ގޭންގުތައް ޕްރޮމޯޓުވާގޮތަށް ކުޅިވަރުތަކުގައި ބައިވެރިވުން މަނާކުރަނީ

އެކި ނަންނަމުގައި ހަރަކާތްތެރިވާ ގޭންގުތައް ޕްރޮމޯޓުވާގޮތަށް މަދަނީ ހަރަކާތްތަކުގައާއި، ކުޅިވަރުތަކުގައި ބައިވެރިވުން މަނާކުރުމުުގެ މަސައްކަތް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ފަށައިފިއެވެ.

ބުދަ ދުވަހު އޮތް ކޮމިޓީ ބައްދަލުވުމުގައި މި ހުށައެޅުން ހުށައެޅުއްވީ ދަނގެތީ ދާއިރާގެ މެމްބަރު މުހައްމަދު ނާޒިމްއެވެ. އެގޮތުން ނާޒިމް ވިދާޅުވީ، ގޭންގްތަކުގެ މައްސަލައަކީވެސް ކުޑަކުދިންގެ ނާޖާއިޒް މަންފާ ނެގުމާއި، ކުށްތަކުގައި ކުޑަކުދިން ބައިވެރިވުމަށް މަގުފަހިވާ ކަމެއް ކަމަށެވެ. އަދި ސުކޫލު ފެންވަރުގައާއި ރަށުފެންވަރުގައިވެސް އެއްވެސް ގޭންގެއްގެ ނަމުގައި ކުޅިވަރުތަކުގައި ބައިވެރިވުން މަނާކުރަން ޖެހޭ ކަމަށް އޭނާ ވިދާޅުވި އެވެ.

Advertisement

މި ހުށައެޅުމަށް ތާއީދު ކުރައްވަމުން މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިިދާޅުވީ، ގޭންގު ކުށްތައް މަނާ ކުރުމުގެ ޤާނޫނެއް އޮންނަ ކަމަށާއި، ނަމަވެސް ނަން މަޝްހޫރު ގޭންގުތައް ގިނަ ފަހަރު ރަޖިސްޓްރީވެފައި އޮންނަނީ ޤާނޫނާއި އެއްގޮތަށް ކޮންމެވެސް މަދަނީ ޖަމިއްޔާއެއް ނުވަތަ ރެކްރިއޭޝަނަލް ކްލަބެއްގެ ގޮތުގަައި ކަމަށެވެ. އަދި އޭގެ ސަބަބުން ފިޔަވަޅު އެޅުމަށް ދަތިވާ ކަމަށާއި، ނަމަވެސް އެއީ އަވަސް ހައްލެއް ބޭނުންވާ ކަމެއް ކަމަށްވެސް އިންތި ވިދާޅުވިއެވެ.

އެގޮތުން ކޮމިޓީ ބައްދަލުވުމުގައި އިންތި ވަނީ ކޮމިޓީއަށް ފުލުހުން ހާޒިރުކޮށް، ގޭންގް ވައޮލެންސް ގައި ބައިވެރިވާކަން ފާހަގަވެފައި ހުންނަ ޖަމާއަތްތައް ފާހަގަކޮށް، ފުލުހުން މެދުވެރިކޮށް އެފަދަ ޖަމާއަތްތައް ދެނެގަތުމުގެ މަސައްކަތް ކުރުމަށް ހުށައަޅުއްވާފައެވެ. އަދި މި ހުށައެޅުމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވަނީ ތާއީދު ކުރައްވާފައެވެ. އެގޮތުން ރޮޒެއިނާ ވިދާޅުވީ، ކްލަބެއް ނުވަތަ މަދަނީ ޖަމިއްޔާއެއްގެ ނިވާފަތްގަނޑުގައި އޮވެގެން ގޭންގުތައް އޮޕަރޭޓް ކުރުން ހުއްޓުވައި އެކަމަށް އަވަސް ހައްލެއް ގެންނަންޖެހޭ ކަމަށެވެ.

މި ކޮމިޓީ ސިއްރުކޮށްގެން ކުރިއަށް ގެންދެވިދާނެ ކަމަށާއި، އިޖުތިމާއީ ކޮމިޓީން ބައިވެރިވާން އެދޭނަމަ އެ ފުރުސަތު ދޭނެ ކަން ކޮމިޓީން ވަނީ ފާހަގަކޮށްފައެވެ.

މި ހުށައެޅުމާ ގުޅޭގޮތުން ވާހަކަދައްކަވަމުން ނިލަންދޫ ދާއިރާގެ މެމްބަރު އަބްދުލް މުޙުސިން ހަމީދު (ޖޭފޯ) ވިދާޅުވީ، 2015 ވަނަ އަހަރު ކުޅިވަރުގެ ޤާނޫނު ވުޖޫދުވިފަހުން އެއްވެސް ކުޅިވަރު ޖަމިއްޔާއެއް އުފައްދާނަމަ ރަޖިސްޓްރީ ކުރަން ޖެހޭ ކަމަށާއި، ވީމާ ރަޖިސްޓްރީކޮށް ނަން ފާސް ކުރުމުގެ މަރުހަލާގައި މި މައްސަލައަށް ހައްލެއް ހޯދުމަށް ކުރިއަށް އޮތް ތަނުގައި މަސައްކަތް ކުރެވިދާނެ ކަމަށެވެ.

މި ހުށައެޅުންތަކާ ގުޅޭގޮތުން ކޮމިޓީން މަޝްވަރާކޮށް ، ރާއްޖޭގައި އޮޕަރޭޓް ކުރާ ގޭންގްތައް މަދަނީ ޖަމިއްތާ ނުވަތަ ކުޅިވަރު ކްލަބު ތަކުގެ ގޮތުގައި ބޭނުން ކުރުން ހުއްޓުވުމަށްޓަކައި އެކަން ހޯމް މިނިސްޓްރީއާއި، މިނިސްޓްރީ އޮފް ޔޫތް، ސްޕޯރޓްސް އެންޑް ކޮމިއުނިޓީ އެމްޕަވަރމަންޓް އަށް ހުށައެޅުމަށާއި، އެފަދަ ކަންކަން ގާތުން ބަލައި ފިޔަވަޅު އެޅޭނެ ނިޒާމެއް ޤާއިމުކޮށްދިނުމަށް އެ މުއައްސަސާތަކުގެ ކިބައިން އެދުމަށް ކޮމިޓީގެ މެމްބަރުންގެ އިއްތިފާޤުން ވަނީ ފާސްކޮށްފައެވެ.