އަޟްހާ އީދު ބަންދާ ދިމާކޮށް އުތީމު ގަނޑުވަރާއި ހުވަދޫ ދާރުލްއާސާރު ހުޅުވަނީ
6 އޯގަސްޓު 2019 | އަންގާރަ 10:51އޯގަސްޓު މަހުގެ 12 އިން 15 އަށް ހުޅުވާނެ
ހއ އުތީމު ގަނޑުވަރަށް ސަރުކާރުގެ ވަފުދެއް ޒިޔާރަތް ކުރެއްވުން
މިއަހަރުގެ އަޟްހާ އީދު ބަންދާއި ދިމާކޮށް އުތީމު ގަނޑުވަރާއި، ހުވަދޫ ދާރުލްއާސާރު ހުޅުވާގޮތަށް މިނިސްޓްރީ އޮފް އާރްޓްސް، ކަލްޗަރ އެންޑް ހެރިޓޭޖުން ނިންމައިފިއެވެ.
އެކަމާ ގުޅޭގޮތުން މިނިސްޓްރީން ކުރި އިއުލާނެއްގައި ބުނީ، 1440 ވަނަ އަހަރުގެ އަޟްހާ އީދު ބަންދުގެ ތެރޭގައި އުތީމު ގަނޑުވަރު އަދި ހުވަދޫ ސަރަހައްދީ ދާރުލްއާސާރު އޯގަސްޓު މަހުގެ 12 އިން 15 އަށް ހުޅުވާގޮތަށް ހަމަޖައްސާފައިވާ ކަމަށާއި، ހެނދުނު 8:15 އިން މެނދުރު 13:30 އަށް އެތަންތަން އާންމުންނަށް ހުޅުވާލާފައި ހުންނާނެ ކަމަށެވެ.
މިނިސްޓްރީން އިތުރަށް ބުނީ، ހައްޖު ދުވަހާއި އަޟްހާ އީދު ދުވަހުގައި ޤައުމީ ދާރުލްއާސާރާއި، އުތީމު ގަނޑުވަރު އަދި ހުވަދޫ ސަރަހައްދީ ދާރުލްއާސާރު ވެސް ބަންދުވާނެ ކަމަށެވެ.
އޭގެ އިތުރުން، އޯގަސްޓް މަހުގެ 18 ވަނަ ދުވަހުން ފެށިގެން ކުރިއެކޭވެސް އެއްގޮތަށް ހުކުރު ދުވަސް ފިޔަވާ އެހެން ދުވަސް ތަކުގައި ހެނދުނު 8:15 އިން 13:30 އަށް އުތީމު ގަނޑުވަރާއި ހުވަދޫ ދާރުލްއާސާރު ހުޅުވާފައި ހުންނާނެ ކަމަށާއި، 10:15 އިން ފެށިގެން 15:30 އަށް ޤައުމީ ދާރުލްއާސާރު ހުޅުވާފައި ހުންނާނެ ކަމަށް މިނިސްޓްރީން ބުނެފައިވެއެވެ.
