ޖޭއެސްސީއަށް ގާނޫނީ ވަކީލަކު ހޮވުމަށް ބާއްވާ އިންތިޚާބު ފަށައިފި
27 ޖުލައި 2019 | ހޮނިހިރު 08:04ހަވީރު 5:00 އާ ހަމައަށް ވޯޓުލުން ކުރިއަށްދާނެ
ގާނޫނީ ވަކީލަކު ހޮވުމަށް ބާއްވާ އިންތިޚާބުގެ ތެރެއިން
ޖުޑީޝަލް ސަރވިސް ކޮމިޝަން (ޖޭއެސްސީ)އަށް ގާނޫނީ ވަކީލަކު ހޮވުމަށް ބާއްވާ އިންތިޚާބު ފަށައިފިއެވެ.
މިއިންތިޚާބުގެ ވޯޓުލުން ހޮނިހިރު ދުވަހުގެ ހެނދުނު 09:00 ގައި ފެށުމަށް ހަމަޖެހިފައިވީ ނަމަވެސް ވޯޓުލުން ފެށިފައިވަނީ 09:20 ގައެވެ. މިއިންތިހާބު ކުރިއަށް ދަނީ މާލެސިޓީ އާއި އައްޑޫ ސިޓީގައެވެ.
އިލެކްޝަން ކޮމިޝަން (އީސީން) ބުނީ ވޯޓު ނެގުން ލަސްވީ މީހަކު ވޯޓު ލާން ނާންނާތީ ކަމަށެވެ. އެގޮތުން މާލޭގެ އެއްނަންބަރު ވޯޓު ފޮއްޓަށް 09:20ގައި 02 ނަންބަރު ވޯޓު ފޮއްޓަށް 09:53 ގައި ވޯޓުލުން ފެށިފައިވާ ކަމަށް އީސީން ބުންޏެވެ. އަދި އައްޑޫ ސިޓީގެ އެއްނަންބަރު ވޯޓު ފޮއްޓަށް ވޯޓުލުން ފެށުނީ 10:30 ގައި ކަމަށެވެ.
މާލެ ސިޓީ އެއްނަންބަރު ވޯޓު ފޮއްޓަށް 790 ވަކީލަކު ވޯޓުލުމަށް ރަޖިސްޓްރީވެފައިވާއިރު، 11:00 އާ ހަމައަށް ވޯޓު ލާފައިވަނީ 24 ވަކީލުންނެވެ. ދެވަނަ ނަންބަރު ވޯޓު ފޮއްޓަށް 688 ވަކީލުން ރަޖިސްޓްރީ ވެފައިވާއިރު، ވޯޓުލާފައިވަނީ 28 ވަކީލުންނެވެ. އަދި އައްޑޫސިޓީގެ އެއްނަންބަރު ވޯޓު ފޮއްޓަށް 9 ވަކީލުން ރަޖިސްޓްރީވެފައިވާއިރު، ވޯޓުލާފައިވަނީ 2 ވަކީލުންނެވެ.
މި އިންތިހާބަށް ހަ ވަކީލަކު ކުރިމަތިލެއްވިއެވެ. ނަމަވެސް މީގެ އެއް ވަކީލެއްގެ ކެންޑިޑެސީ ބާތިލްވުމާއެކު މިހާރު އިންތިޚާބުގައި ވާދަކުރައްވަނީ ފަސް ވަކީލުންނެވެ.
މިއިންތިޚާބުގައި ވާދަކުރައްވާ ފަސް ވަކީލުންނަކީ އަލީ ރަޝީދާއި އަބްދުލްމާނިއު ހުސައިނާއި އަހުމަދު ރަޝީދު ހުސައިނާއި އަބްދުލްއަޒީޒް ޖަމާލް އަބޫބަކުރާއި ހަނީފާ ޚާލިދުގެ އިތުރުން އަބްދުލްހަންނާނު އަހުމަދެވެ.
ހޮނިހިރު ދުވަހުގެ ހަވީރު 5:00އާ ހަމައަށް ވޯޓުލުން ކުރިއަށްދާއިރު، ވޯޓު ގުނަން ފަށާނީ ހަމަ އެދުވަހު ވޯޓު ނަގާ ނިމޭތާ 30 މިނެޓު ފަހުންނެވެ. އަދި ދެވަނަ ބުރަކަށް ވޯޓުލާންޖެހޭ ހާލަތުގައި ފިޔަވައި، މިއިންތިޚާބުގެ ރަސްމީ ނަތީޖާ އިއުލާން ކުރުމަށް ހަމަޖެހިފައިވަނީ މިމަހުގެ 28 ވާ އާދީއްތަ ދުވަހު ކަމަށް ވެސް ބާ ކައުންސިލުން މައުލޫމާތުދެއެވެ.
ޖޭއެސްސީގައި ވަކީލުންގެ ތެރެއިން އައްޔަން ކުރައްވާ ވަކީލަކަށް ކުރިން އިންނެވީ ލަތީފާ ގާސިމެވެ. ނަމަވެސް ގާނޫނީ ފަންނުގެ ބިލް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރެއްވުމާ ގުޅިގެން އޭނާގެ މަގާމު މިދިޔަ ޖޫން މަހުގެ 27 ވަނަ ދުވަހު ވަނީ ގެއްލިފައެވެ.
