ކުނި މެނޭޖް ކުރާ ނިޒާމް ބަދަލު ކުރަން ޖެހޭ : ފަރުދީ ޒިންމާ މުހިންމު!
ދައުލަތުން ކުނި މެނޭޖް ކުރުމަށް ހޭދަކުރެވުނު މިންވަރު ހޯދުމަށް ވަނީ އެދިފައި
އެންވަޔަރަމަންޓް އެންޑް ކުލައިމެޓް ޗޭންޖް ކޮމިޓީ
ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ކުނި މެނޭޖް ކުރުމަށް ގެންގުޅޭ ނިޒާމް ބަދަލު ކުރަންޖެހޭ ކަމަށާއި ކުނި މެނޭޖް ކުރުމުގައި ފަރުދީ ޒިންމާ އަދާ ކުރަން ޖެހޭ ކަމަށް އެންވަޔަރަމަންޓް އެންޑް ކުލައިމެޓް ޗޭންޖް ކޮމިޓީގެ މެންބަރުން ވިދާޅުވެއްޖެ އެވެ.
އަންގާރަ ދުވަހު ބޭއްވި ކޮމިޓީގެ ބައްދަލުވުމުގައި ކުނި މެނޭޖް ކުރުމާއި ގުޅޭ ގޮތުން މިނިސްޓްރީ އޮފް އެންވަޔަރަމަންޓާއި އީޕީއޭ އާއި އެލްޖީއޭ އަދި ވެމްކޯއިން ފޮނުވި ލިޔުންތަކާއި ގުޅޭ ގޮތުން މެންބަރުން ވަނީ މަޝްވަރާ ކުރައްވާފައެވެ.
މި ބައްދަލުވުމުގައި މައްޗަންގޮޅި ދެކުނު ދާއިރާގެ މެންބަރު އަހުމަދު ހައިތަމް ވިދާޅުވީ ކުނި މެނޭޖް ކުރުމުގައި އެންމެ ބޮޑު މައްސަލައަކަށް ވަނީ ފަރުދީ ޒިންމާ އަދާނުކުރެވުން ކަމަށެވެ. އަދި ސްކޫލްތަކުން ކުދިން ޓްރެއިން ކޮށްފައި ތިބި ކަމުގައި ވިޔަސް ބެލެނިވެރިންނަކީ އެކަމަށް ހޭލުންތެރު ނުވާ ބައެއް ކަމުގައި ވާނަމަ އެކަން އަށަނުގަނެވޭނެ ކަމަށް ވެސް ހައިތަމް ފާހަގަކުރެއްވިއެވެ. ހައިތަމް ވިދާޅުވީ ކިތަންމެ ވަރަކަށް ބަޖެޓް ދީގެން ކަންކަން ކުރިކަމުގައި ވީނަމަވެސް ދައްކަން ޖެހެނީ ވޭތިވެދިޔަ ފަސް އަހަރު ތެރޭގައި ހިނގި ކަންތައް ކަމަށެވެ.
ހައިތަމް ވިދާޅުވީ ކުނި މެނޭޖް ކުރުމުގައި އެންމެ ބޮޑު ކަމަކީ ފަރުދީ ޒިންމާ އަދާ ކުރުމާއި އީޕީއޭ މިނިވަން ކުރުމުގެ އިތުރުން ހޭލުންތެރިކުރުމުގެ ޕްރޮގްރާމްތައް ހިންގުން ކަމަށެވެ.
މަޑަވެލި ދާއިރާގެ މެންބަރު ހުސައިން ފިރުޝާން ވިދާޅުވީ ވެމްކޯއިން ކުނި މެނޭޖް ކުރުމަށް ގެންގުޅޭ ނިޒާމް ބަދަލުކުރަން ޖެހޭ ކަމަށެވެ. ފިރުޝާން ވިދާޅުވީ ހުރިހާ ކުންޏެއް އެއްކޮށް ގެންގޮސް އެންދުމަކީ ރައްކާތެރި ގޮތެއްގައި ކުނި ނައްތާލުން ނޫން ކަމަށެވެ.
ކުނި ރައްކާތެރި ގޮތެއްގައި ނައްތާލާނަމަ އެކުނި ބައިބައި ކުރަން ޖެހޭނެ ކަމަށާއި އެއްކޮށް ހުރިހާ ކުންޏެއް އަންދައިގެން އެޓްމޮސްފިއާ ތެރެއަށް ވިހަ ގޭސްތައް ދޫކުރެވޭ ކަން ވަނީ ފިރުޝާން ފާހަގަކުރައްވައިފައެވެ. ވިހަ ގޭހުގެ ސަބަބުން ނުރައްކާތެރި ބަލިތައް ޖެހުމަށް މަގުފަހިވާކަމަށް ވެސް އޭނާ ވިދާޅުވިއެވެ. ވެމްކޯ ރަށްރަށުގައި ފުޅާ ކުރުމަކީ ވަރަށް ބޮޑު ގޯހެއް ކަމަށާއި އެކަން ނުކުރުމަށް ފިރުޝާން ވަނީ ދިވެހި ސަރުކާރަށް ގޮވާލާފައެވެ.
މިމައްސަލައާ ގުޅިގެން އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވީ ކުނި މެނޭޖް ކުރުމުގައި ޚާއްސަ މަސައްކަތެއް ފަށަން ޖެހޭ ކަމަށެވެ. އަދި ކުނި މެނޭޖް ކުރުމަށް އެންވަޔަރަމަންޓް މިނިސްޓީން ވެސް އިޕީއޭއިން ވެސް ރަށެއްގެ ކައުންސިލްގެ އޮނިގަނޑުގެ ތެރޭގައި އެންމެ މުވައްޒަފަކުވެސް ހިމަނާފައި ނުވާކަމަށް ވިދާޅުވެ ވައްޑެ ކަންބޮޑުވުން ފާޅުކުރެއްވިއެވެ.
އެންވަޔަރަމަންޓް އެންޑް ކްލައިމެޓް ކޮމިޓީއަކީ މަޖިލިސްގެ ތެރެއިން ޤާނޫނީ ހައްލެއް ތިމާވެއްޓަށް ހޯދުމަށް އެކުލަވާލެވިފައިވާ ކޮމިޓީއެއްކަން ފާހަގަ ކުރައްވާ ވައްޑެ ވިދާޅުވީ ރާއްޖޭގައި ހެދޭ ހުރިހާ ޤާނޫނެއްގައި ތިމާވެއްޓާއި ބެހޭ ކޮމްޕޯނެންޓެއް ހިމެނުމަށްޓަކައި މަސައްކަތް ކުރަން ޖެހޭ ކަމަށް ވައްޑެ ވިދާޅުވިއެވެ.
އަންގާރަ ދުވަހު ބޭއްވި ކޮމިޓީގެ ބައްދަލުވުމުގައި މުއައްސަސާތަކުން ފޮނުވާފައިވާ މައުލޫމާތާއި ގުޅޭގޮތުން މެންބަރުން މަޝްވަރާ ކުރެއްވުމަށް ފަހު އިތުރަށް ބޭނުންވާ ކަމަށް ފާހަގަ ކުރެއްވި މައުލޫމާތުތައް ހޯއްދެވުމަށް މަޖިލީހުގެ ފަރާތުން މުއައްސަސާތަކަށް އަލުން ފޮނުއްވުމަށް ވަގުތު ދެއްވުމަށް ވަނީ ނިންމާފައެވެ. މެންބަރުން އިތުރަށް ހޯދަން އެދިފައިވާ މައުލޫމާތަކީ
· ދައުލަތުން ކުނި މެނޭޖް ކުރުމަށް ހޭދަކުރެވުނު މިންވަރު
· ރާއްޖޭގައި ވޭސްޓް އޮޑިޓެއް ހެދިފައިވާނަމަ އެ މައުލޫމާތު
މިސަރުކާރުގެ ވައުދުތަކުގެ ތެރޭގައި ކުނިން އާމްދަނީ ހޯދުމާއި ކަރަންޓު އުފެއްދުން ހިމެނިފައިވެއެވެ. މިމަސައްކަތުގެ ތެރެއިން ރ.ވަނދޫގައި ގާއިމްކޮށްފައިވާ ވޭސްޓް މެނޭޖްމަންޓް ސެންޓަރުން ވަނީ ރާއްޖޭގައި ފުރަތަމަ ފަހަރަށް ކުނިން ކަރަންޓު އުފައްދާފައެވެ.
