ބައިނަލްއަގްވާމީ ސެޓެލްމެންޓާބެހޭ މުއާހަދާގައި ރާއްޖެއިން ސޮއިކޮށްފި
7 އޯގަސްޓު 2019 | ބުދަ 04:18ސޮއިކޮށްފައި ވަނީ ސިންގަޕޫރުގައި ބޭއްވި ރަސްމިއްޔާތެއްގައި
އެގްރީމެންޓުގައި އޭޖީ ރިއްފަތު ސޮއިކުރައްވަނީ
ޔުނައިޓެޑް ނޭޝަންސް ކޮންވެންޝަން އޮން އިންޓަރނޭޝަނަލް ސެޓްލްމަންޓް އެގްރީމަންޓްސް ރިސަލްޓިންގ ފްރޮމް މީޑިއޭޝަން (ސިންގަޕޯ ކޮންވެންޝަން އޮން މީޑިއޭޝަން) ގައި ދިވެހިރާއްޖެއިން ސޮއިކޮށްފި އެވެ.
ސިންގަޕޯ ކޮންވެންޝަން އޮން މީޑިއޭޝަންގައި ސޮއިކުރުމަށް މަޖިލީހުން ރުހުންދީފައިވަނީ އަންގާރަ ދުވަހު އެވެ. ސެޓްލްމެންޓް މުއާހަދާގައި ބައިވެރިވުމަށް ރުހުންދިނުމަށް 74 މެމްބަރަކު ވޯޓުދެއްވި އެވެ.
ސިންގަޕޫރުގައި ބޭއްވި ރަސްމިއްޔާތެއްގައި ރާއްޖޭގެ ފަރާތުން ސޮއިކޮށްފައިވަނީ އެޓަރނީ ޖެނެރަލް (އޭޖީ) އިބްރާހިމް ރިއްފަތު އެވެ. ސޮއިކުރުމުގެ ރަސްމިއްޔާތަށް ފަހު ކުރެއްވި ޓްވީޓެއްގައި އޭޖީ ވިދާޅުވީ، އެ ކޮންވެންޝަންގެ ސަބަބުން ވިޔަފާރީގެ ދާއިރާއިން ފުރުސަތުތަށް ލިބިގެންދާނެ ކަމަށެވެ.
މި މުޢާހަދާއަކީ މީޑިއޭޝަން މެދުވެރިކޮށް ނިންމާ ވިޔަފާރީގެ މައްސަލަތަކުން އުފެދޭ ބައިނަލްއަޤްވާމީ ސެޓްލްމަންޓް އެގްރީމަންޓުތައް، މުޢާހަދާގައި ބައިވެރިވާ ޤައުމުތަކުން ބަލައިގަނެ، އެ ޤައުމުތަކުގައި އެ އެއްބަސްވުންތައް ތަންފީޛުކުރުމުގައި ޤައުމުތަކުގެ މެދުގައި އެއް އުޞޫލުތަކަކާއި އިންތިޒާމްތަކެއް ޤާއިމުކުރުމަށް އެކުލަވާލެވިފައިވާ ބައިނަލްއަޤްވާމީ ޤާނޫނީ އޮނިގަނޑެކެވެ.
ބަންޑާރަ ނައިބްގެ އޮފީހުން ބުނީ ރައްޔިތުންގެ މަޖިލީހުގެ ރުހުމާއެކު މި މުޢާހަދާގައި ދިވެހިރާއްޖެއިން ސޮއިކުރިނަމަވެސް، މި މުޢާހަދާ ތަންފީޛުކުރުމަށްޓަކައި ކަމާބެހޭ ޤާނޫނެއް ބޭނުންވާތީ، އެ މަސައްކަތް އެ އޮފީހުން މިހާރު ފަށާފައިވާނެކަމަށެވެ. އަދި އެ މުޢާހަދާ ތަންފީޛުކުރެވޭނީ އެ ޤާނޫނު ވުޖޫދަށް އައުމަށްފަހު، ފަހުގެ މަރުޙަލާއެއްގައި އެ މުޢާހަދާ ދިވެހިރާއްޖެއިން ތަޞްދީޤުކުރުމަށް ފަހުގައި ކަމަށްވެސް ބަންޑާރަނައިބްގެ އޮފީހުން ބުންޏެވެ.
ބަންޑާރަނައިބްގެ އޮފީހުން ބުނީ ދިވެހިރާއްޖޭގައި ބޭރުގެ އިންވެސްޓްމަންޓްތަކަށް ރައްކާތެރި މާޙައުލެއް ޤާއިމްކުރުމާއި، ކޯޓުން ބޭރުގައި މައްސަލަ ޙައްލުކުރުމުގެ ނިޒާމު ހަރުދަނާކުރުމަކީ މި ސަރުކާރުގެ އަމާޒެއްކަމަށެވެ. އަދި ސިންގަޕޯރ ކޮންވެންޝަން އޮން މީޑިއޭޝަންގައި ދިވެހިރާއްޖެއިން ސޮއިކުރުން ވެގެންދާނީ، އެ އަމާޒަށް ވާސިލްވުމަށް ސަރުކާރުން ކުރަމުންދާ މަސައްކަތްތަކަށް ބޮޑު ކުރިއެރުމެއް ލިބިގެންދާނެ ކަމެއް ކަމަށް ބަންޑާރަ ނައިބްގެ އޮފީހުން ބުންޏެވެ.
