ސީއެސްސީގެ ހަތަރު އޮޑިޓް ރިޕޯޓް ތަޅުމަށް ފޮނުވަން ފާސްކޮށްފި
ތިން ކަމެއް ފާހަގަކޮށްފައިވޭ
އަންގާރަ ދުވަހު ބޭއްވި މާލިއްޔަތު ކޮމިޓީގެ ބައްދަލުވުމުގެ ތެރެއިން
ސިވިލް ސަރވިސް ކޮމިޝަން (ސީއެސްސީ) ގެ 2016،2015،2014 އަދި 2017 ވަނަ އަހަރުގެ އޮޑިޓް ރިޕޯޓް ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކުރުމަށް ފަހު މަޖިލީހުގެ ތަޅުމަށް ފޮނުވުމަށް ނިންމައިފިއެވެ.
އަންގާރަ ދުވަހު ބޭއްވި މާލިއްޔަތު ކޮމިޓީއަށް އޮޑިޓަރ ޖެނެރަލް ހަސަން ޒިޔަތުގެ އިތުރުން އޮޑިޓް އޮފީހުގެ އިސް ބޭފުޅުން ވަނީ ހާޒިރު ކޮށްފައެވެ. އޮޑިޓަރ ޖެނެރަލްގެ އޮފީހުގެ ބޭފުޅުން ވަނީ އެ ރިޕޯޓު ގައި ފާހަގަވެފައި ހުރި ކަންތައްތަކުގެ މައުލޫމާތު މެމްބަރުންނަށް އަރުވާފައެވެ. ދައުލަތުގެ މާލިއްޔަތު ގަވާއިދާ އެއްގޮތަށް ހަރު މުދަލުގެ ރެޖިސްޓަރީ ބަލަހައްޓާފައި ނުވާކަން ފާހަގަ ވެފައިވާ ކަމަށް އޮޑިޓް ޔުނިޓް ޑައިރެކްޓަރ އިބްރާހިމް ފަޒީލް ވިދާޅުވިއެވެ.
އެގޮތުން ރެޖިސްޓަރ ބްރޭންޑް، ސީރިއަލް ނަންބަރު، އެސެޓް ނަންބަރާއި އޭގެ ހާލަތު ފަދަ މައުލޫމާތުތައް ފުރިހަމަ ވެފައިނުވެއެވެ. މިނިވަން ފަރާތަކުން ކޮމިޝަންގެ ސަވައިލެންސް އޮޑިޓެއް ހަދާފައިވާއިރު، އެއަށް ބިޑްކޮށްފައިވާ ފަރާތްތަކަކީ ''ސެޓިފައިޑް'' ބައެއްކަން ވެރިފައިވެފައި ނުވާކަން ފާހަގަވެފައިވާ ކަމަށް ވެސް އޭނާ ވިދާޅުވިއެވެ.
2016 ވަނަ އަހަރުގެ އޮޑިޓް ރިޕޯޓުގައި އެންމެ ބޮޑަށް ފާހަގަކޮށްފައިވަނީ، 34،590 ގެ މަސައްކަތެއް ބިޑަކާ ނުލައި ތިން ބަޔަކަށް ދީފައިވާ މައްސަލައެވެ. ދައުލަތުގެ މާލިއްޔަތު ގަވާއިދު ބުނާ ގޮތުން 25،000 އާއި 1.5 މިލިއަން ރުފިޔާއާ ދެމެދުގެ މަސައްކަތް ހަވާލުކުރެވޭނީ ބިޑްކޮށްގެންނެވެ. އެއީ ސީރިއަސް މައްސަލައެއްގެ ގޮތުގައި ފާހަގަކޮށް ކޮރަޕްޝަނަށް މަގުފަހިވާ ގޮތަށް އަމަލުކޮށްފައިވާ ކަމަށް އޮޑިޓް ރިޕޯޓުގައި ވަނީ ފާހަގަ ކޮށްފައެވެ.
އެ މައްސަލާގައި ކޮމިޓީގެ މެމްބަރުންގެ ހިޔާލު ތަފާތުވިއެވެ. ދާންދޫ ދާއިރާގެ މެމްބަރު ޔައުގޫބް އަބްދުﷲ ހުށައެޅުއްވީ އެކަމުގައި ކޮރަޕްޝަނަށް މަގުފަހިވާ ކަމަށް ގަބޫލުކުރެވޭތީވެ އެ މައްސަލަ އޭސީސީގެ ސަމާލު ކަމަށް ގެނައުމަށެވެ.
އެ ހުށައެޅުމަށް ތާއިދު ކުރައްވާފައިވަނީ ކުޅުދުއްފުށީ އުތުރު ދާއިރާގެ މެމްބަރު ޔާސިރް އަބްދުލް ލަތީފްއެވެ. އައްޑޫ މަރަދޫ ދާއިރާގެ މެމްބަރު އިބްރާހީމް ޝަރީފް ހުށައެޅުއްވީ އޮޑިޓަރ ޖެނެރަލްގެ ރެކޮމޮންޑޭޝަންއާ އެކު ފަސް އޮޑިޓް ރިޕޯޓު މަޖިލީހުގެ ތަޅުމަށެވެ. ހަތަރު މެމްބަރުންގެ ވޯޓާއިއެކު އޮޑިޓް ރިޕޯޓްތައް ތަޅުމަށް ފޮނުވަން ފާސްކުރިއެވެ.
