ހަނިމާދޫ އެއަރޕޯޓުގައި ވަސީލަތްތައް ތަރައްގީ ވެފައިނުވާތީ ކައުންސިލުން ކަންބޮޑުވުން ފާޅުކޮށްފި
3 އޯގަސްޓު 2019 | ހޮނިހިރު 02:43ނައިބު ރައީސް މާލެ ވަޑައިގެންނެވީ ހުކުރު ދުވަހު
ހަނިމާދޫ ކައުންސިލަރުން ނައިބު ރައީސް ފައިސަލް ނަސީމްއާ އެކު
ހަނިމާދޫ އެއަރޕޯޓު ބައިނަލްއަގްވާމީ އެއަރޕޯޓަކަށް ބަދަލުވި ނަމަވެސް އެފެންވަރުގެ ވަސީލަތްތައް އެއަރޕޯޓުގައި ތަރައްގީވެފައި ނުވާތީ އެ ރަށު ކައުންސިލުގެ ކަންބޮޑުވުން ނައިބް ރައީސް ފައިސަލް ނަސީމްއާ ހިއްސާކުރައްވައިފިއެވެ.
ނައިބު ރައީސް ފައިސަލް ތިލަދުންމަތީ ދެކުނުބުރީގެ ބައެއް ރަށްރަށަށް ބުރާސްފަތި ފެއްޓެވި ދަތުރުފުޅު ނިންމަވާލެއްވުމަށް ފަހު ހުކުރު ދުވަހުގެ ރޭ ވަނީ މާލެ ވަޑައިގެންފައެވެ.
މާލެ ފުރާވަޑައިގަތުމުގެ ކުރިން ނައިބް ރައީސް ވަނީ އެރަށުގެ ޒުވާނުންނާ ހަނިމާދޫ އެއާޕޯޓުގައި ބައްދަލުކުރައްވައި އެފަރާތްތަކުގެ ކަންބޮޑުވުންތައް އަޑުއައްސަވައި، ހައްލު ހޯއްދެވުމަށް މަޝްވަރާ ކުރައްވާފައެވެ.
އޭގެ އިތުރުން މަގުހެދުމުގެ މަޝްރޫއާއި، ބަނދަރު ހެދުމުގެ މަޝްރޫއު އަވަސްކޮށްދިނުމަށް ކައުންސިލުން ވަނީ އެދިފައެވެ. ހޮސްޕިޓަލާއި، އެއަރޕޯޓްގެ މުވައްޒަފުން މަދުވުމުން ދިމާވާ ދަތިތައް ކައުންސިލުން ފާހަގަކުރިއެވެ. އަދި ކުނި މެނޭޖްކުރުމުގައި ދިމާވާ ދަތިތައް އަވަހަށް ހައްލު ކޮށްދިނުމަށް ކައުންސިލުން ވަނީ އެދިފައެވެ.
އެ ރަށަށް ދިމާވެފައިވާ މައްސަލަތަކަށް ހައްލު ހޯއްދަވައިދެއްވުމަށް މަސައްކަތްޕުޅު ކުރައްވާނެކަމުގެ ޔަގީންކަން ނައިބް ރައީސް ވަނީ ދެއްވާފައެވެ.
