އަދީބް އަދިވެސް ރާއްޖެއެއް ނުގެނެވޭ: ފުލުހުން
ގެނެވޭނެ ވަކި އިރެއް ފުލުހުން ނުުބުނޭ
ކުރީގެ ނައިބް ރައީސް އަހުމަދު އަދީބް
ޓަގު ބޯޓެއްގައި ރާއްޖެއިން ފިއްލަވައިގެން އިންޑިއާއަށް އެތެރެވާން އުޅެނިކޮށް ހައްޔަރުކުރެވުނު ކުރީގެ ނައިބް ރައީސް އަހުމަދު އަދީބު އަދިވެސް ރާއްޖެ ނުގެނެވޭ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލް ވިދާޅުވީ އަދީބް ރާއްޖެ ނުގެނެވޭކަމަށާއި އަދިވެސް އަންނަނީ ދަތުރުކުރަމުން ކަމަށެވެ. ނަމަވެސް އަދީބް ރާއްޖެ ގެނެވޭނެ ވަކިއިރެއް ފުލުހުން ހާމައެއް ނުކުރެއެވެ.
އަދީބު އިންޑިއާއަށް އެތެރެވާން މަސައްކަތްކުރެއްވީ ބުރާސްފަތި ދުވަހުގައެވެ. އަދީބު ތަމްސީލްކުރައްވާ އިނގިރޭސިވިލާތުގެ ވަކީލުންގެ ޓީމުން ވިދާޅުވެފައިވާ ގޮތުން އެމަނިކުފާނު އިންޑިއާއަށް އެތެރެވާން އުޅުއްވީ އެ ގައުމުން ސިޔާސީ ހިމާޔަތް ހޯއްދެއްވުމަށެވެ. އެކަމަކު އިންޑިއާ އިން ވަނީ އެމަނިކުފާނަށް ސިޔާސީ ހިމާޔަތް ނުދެއްވަން ނިންމައި، ހޮނިހިރު ދުވަހު ރާއްޖޭގެ ފުލުހުންނާ ހަވާލުކޮށްފައެވެ.
އަދީބު ރާއްޖެ ގެނެވިފައިވާއިރު ފުލުހުން ވަނީ ހޮނިހިރު ދުވަހުގެ ރޭ އެމަނިކުފާނު ދިރިއުޅުއްވާ ގެކޮޅު ބަލާ ފާސްކޮށްފައެވެ. ފުލުހުން އެކަމާއި ބެހޭ ގޮތުން އިތުރު މައުލޫމާތެއް ހިއްސާ ކޮށްފައި ނުވިޔަސް، އެ ގެ ބަލާ ފާސްކޮށްފައިވަނީ އަދީބް ފިއްލަވައިގެން ވަޑައިގެންނެވި މައްސަލާގެ ހެއްކާ ގަރީނާ ހޯދުމަށް ކަމަށް މައުލޫމާތު ވަނީ ލިބިފައެވެ.
އެޑިޓަރުގެ ނޯޓް:އަދީބް ރާއްޖެ ގެނެސް ދޫނިދޫ ޖަލުގައި ހުންނެވިކަމަށް ހަބަރު ޝާއިރުކުރީ އިތުބާރުހުރި މަސްދަރަކުން އެގޮތަށް މައުލޫމާތުދެއްވުމުންނެވެ. ނަމަވެސް އެފަރާތުން ފަހުން ވަނީ އެއީ މައުލޫމާތު ކުށެއް ކަމަށާއި، މާލެ އާދެވިފައިވަނީ އަދީބް ރާއްޖެ ގެނައުމުގައި ހަރަކާތްތެރިވި އެހެން ޓީމަކަށް ކަމަށް މައުލޫމާތުދީފަ އެވެ.
