ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ސަދަން މޯލްޑިވްސް ބިޒްނެސް އެކްސްޕޯގައި ބައިވެރިވެވަޑައިގަތުމަށް ހަމަޖެހިފައިވާކަމަށް ރައްޔިތުންގެ މަޖިލީހުގެ އަމީންއާންމު ފާތުމަތު ނިއުޝާ ވިދާޅުވެއްޖެއެވެ.

އަމީންއާންމު މިހެން ވިދާޅުވެފައި ވަނީ ބުރާސްފަތި ދުވަހުގެ މަޖިލީހުގެ ޖަލްސާގައި ވާހަކަފުޅު ދައްކަވަމުންނެވެ.

ޓައިޓަން މޯލްޑިވްސްގެ ފަރާތުން އިންތިޒާމް ކޮށްގެން ބާއްވާ އެކްސްޕޯއަކީ ރާއްޖެއާއި ރާއްޖެއިން ބޭރުގެ ވިޔަފާރިތަކަށް އަމާޒުކޮށްގެން، ސަދަން މޯލްޑިވްސް ބިޒްނަސް އެކްސްޕޯ ގެ ނަމުގައި ބޭއްވޭ އެކްްސްޕޯއެކެވެ. އެގޮތުން ބުރާސްފަތި ދުވަހުގެ ވަގުތެއްގައި މަޖިލީހުގެ ރައީސް ފުރާވަޑައިގެންފައިވާ ކަމަށް ވެސް އަމީން އާންމު ވިދާޅުވިއެވެ. އެކްސްޕޯ ހުޅުވުމުގެ ރަސްމިއްޔާތުގެ އިތުރުން އެކްސްޕޯގައި ކުރިއަށް ގެންދަން ހަމަޖެހިފައިވާ ފޯރަމް އާއި މަޝްވަރާ ޕެނަލްގައި ބައިވެރިވެ ވަޑައިގެން ވާހަކަފުޅު ދެއްކެވުމަށް ހަމަ ޖެހިފައިވާ ކަމަށް ވެސް ވިދާޅުވިއެެވެ.

ސަދަން މޯލްޑިވްސް އެކްސްޕޯއަކީ ވިޔަފާރިވެރިންގެ މެދުގައި ގުޅުން ބަދަހިކޮށް ވިޔަފާރިތަކުން ދޭ ޚިދުމަތްތައް ދައްކާލުމަށްޓަކާ ބާއްވާ އެކްސްޕޯއެކެވެ. އެކްސްޕޯ ކުރިއަށް ދާނީ އޮގަސްޓް 1 ން އޮގަސްޓް 3 ގެ ނިޔަލަށެވެ. މި އެކްސްޕޯގައި ރިސޯޓު، ގެސްޓް ހައުސް ތަކާއި އެއާރލައިންތައް ހިންގާ ފަރާތްތަކުގެ އިތުރުން ޓުއާރ އޮޕްރޭޓަރުން ވެސް ބައިވެރިވާނެއެވެ.