ވުޖޫދުގައި ނެތް ކުންފުންޏަކަށް ފަޅެއް ދިނުން: ކުރީގެ އޭޖީ ލަފާ ދިނީ މުއާމަލާތް ރަނގަޅު ކަމަށް
ދިނީ މާލެ ކައިރީ ފަޅެއް
މާލެ ކައިރީ ފަޅެއް: ކުންފުންޏަށް ދީފައިވަނީ ކޮން ފަޅެއް ކަމެއް ކަށަވަރެއް ނުވޭ
ރައީސް ޔާމިންގެ ސަރުކާރުގައި، ވުޖޫދުގައި ނެތް ކުންފުންޏަކަށް މާލެ ކައިރީގައި އޮންނަ ފަޅެއް ދޫކޮށްފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
ޓޫރިޒަމް މިނިސްޓްރީން މައުލޫމާތު ދީފައިވާ ގޮތުގައި އެ ކުންފުންޏަކީ "ސަނީ ހޯލްޑިންގސް" ނަމަކަށް ކިޔާ ކުންފުންޏެކެވެ. މިނިސްޓަރ އަލީ ވަހީދު ވިދާޅުވީ އެ ފަޅު ދިން އިރު މި ކުންފުނި ރަޖިސްޓްރީ ކޮށްފައި ނުވާ ކަމަށެވެ.
މިނިސްޓަރ އަލީ ވަހީދު އިތުރަށް ވިދާޅުވީ، ރަޖިސްޓްރީ ނުކޮށް އޮތް ކުންފުންޏަކަށް ފަޅު ދީފައިވީ ނަމަވެސް އޭރުގެ ބަންޑާރަ ނައިބު މުހައްމަދު އަނިލް ލަފާދެއްވާފައި ވަނީ އެ މުއާމަލާތައިގެން ކުރިޔަށް ދިޔުމަށެވެ. މިނިސްޓަރ ވިދާޅުވީ އޭރުގެ ބަންޑާރަ ނައިބުގެ ލަފަޔާ އެއްގޮތަށް ކުރިޔަށް ދިޔުމުގެ ފުރުސަތު އޮތްކަމުގައިވީ ނަމަވެސް، މިހާރު އޮންނާނީ އެމައްސަލައިގެ އިތުރު ލަފަޔަކަށް މިހާރުގެ އެޓަރނީ ޖެނެރަލްގެ އޮފީހަށް ހުށައަޅާފައި ކަަމަށް ވެސް އަލީ ވަހީދު ވިދާޅުވިއެވެ.
މިމައްސަލައަކީ އަލަށް ފާހަގަކުރެވުނު މައްސަލައެއް ކަމަށާއި އިތުރަށް ތަހުގީގުކުރަމުން އަންނަ ކަމަށް އަލީ ވަހީދު ވިދާޅުވިއެވެ. އެމުއާމަލާތަށް ފަހު އެކުންފުނި ރަޖިސްޓްރީ ކޮށްފައިވޭތޯ މިނިސްޓްރީން މައުލޫމާތެއް ދީފައެއް ނުވެއެވެ.
