ޕްރި ސީޒަނުގައި ރެއާލުން އައުޑީ ކަޕްގެ މެޗުތައް ކުޅުނުއިރު ރެއާލްގެ ފޯވާޑް ގެރެތް ބޭލް ހުރީ ގޮލްފް ކުޅެން ކަމަށް މީޑިއާ ރިޕޯޓްތައް ބުނެފިއެވެ.
މީޑިއާ ރިޕޯޓްތައް ބުނާ ގޮތުން އައުޑީ ކަޕްގައި ގެރެތް ބޭލް ރެއާލްގެ ސްކޮޑުން ނުފެންނައިރު، ރެއާލް މެޗު ކުޅުނު ވަގުތު ބޭލް ހުރީ ގޮލްފް ކުޅެންކަމަށެވެ. މިކަމާ ގުޅިގެން ރެއާލްގެ ކޯޗު ޒިދާން ބުނީ ބޭލް އައުޑީ ކަޕްގައި ބައިވެރިނުވީ އޭނާ ފިޓް ނުވުންކަމަށެވެ. މީގެ އިތުރުން ޒިދާން ބުނީ ބޭލް ޕްރެކްޓިސް ކުރަމުން އަންނަ ކަމަށް އޭނާ އުއްމީދު ކުރާކަމަށެވެ.
ރެއާލްގެ ކޯޗާއި ބޭލްގެ ގުޅުން ގޯސްވެފައި ވާއިރު، ގިނަ ބަޔަކު އަންނަނީ ބޭލް ރެއާލްއަށް ކޮށްދިން ކަންތައްތަކަށް ސުކުރު އަދާ ކުރަންޖެހޭ ކަމަށް ބުނަމުންނެވެ.
ރެއާލްއަށް 2013 ވަނަ އަހަރުގެ ސީޒަނުގައި ބަދަލުވި ބޭލް ވަނީ އެ ކްލަބާ އެކު ހަދާފައިވާ އެއްބަސްވުން 2016 ވަނަ އަހަރު 2022 ގެ ނިޔަލަށް އާކޮށްފައެވެ.
ސައުތުހެމްޕްޓަން އިން 2005 ވަނަ އަހަރުގެ ސީޒަނުގައި ކެރިޔަރު ފެށި ބޭލް ވަނީ ޓޮޓެންހަމް ހޮޓްސްޕާއަށް 2007 ވަނަ އަހަރުގެ ސީޒަނުގައި ބަދަލުވެ، އެ ކްލަބުގައި ހަ ސީޒަން ހޭދަކޮށްފައެވެ.
ޓޮޓެންހަމްގެ އެންމެ މޮޅު ޒުވާން ކުޅުންތެރިޔާގެ މަގާމު ދެ ފަހަރު އަދި އެންމެ މޮޅު ކުޅުންތެރިޔާގެ މަގާމު އެއް ފަހަރު ހޯދާފައިވާ ބޭލް ވަނީ އެ ކްލަބަށް ކުޅުނު 203 މެޗުގައި 55 ލަނޑު ކާމިޔާބުކޮށްފައެވެ.
ބޭލް ވަނީ ރެއާލްއަށް މިހާތަނަށް ކުޅުނު 231 މެޗުގައި 102 ލަނޑު ކާމިޔާބުކޮށް، އެ ކްލަބާ އެކު ހަތަރު ޗެމްޕިއަންސް ލީގު، ތިން ޔުއެފާ ސުޕަ ކަޕް، ތިން ކްލަބް ވޯލްޑް ކަޕް، އެއް ސްޕެނިޝް ލީގު، އެއް ކޮޕަ ޑެލްރޭ އަދި އެއް ސްޕެނިށް ސުޕަ ކަޕް ކާމިޔާބުކޮށްފައެވެ.
ވޭލްސްގެ އެންމެ މޮޅު ކުޅުންތެރިޔާގެ މަގާމު ހަ ފަހަރު ހޯދާފައިވާ ބޭލް ވަނީ ގައުމީ ޓީމަށް މިހާތަނަށް ކުޅުނު 77 މެޗުގައި 31 ލަނޑު ކާމިޔާބުކޮށްދީފައެވެ. އޭނާއަކީ ވޭލްސްގެ ގައުމީ ކެޕްޓަންއެވެ.
