ޑެންގީ ހުން ޖެހިގެން ރިޕޯޓްކުރާ މިންވަރުދަނީ އިތުރުވަމުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން ބުނީ ޖޫން މަހާ އަޅާބަލާއިރު ޖުލައި މަހު ޑެންގީ ހުން ޖެހިގެން ރިޕޯޓުކޮށްފައިވާ މިންވަރު އިތުރުވެފައިވާ ކަމަށާއި، ހުން ޖެހިގެން އެންމެ ގިނައިން ރިޕޯޓުކޮށްފައިވަނީ ހދ، ދ، ލ، އަތޮޅުން އަދި މާލެއާ ހުޅުމާލެއިން ކަމަށެވެ.

އެޗްޕީއޭއިން ބުނީ މިއަހަރުގެ މިހާތަނަށް ޑެންގީ ހުން ޖެހިގެން 3195 ކޭސް ރިޕޯޓުކޮށްފައިވާ ކަމަށާއި، ވޭތުވެދިޔަ ދެއަހަރުގެ މިދުވަސްވަރާ އަޅާބަލާއިރު މިއަހަރުގެ މިދުވަސްވަރު ޑެންގީހުން ޖެހިގެން ރިޕޯޓުކުރަމުންދާ އަދަދު ގިނަ ކަމަށެވެ. އަދި ޖޫން މަހާ އަޅާބަލާއިރު ޖުލައި މަހު ރިޕޯޓުކޮށްފައިވާ އަދަދު ވަނީ އިތުރުވެފައިވާ ކަމަށް އެޗްޕީއޭއިން ބުންޏެވެ.

މީގެ އިތުރުން އެޗްޕީއޭއިން ބުނީ ޗިކުންގުންޔާ ޖެހިގެން މިހާތަނަށް އެންމެ ގިނައިން ރިޕޯޓުކޮށްފައިވަނީ ރ، ގއ، އަތޮޅުންނާއި މާލެއިން ކަމަށެވެ.

އެޗްޕީއޭއިން ބުނީ ޗިކުންގުންޔާ ޖެހިގެން މިއަހަރުގެ މިހާތަނަށް 1345 ކޭސް ވަނީ ރިޕޯޓްކޮށްފައިވާ ކަމަށާއި، ޖަނަވަރީ މަހުން ފެށިގެން މޭ މަހުގެ ނިޔަލަށް ޗިކުންގުންޔާ ޖެހިގެން ރިޕޯޓުކޮށްފައިވާ އަދަދު ގިނަ ކަމަށެވެ. ނަމަވެސް ޖޫން މަހު މިއަދަދު ވަނީ ދަށްވެފައިވާ ކަމަށް އެޗްޕީއޭއިން ބުންޏެވެ.