އިމްފޮމޭޝަން ކޮމިޝަނަރުގެ މަގާމަށް 4 ފަރާތެއްގެ ނަން މަޖިލީހަށް ފޮނުވައިފި އެވެ.
ރައީސް އޮފީހުގެ ތަރުޖަމާނު އިބްރާހިމް ހޫދް ވިދާޅުވީ މި މަޤާމަށް ނަން ހުށަހެޅުމުގެ މުއްދަތު ހަމަވިއިރު ނަން ހުށަހަޅާފައި ވަނީ ނުވަ ފަރާތަކުން ކަމަށެވެ. އޭގެތެރެއިން ރައީސް އިބްރާހިމް މުހައްމަދު ސޯލިހަށް ފެނިވަޑައިގަންނަވާ 4 ފަރާތެއްގެ ނަން ރައްޔިތުންގެ މަޖިލީހަށް ފޮނުވާފައިވަނީ ބުރާސްފަތި ދުވަހުކަމަށް ހީދު ވިދާޅުވި އެވެ. ނަމަވެސް ނަންތަކުގެ ތަފްސީލެއް ހާމައެއް ނުކުރައްވަ އެވެ.
ޤާނޫނު ބުނާގޮތުން މަޤާމަށް ކުރިމަތިލުމަށް ހުޅުވާލުމުން ކުރިމަތިލާ ފަރާތްތަކުގެ ތެރެއިން ނަން މަޖިލީހަށް ފޮނުވުމުން އެންމެ އަވަހަށް ބާއްވާ މަޖިލިހުގެ ޖަލްސާއަކަށް އެ ނަންތައް އިއްވާނެ އެވެ. އަދި އެޔަށްފަހު ނަންތައް ދިރާސާކުރުމަށް ރައްޔިތުންގެ މަޖިލީހުގެ ކަމާއިގުޅުންހުރި ކޮމެޓީއަށް ފޮނުވާނެ އެވެ.
މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ ޖުލައި މަހުގެ 10 ވަނަ ދުވަހުއެވެ.
އިމްފޮމޭޝަން ކޮމިޝަނަރުގެ މަގާމްގެ މުއްދަތު ޖުލައި މަހުގެ 22 ގައި ވަނީ ހަމަވެފައެވެ. އޭގެ ސަބަބުން އެ މަޤާމު ވަނީ ޤާނޫނީ ހުސްކަމެއްގެ ތެރެއަށް ގޮސްފަ އެވެ.
