުކޮށް ކޮށްފައިވާ ކަންކަން އިސްލާހު ކުރުމުގެ މަސައްކަތް ކުރަންޖެހިފައިވާތީ މިނިސްޓްރީގެ މަސައްކަތްތައް ލަސްވެގެންދާ ކަމަށް ޓްރާންސްޕޯރޓް މިނިސްޓަރ އާއިޝަތު ނަހުލާ ވިދާޅުވެއްޖެއެވެ.
ބުދަ ދުވަހު މިނިސްޓަރ މަޖިލީހަށް ހާޒިރު ކުރައްވާފައިވާއިރު، ހެލްމެޓު އެޅުއްވުން ފިޔަވައި އިތުރު އާ ކަމެއް ކުރައްވަންތޯ ނައިފަރު ދާއިރާގެ މެމްބަރު އަހުމަދު ސިޔާމް ކުރެއްވި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ، އާ ކަންތައްތަކެއް ތައާރަފްކުރުމުގެ ކުރިން ފުރަތަމަ މަސައްކަތެއްގެ ގޮތުން ކުރީ ސަރުކާރުން ކޮށްފައިވާ ކަންކަން ރަނގަޅުކޮށް އިސްލާހު ކުރަންޖެހޭ ކަމަށެވެ.
މިނިސްޓަރ އިތުރަށް ވިދާޅުވީ، ކުރިއަށް އޮތް ތަނުގައި ވަރަށް އާ ކަންތައްތަކެއް މިނިސްޓްރީން ކުރަން ނިންމާފައިވާ ކަމަށާއި، ރައްޔިތުންނަށް ޚިދުމަތް ދިނުމުގައި ދެމިތިއްބަވާނެ ކަމަށެވެ.
މިނިސްޓަރ އެހެން ވިދާޅުވެފައިވާއިރު، ކުރީގެ ސަރުކާރުން ކޮށްފައިވާ ކަންކަން ރަނގަޅުކޮށް އިސްލާހު ކުރުމުގެ މަސައްކަތް ކުރަންޖެހޭތީ މިސަރުކާރުގެ މުއައްސަސާތަކުގެ މަސައްކަތް ލަސްވެގެންދާ ކަމުގެ ޝަކުވާ ސަރުކާރުގެ ގިނަ މުއައްސަސާތަކުގެ ވެރިން ދަނީ ކުރައްވަމުންނެވެ. އެގޮތުން އަންގާރަ ދުވަހު ހެލްތު މިނިސްޓަރ އަބްދުﷲ އަމީން މަޖިލީހަށް ހާޒިރު ކުރުމުންވެސް އެކަން ވަނީ ފާހަގަކުރައްވާފައެވެ.
