ވިލިމާލޭގައި ގްރޫޕް ހަދައިގެން މާރާމާރީ ހިންގައި އާންމު މަސްލަހަތު ނަގާލަން އުޅޭކަމުގެ ތުހުމަތުގައި ނުވަ މީހުން ހައްޔަރުކޮށްފިއެވެ.

މި ނުވަ މީހުން ހައްޔަރުކުރީ ގްރޫޕް ހަދައިގެން ހިންގާ ކުށްތައް ހުއްޓުވުމަށް ވިލިމާލޭގައި ކުރިއަށް ގެންދާ ޚާއްސަ އޮޕަރޭޝަނެއްގެ ތެރެއިންނެވެ.

ފުލުހުން ބުނީ ވިލިމާލޭގައި ދިރިއުޅޭ ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ބަޔަކު އަމަލު ކުރަމުންދާ ކަމުގެ ތުހުމަތުގައި 31 ޖުލައި ވީ ބުދަ ދުވަހުގެ ރޭ 00:10 އެހައިކަންހާއިރު ކޯޓު އަމުރެއްގެ ދަށުން ބަލައި ފާސްކޮށް ނުވަ މީހަކު ހައްޔަރުކޮށްފައިވާ ކަމަށެވެ.

ފުލުހުން ބުނީ މިމައްސަލައާ ގުޅިގެން ހައްޔަރުކޮށްފައިވަނީ 18 އަހަރުގެ ފިރިހެނަކާއި 19 އަހަރުގެ ފިރިހެނަކާއި 20 އަހަރުގެ ތިން ފިރިހެނުންނާއި 21 އަހަރުގެ ދެ ފިިރިހެނުންގެ އިތުރުން 22 އަހަރުގެ ދެ ފިރިހެނުން ކަމަށެވެ. އަދި މި އެންމެންނަކީ ވެސް ދިވެހިން ކަމަށް ފުލުހުން ބުންޏެވެ.

ފުލުހުން ބުނީ މިއޮޕަރޭޝަންގައި، ކުށްތަކަށް މަގުފަހިވާ ގޮތަށް ގްރޫޕް ހަދައިގެން އެއްވެ އުޅޭ ތަންތަން ބަލައިފާސްކުރުމާއި އާންމު ރައްޔިތުންނަށް އުނދަގޫވާގޮތަށް ކުރަމުންދާ ކަންކަން ހުއްޓުވުމަށް ޚާއްސަ މަސައްކަތްތަކެއް ކުރެވިގެންދާނެ ކަމަށެވެ. އަދި މި އޮޕަރޭޝަންގައި ގްރޫޕް ހަދައިގެން އާއްމުކޮށް އެއްވާ ތަންތަން ޚާއްސަ ސަމާލުކަމެއް ދީގެން ބަލަހައްޓައި އެފަދަ ތަންތަން ބަލައި ފާކުރުން ކުރިއަށް ގެންދިއުމަށް ހަމަޖެހިފައިވާ ކަމަށް ވެސް ފުލުހުން މައުލޫމާތުދެއެވެ.

މިއޮޕަރޭޝަނަކީ ކުށްމަދު އަމާންތަނަކަށް ވިލިމާލެ ހެދުމަށް ކުރަމުންދާ މަސައްކަތްތަކުގެ ތެރެއިން ވިލިމާލެ ޕޮލިސް ސްޓޭޝަނާއި ޕޮލިސް އިންޓެލިޖެންސާއި ސްޕެޝަލް އޮޕަރޭޝަންސް ޑިޕާޓްމަންޓް ގުޅިގެން ކުރިއަށް ގެންދާ އޮޕަރޭޝަނެކެވެ.