ޗައިނާގައި ބޭލް ކާމިޔާބު ދުވަސްތަކެއް ހޭދަކުރާނެ: ޑެމްބަލޭ

ރެއާލް މެޑްރިޑުން އެޓީމުގެ ފޯވާރޑް ގެރެތް ބޭލް ޗައިނާގެ ކްލަބަކަށް ވިއްކާލުމުގެ އަޑުތައް ގަދަވެފައި ވާއިރު ޑެމްބަލޭ ބުނީ ޗައިނާގައި ބޭލް ކާމިޔާބު ދުވަސްތަކެއް ހޭދަކުރާނެ ކަމަށެވެ.

މޫސާ ޑެމްބަލޭ ވަނީ ޓޮޓެންހަމްގައި ބޭލް އާއެކު ކާމިޔާބު ދެ ސީޒަން ހޭދަ ކޮށްފައެވެ. ޑެމްބަލޭ ބުނީ ބޭލް ޗައިނާގައި މޮޅަށް ކުޅޭނެ ކަމަށާއި އޭނާއަށް އެ ލީގު ވެގެންދާނީ އެނާގެ ހުނަރު އެންމެ ފުރިހަމަ ގޮތުގައި ދައްކުވައިދޭނެ ލީގަށްކަމަށެވެ. މީގެ އިތުރުން ޑެމްބަލޭ ބުނީ ބޭލް އަކީ މިހާރުވެސް ދެ ކުޅުންތެރިން ނޫނީ ތިން ކުޅުންތެރިން ކައިރިން ބީޓު ކޮށް ލަނޑު ޖަހާ ކުޅުންތެރިއެއް ކަމަށާއި އޭނާ އަށް އެކަމަކީ ވަރަށް ފަސޭހަ ކަމެށް ކަމަށެވެ. މީގެ އިތުރުން އޭނާ ބުނީ ޗައިނާ ލީގަކީ އަގު ބޮޑު ލީގެއް ކަމަށާއި މި ލީގުގައި ކުޅެމުން ޗައިނާގެ ސަގާފަތައް ހޭނިއްޖެނަމަ އެކަން ވެގެންދާނީ ރަނގަޅު ތަޖުރިބާއެއްކަމަށެވެ.

މީޑިއާ ރިޕޯޓްތައް ބުނާ ގޮތުން ރެއާލުން ބޭލް ވިއްކާލުމަށް އުޅެނީ ޗައިނާ ކްލަބެއް ކަމަށްވާ ޖިއާންގްސޫ ސަނިންގް އަށެވެ.

ރެއާލްއަށް 2013 ވަނަ އަހަރުގެ ސީޒަނުގައި ބަދަލުވި ބޭލް ވަނީ އެ ކްލަބާ އެކު ހަދާފައިވާ އެއްބަސްވުން 2016 ވަނަ އަހަރު 2022 ގެ ނިޔަލަށް އާކޮށްފައެވެ.

ސައުތުހެމްޕްޓަން އިން 2005 ވަނަ އަހަރުގެ ސީޒަނުގައި ކެރިޔަރު ފެށި ބޭލް ވަނީ ޓޮޓެންހަމް ހޮޓްސްޕާއަށް 2007 ވަނަ އަހަރުގެ ސީޒަނުގައި ބަދަލުވެ، އެ ކްލަބުގައި ހަ ސީޒަން ހޭދަކޮށްފައެވެ.

ޓޮޓެންހަމްގެ އެންމެ މޮޅު ޒުވާން ކުޅުންތެރިޔާގެ މަގާމު ދެ ފަހަރު އަދި އެންމެ މޮޅު ކުޅުންތެރިޔާގެ މަގާމު އެއް ފަހަރު ހޯދާފައިވާ ބޭލް ވަނީ އެ ކްލަބަށް ކުޅުނު 203 މެޗުގައި 55 ލަނޑު ކާމިޔާބުކޮށްފައެވެ.

ބޭލް ވަނީ ރެއާލްއަށް މިހާތަނަށް ކުޅުނު 231 މެޗުގައި 102 ލަނޑު ކާމިޔާބުކޮށް، އެ ކްލަބާ އެކު ހަތަރު ޗެމްޕިއަންސް ލީގު، ތިން ޔުއެފާ ސުޕަ ކަޕް، ތިން ކްލަބް ވޯލްޑް ކަޕް، އެއް ސްޕެނިޝް ލީގު، އެއް ކޮޕަ ޑެލްރޭ އަދި އެއް ސްޕެނިށް ސުޕަ ކަޕް ކާމިޔާބުކޮށްފައެވެ.

ވޭލްސްގެ އެންމެ މޮޅު ކުޅުންތެރިޔާގެ މަގާމު ހަ ފަހަރު ހޯދާފައިވާ ބޭލް ވަނީ ގައުމީ ޓީމަށް މިހާތަނަށް ކުޅުނު 77 މެޗުގައި 31 ލަނޑު ކާމިޔާބުކޮށްދީފައެވެ. އޭނާއަކީ ވޭލްސްގެ ގައުމީ ކެޕްޓަންއެވެ.