ކުރީގެ ނައިބު ރައީސް އަހުމަދު އަދީބު ފިއްލެވުމަށް ބޭނުންކުރެއްވި ޓަގު ބޯޓު ރާއްޖެ ގެނެސް އެ މައްސަލަ ބަލަން ފަށާފައިވާ ކަމަށް ފުލުހުން ބުނެފިއެވެ.
ޕާސްޕޯޓް ހިފަހައްޓާފައި ވަނިކޮށް ރާއްޖެއިން އަދީބު ފިއްލެވީ މިދިޔަ ހަފްތާ ތެރޭގައެވެ. ވަރގޯ 9 ކިޔާ ޓަގް ބޯޓެއްގައި އިންޑިއާގެ ޓުޓްކޮރިން ބަނދަރުން އެ ގައުމަށް އެތެރެވާން އުޅެނިކޮށް އަދީބު ހައްޔަރު ކޮށްފައިވަނީ އޮގަސްޓު މަހުގެ 1 ވަނަ ދުވަހުއެވެ. އެބޯޓަކީ ސިންގަޕޫރުގައި ރަޖިސްޓަރީ ކޮށްފައިވާ ޓަގް ބޯޓެކެވެ.
ފުލުހުން ބުނީ އަދީބު ފިއްލެވުމަށް މަސައްކަތް ކުރެއްވި ޓަގް ބޯޓުގެ މައްސަލަ އެ އިދާރާއިން ބަލަން ފަށާފައިވާ ކަމަށާއި ޓަގްބޯޓުގެ އެއްވެސް މީހަކު އަދި މިހާތަނަށް ހައްޔަރު ކޮށްފައި ނުވާކަމަށެވެ.
ޓަގްބޯޓް ވަރގޯ9 އާއި ގުޅޭ މައްސަލަ އެއް މޯލްޑިވްސް ޕޮލިސް ސަރވިސަސް އިން ދަނީ ބަލަމުން. އެތަހުގީގުގެ ބޭނުމަށްޓަކައި އެ ޓަގު ބޯޓު ރާއްޖެ އައުމުން ހިފަހައްޓާފައި ދެއްވުމަށް މޯލްޑިވްސް ކަސްޓަމްސް ސަރވިސްގައި ދަންނަވާފައި ވާނެ. މިމައްސަލަ އާއި ގުޅިގެން އެ ޓަގްބޯޓުގެ އެއްވެސް މީހަކު މިހާތަނަށް ހައްޔަރު ކޮށްފައި ނުވޭމޯލްޑިވްސް ޕޮލިސް ސަރވިސް
ކަސްޓަމްސް އިން ވަނީ އެ ބޯޓު ހިފަހައްޓާފައިވާ ކަން ކަށަވަރު ކޮށްދީފައެވެ.
އަދީބު ފިއްލެވި ޓަގު ބޯޓު މިމަހުގެ 1 ގައި ހައްޔަރު ކުރި އިރު އޭނާގެ އިތުރުން ނުވަ ފަޅުވެރިއަކު އޭގައި ތިބި ކަމަށް އިންޑިއާގެ ނޫސްތަކުގައި ވެއެވެ. ނަމަވެސް އެ ބޯޓު ރާއްޖެ ގެނައިއިރު އެ ފަޅުވެރި ތިބި ކަމެއް ސާފެއް ނުވެއެވެ. މައުލޫމާތު ލިބިފައިވާ ގޮތުގައި ޓަގު ބޯޓު ރާއްޖެ ގެނެސްފައިވަނީ އަންގާރަ ދުވަހު އެވެ.
އަދީބު ފިއްލެވުމުން އިންޑިއާގެ ކަމާބެހޭ ފަރާތްތަކުން އޭނާ ވަނީ ރާއްޖެ ފޮނުވާލާފައެވެ. ދިވެހި ފުލުހުންގެ އެހީތެރިކަމާއެކު އަދީބު ހިފަހައްޓައިގެން ރާއްޖެ ގެނެސްފައިވަނީ އާދީއްތަ ދުވަހުއެވެ. ކްރިމިނަލް ކޯޓުގެ އަމުރެއްގެ ދަށުން އަދީބު މިހާރު ހުންނެވީ 15 ދުވަހުގެ ބަންދުގެ މުއްދަތެއްގައެވެ.
ފުލުހުން ބުނެފައިވަނީ އަދީބު ފިލުވުމުގައި އެހީތެރިވި ފަރާތްތަކުގެ މައްސަލަ ތަހުގީގުކުރާނެ ކަމަށެވެ.
