ރާއްޖެ ދޫކޮށް ފިއްލަވާވަޑައިގަންނަވަން ޖެހިވަޑައިގަތީ މަރުގެ އިންޒާރުދީ ފުރާާނަ އަށް ނުރައްކާތެރިކަން އޮތުމުން ކަމަށާއި، ރައްޔިތުންގެ މަޖިލީހުގެ މެމްބަރުންގެ އިންޒާރުވެސް ލިބިފައިވާ ކަމަށް ކުރީގެ ނައިބް ރައީސް އަހުމަދު އަދީބް އަބްދުލް އަފޫރު ވިދާޅުވެއްޖެ އެވެ. ރާއްޖެއިން ފިއްލެވުން '' އެއީ ނެގުނު ޑިޒިޝަނެއް'' ކަމަށް އަދީބް ވަނީ ވިދާޅުވެފަ އެވެ.

އާދިއްތަ ދުވަހު ދަންވަރު އަދީބްގެ ބަންދާ މެދު ގޮތެއް ނިންމުމަށް ބޭއްވި ޝަރިޔަތުގެ މަޖިލީހުގައި އޭނާ ވިދާޅުވީ، ޕްރޮސެކިއުޓާ ޖެނެރަލް (ޕީޖީ) އާ ދެމެދު ވެފައިވާ އެއްބަސްވުމުގެ ދަށުން ތަހުގީގަށް ހާޒިރުވެ ބޭނުންވާ މައުލޫމާތު ދެމުންދާތާ ދެ މަސް ދުވަސް ވެފައިވާ ކަމަށާއި، އަބަދުވެސް އެއްބާރުލުން ދެމުން އަންނަ ކަމަށާއި ކުރިޔަތް އޮތްތާގައި ވެސް އެއްބާރުލުން ދެއްވާނެ ކަމަށެވެ.

ފިއްލަވަން މަސައްކަތް ކުރެެއްވީ އެއްވެސް ނިޔަތެއްގައި ތަހުގީގަށް އެއްބާރުލުން ނުދޭން ނޫން ކަމަށް އަދީބުގެ ވަކީލް މަހުފޫޒް ސައީދު ވަނި ކޯޓުގައި ވިދާޅުވެފަ އެވެ. އަދީބް ވިދާޅުވީ، ތަހުގީގަށް ފޯރުކޮށްދޭ މައުލޫމާތުގެ އޮޅުވާލަން ޕީޖީން މަސައްކަތް ކޮށްފައިވާ ކަމަށާއި، ވެފައިވާ އެއްބަސްވުމާއި ހިލާފު ވެފައިވާ ކަމަށެވެ.

އެގޮތުން އެ މައުލޫމާތުތައް އެެހެން ފަރާތްތަތަކަށް ލިބެމުންދާކަން އެނގިވަޑައިގެންފައިވާ ކަމަށެވެ. އެކަމާއި ގުޅިގެން ސަރުކާރުގެ އިސްފަރާތްތަކާއި، ފަނޑިޔާރުންނާއި، ސިޔާސީ އިސްފަރާތްތަކުގެ އިތުރުން މަޖިލީސް މެމްބަރުންގެ އިންޒާރުތައް ލިބެމުންދާ ކަމަށެވެ. އެހެން ނަމަވެސް އެ ބައެއްގެ ނަންތަކެއް އަދީބް ހާމައެއް ނުކުރައްވަ އެވެ.

ދެން އިތުރަށް އަދީބް ނުފިއްލަވާނެ ކަމުގެ ޔަގީންކަން ވަކީލު މަހްފޫޒް ވަނީ ޝަރިއަތުގެ މަޖިލީހުގައި އަރުވާފަ އެވެ. އެގޮތުން އަދީބް ދިރުއުޅުއްވާ ގޭގެ އެޕާޓްމެންޓްގައި ފުލުހުން ބޭތިއްބުމަށް މަހުފޫޒް ވަނީ އެދިވަޑައިގެންފަ އެވެ.