އިންޓަރނޭޝަނަލް ޗެމްޕިއަންސް ކަޕް: ޓޮޓެންހަމުން ޔުވެންޓަސް ބަލިކޮށްފި

އިންޓަރނޭޝަނަލް ޗެމްޕިއަންސް ކަޕުގައި ޓޮޓެންހަމް އަދި ޔުވެންޓަސް ވާދަކުރި މެޗު ޓޮޓެންހަމުން ކާމިޔާބުކޮށްފިއެވެ.

މި މެޗު ޓޮޓެންހަމުން ކާމިޔާބުކުރީ 3-2 ގެ ނަތީޖާއަކުންނެވެ. މެޗުފަށައިގެން ލަމޭލާ ޖަހައިދިން ލަނޑާއިއެކު ޓޮޓެންހަމްއިން މެޗުގެ ލީޑު ނެގިއެވެ. ހަމަހަމަ ކުޅުމެއް ފެނިގެންދިޔަ ފުރަތަމަ ހާފު ނިމިގެން ދިޔައީ ޓޮޓެންހަމް ކުރީގައި އޮވެގެންނެވެ.

މެޗުގެ ދެވަނަ ހާފު ޔުވެންޓަސްއިން ފެށީ ފުރަތަމަ ހާފާއި ހިލާފަށް ވަރުގަދަކޮށެވެ. އެގޮތުން ޔުވެންޓަސް އިން ވަނީ ގިނަ ހަމަލާތަކެއް ޓޮޓެންހަމްގެ ގޯލަށް ފޮނުވައިލައިފައެވެ. މެޗުގެ 56 ވަނަ މިނެޓުގައި ޔުވެންޓަސްގެ ހިގުއިންވަނީ ލަނޑުޖަހާ މެޗުގެ ނަތީޖާ އެއްވަރު ކޮށްފައެވެ. ހިގުއިން ލަނޑުޖެހިތާ ހަތަރު މިނެޓުފަހުން ރޮނާލްޑޯވަނީ ލަނޑުޖަހާ ޔުވެންޓަސް އަށް ލީޑު ނަގައިދީފައެވެ. ނަމަވެސް ޓޮޓެންހަމުގެ ލޫކަސް ވަނީ ލަނޑުޖަހާ މެޗުގެ ނަތީޖާ ހަމަހަމަކޮށްފައެވެ.

ޓޮޓެންހަމް މޮޅު ކޮށްދިން ލަނޑު އެޓީމަށް ކާމިޔާބުކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން އެރި، ހެރީ ކޭންއެވެ. މި މެޗުގައި ޔުވެންޓަސް އާއި އަލަށް ގުޅުނު ކުޅުންތެރިޔާ ޑެލައިޓް ވަނީ ކުޅެފައެވެ.