ރަޝިޔާއަށް 90 ދުވަހުގެ އޮން އެރައިވަލް ވިސާ ދޫކުރަނީ
25 ޖުލައި 2019 | ބުރާސްފަތި 07:53އެއްބަސްވުމުގައި ސޮއިކޮށްފައިވަނީ މިދިޔަ މަހުގެ 26 ވަނަ ދުވަހު
އަބްދުﷲ ޝާހިދު ރަޝިޔާގެ ފޮރިން މިނިސްޓަރ ސާގޭ ލަވްރޮވް އާއި އެކު
ރަޝިޔާއަށް ދަތުރުކުރާ ދިވެހިންނަށް 90 ދުވަހުގެ އޮން އެރައިވަލް ވިސާ ހަމަޖައްސައިދޭން ފަށައިފިއެވެ.
ރަޝިޔާއަށް ދަތުރުކުރާ ދިވެހިންނަށް އޮން އެރައިވަލް ވިސާގެ ގޮތުގައި 90 ދުވަސް ހަމަޖައްސައިދިނުމާއި ގުޅޭ އެއްބަސްވުމުގައި ސޮއިކޮށްފައިވަނީ މިދިޔަ މަހު، ފޮރިން މިނިސްޓަރ އަބްދުﷲ ޝާހިދު ރަޝިޔާއަށް ކުރެއްވި ދަތުރުފުޅުގެ ތެރެއިންނެވެ.
މި ދަތުރުފުޅުގައި ރަޝިޔާ އާއި ރާއްޖޭގެ ގުޅުން ބަދަހިކުރުމާއި ގުޅޭ އެއްބަސްވުންތަކެއްގައި ވަނީ ސޮއިކޮށްފައެވެ. އޭގެ ތެރޭގައި ރަޝިޔާއަށް ދަތުރުކުރާ ދިވެހިންނަށް 90 ދުވަހުގެ އޮން އެރައިވަލް ވިސާ ދޫކުރުމާއި ބެހޭ އެއްބަސްވުމެއްގައި ވަނީ ސޮއި ކޮށްފައެވެ. އެ އެއްބަސްވުމަށް އަމަލުކުރަން ފަށާގޮތަށް އޮތީ އެއްބަސްވުމުގައި ސޮއި ކުރާތާ 30 ދުވަސްފަހުންނެވެ. އެއްބަސްވުމުގައި ސޮއިކޮށްފައިވަނީ މިދިޔަ މަހުގެ 26 ވަނަ ދުވަހުއެވެ. އެ އެއްބަސްވުމުގައި ސޮއިކުރިތާ 30 ދުވަސް ހަމަވާނީ 25 ޖުލައިގައެވެ. މި އެއްބަސްވުމުގެ ދަށުން ދެ ގައުމުގެ ރައްޔިތުންނަށް ވެސް 90 ދުވަހުގެ މުއްދަތަށް އޮން އެރައިވަލް ވިސާ ލިބިގެން ދާނެއެވެ.
ވިސާ ދިނުމުގެ އެއްބަސްވުމުގައި ރާއްޖޭގެ ފަރާތުން ސޮއިކުރައްވާފައިވަނީ ފޮރިން މިނިސްޓަރ އަބްދުﷲ ޝާހިދުއެވެ. ރަޝިޔާގެ ފަރާތުން އެއްބަސްވުމުގައި ސޮއި ކުރެއްވީ އެ ގައުމުގެ ފޮރިން މިނިސްޓަރ ސާގޭ ލަވްރޮވްއެވެ. މި އެއްބަސްވުމުގެ ދަށުން ވިސާގެ ކަންތަކުގައި ރަޝިޔާގެ ރައްޔިތުންނަށް ވެސް އެ ލުއި ފަސޭހަ ލިބިގެންދާނެއެވެ.
އޮން އެރައިވަލް 90 ދުވަހުގެ ވިސާ ކިޔެވުމަށާއި، ވިޔަފާރީގެ ބޭނުމަށް އެ ގައުމަށް ދަތުރުކުރައްވާ ފަރާތްތަކަށް ލިބިގެން ނުދާނެއެވެ.
