ވޯޓު އަނބުރާ ގެންދިޔައީ ހުރިހާ މެމްބަރުން ވަކި ނުކުރާތީ: މީކާއިލް
25 ޖުލައި 2019 | ބުރާސްފަތި 14:06ޝަހީބް އާއި ޒީނާ ވަކިކުރަން ނިންމީ ހުރިހާ މެމްބަރުންގެ އިއްތިފާގުން
މީކާއިލް ނަސީމް
ބްރޮޑްކާސްޓިން ކޮމިޝަންގެ މެމްބަރު ޒީނާ ޒާހިރު ފިޔަވާ އެހެން މެމްބަރުން ވަކިކުރަން ބުދަ ދުވަހު ބޭއްވި މިނިވަން މުއައްސަސާތަކާއި ބެހޭ ކޮމިޓީގައި، ވޯޓު ދެއްވުމަށްފަހު އަނބުރާ ގެންދެވީ ހުރިހާ މެމްބަރުން ވަކި ނުކުރާތީ ކަމަށް ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.
ބުދަ ދުވަހު ބޭއްވި މިނިވަން މުއައްސަސާތަކާއި ބެހޭ ކޮމިޓީގައި ޒީނާ ފިޔަވާ ހުރިހާ މެމްބަރުން ވަކިކުރަން ކޮމިޓީގައި ވޯޓަށް އެހުމުން އަތް ނެންގެވުމަށް ފަހުން މީކާއިލް ވިދާޅުވީ، ވޯޓު ނުދެއްވާ ކަމަށެވެ.
ކޮމިޓީގެ މުގައްރިރު އައްޑޫ މީދު ދާއިރާގެ މެމްބަރު ރޮޒައިނާ އާދަމްއާ އެކު އެ ކޮމިޓީގައި 11 މެމްބަރުން ތިއްބެވިއެވެ. މީކާއިލްގެ ވޯޓު އަނބުރާ ގެންދެވުމުން ވޯޓު ބާތިލްވިކަމަށް މުގައްރިރު ނިންމެވިއެވެ. ޒީނާ ފިޔަވާ އެހެން މެމްބަރުން ވަކިކުރަން ނިންމެވީ ޒީނާ ހުރީ މެޓާނިޓީ ލީވްގައި ކަމަށް އޭނާ މަޖިލީހުގެ އިދާރާ އަށް ސިޓީ އެއް ފޮނުވާފައިވާތީއެވެ.
އެކަމާއި ބެހޭ ގޮތުން ރާއްޖެ.އެމްވީއަށް މީކާއިލް ވިދާޅުވީ، ސަބް ކޮމިޓީގެ ރިޕޯޓުން ދައްކާ ގޮތުން އެންމެ ބޮޑަށް ގޯސް ހައްދަވާފައި ވަނީ ކޮމިޝަންގެ ރައީސް މުހައްމަދު ޝަހީބް އާއި ނާއިބް ރައީސް ފަތިމަތު ޒައިނާއެވެ. އެ ނިންމުމަކީ އެއްވެސް އިރަކު އެއްބަސްވެ ނުވަތަ ތާއިދުކޮށްފައިވާ ނިންމުމެއް ނޫން ކަމަށް މީކާއިލް ވިދާޅުވިއެވެ.
މީކައިލް ދެކެވަޑައިގަންނަވާ ގޮތުން އެ ކޮމިޝަންގެ ހުރިހާ މެމްބަރުންވެސް ވަކިކުރަން ޖެހެއެވެ.
އެންމެ ފަހުން ކޮމިޓީގެ މެމްބަރުންގެ އިއްތިފާގުން ނިންމާފައި ވަނީ ބްރޮޑްކޮމްގެ ރައީސްއާ ނައިބް ރައީސް ވަކި ކުރުމަށެވެ.
ބްރޮޑްކޮމްއަކީ ހަތް މެމްބަރުންގެ މައްޗަށް އެކުލެވިގެންވާ ކޮމިޝަނެކެވެ. ކޮމިޝަންގެ ދެ މެމްބަރުން ކަމަށްވާ އިސްމާއިލް ސޮފްވާން އާއި ހަސަން ނަބާހު ވަނީ އިސްތިއުފާދެއްވާފައެވެ.
އެއާއި އެކު ކޮމިޝަންގައި މިހާރު ތިއްބަވާ ފަސް މެމްބަރުންގެ ތެރެއިން ޝަހީބު އާއި ޒައިނާ ވަކިކުރުމުން ތިއްބަވާނީ ތިން މެމްބަރުންނެވެ. އެއީ ޒީނާ ޒާހިރު އާއި އަމްޖަދު ވަހީދުގެ އިތުރުން އާމިނާތު ސަރާޙު އިއްޒަތުއެވެ.
