ރާއްޖޭގެ ހުރިހާ ސަރަހައްދެއްގައި ކުނި ހުރި މިންވަރުގެ އޮޑިޓެއް ވަނީ ހަދާފަ: އެންވަޔަރަމަންޓް މިނިސްޓަރު
22 ޖުލައި 2019 | ހޯމަ 08:45ކުނި ނައްތާލެވޭ ގޮތްތައް ދަނީ ބަލަމުން
އެންވަޔަރަމަންޓް މިނިސްޓަރު ޑރ. ހުސެއިން ރަޝީދު ހަސަން
ރާއްޖޭގެ ހުރިހާ ސަރަހައްދެއްގައި ކުނި ހުރި މިންވަރުގެ އޮޑިޓެއް ހަދާފައިވާ ކަމަށް އެންވަޔަރަމަންޓް މިނިސްޓަރު ޑރ. ހުސެއިން ރަޝީދު ހަސަން ވިދާޅުވެއްޖެއެވެ.
ބ. ދޮންފަނާއި، ހިތާދޫގެ އިތުރުން ރ. އުނގޫފާރުގައި ކުނިމެނޭޖްކުރާ މަރުކަޒު އިމާރާތްކުރުމަށް އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި މިނިސްޓަރު ޑރ. ހުސެއިން ރަޝީދު ހަސަން ވިދާޅުވީ ރާއްޖޭގެ ކުނީގެ މައްސަލައަކީ މިވަގުތު ދިމާވެފައިވާ އެންމެ އެންމެ ބޮޑު މައްސަލަ ކަމަށެވެ. މިނިސްޓަރު ވިދާޅުވީ ރާއްޖޭގެ ވަރަށް ގިނަ ސަރަހައްދެއްގައި ގިނަ އަދަދެއްގެ ކުނި އެބަހުރި ކަމަށާއި، މިނިސްޓްރީގެ ޓީމުން ރާއްޖޭގެ ހުރިހާ ސަރަހައްދެއްގައި ކުނި ހުރި މިންވަރުގެ އޮޑިޓެއް ހަދާފައިވާ ކަމަށެވެ.
އެހެންކަމުން ރާއްޖޭގެ ހުރިހާ ރަށެއްގައި ހުރީ ކޮންކަހަލަ ކުންޏެއްކަމާއި، އެންމެ އެކަށީގެންވާ ގޮތުގައި ނައްތާލެވޭނެ ގޮތްތައް ބަލަމުން އަންނަ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ މިއޮޑިޓްގެ ތަފްސީލް ފަހުން އާންމުކުރާނެ ކަމަށެވެ.
މިނިސްޓަރު ޑރ. ހުސެއިން ރަޝީދު ހަސަން ވިދާޅުވީ ރާއްޖޭގައި ކުނި މެނޭޖްކުރުމުގެ މަސްއޫލިއްޔަތަކީ މިނިސްޓްރީގެ އިތުރުން ސިޓީ ކައުންސިލްއާ ރަށުގެ ކައުންސިލްތަކުގެ ވެސް މަސައްކަތެއް ކަމަށެވެ. އެގޮތުން މިމައްސަލަ ހައްލުކުރުމަށް އެންމެހައި ރައްޔިތުންގެ އެއްބާރުލުން ބޭނުންވާކަން މިނިސްޓަރު ފާހަގަކުރެއްވިއެވެ.
މީގެ އިތުރުން މިނިސްޓަރު ވިދާޅުވީ ރާއްޖޭގެ ތަފާތު ސަރަހައްދުތަކުގައި ވަރަށް ދުވަހަށްސުރެ ޖަމާވެފައި ހުރި ކުނީގެ މައްސަލަ ހައްލުކުރުމަށް ވެސް ރޭވުންތައް ރާވަމުން އަންނަ ކަމަށާއި، ކައިރި މުސްތަގުބަލެއްގައި މިމައްސަލައަށް ދާއިމީ ހައްލެއް ލިބޭނެކަމަށެވެ.
ބައެއް ރަށްރަށުގައި ކުނިމެނޭޖް ކުރާނެ އެއްވެސް ފެސިލިޓީއެއް ނެތް ފާހަގަކުރައްވައި މިނިސްޓަރު ވިދާޅުވީ އެރަށްރަށުގައި ކުނިމެނޭޖް ކުރާ ސެންޓަރުތައް ގާއިމްކުރުމާއި، އެތަންތަނަށް ބޭނުންވާ ސާމާނު ހޯދުމަށް ތަފާތު ޕްރޮޖެކްޓްގެ ތެރެއިން މަސައްކަތްތައް ކުރަމުން އަންނަ ކަމަށެވެ.
މިނިސްޓަރު، ޑރ. ހުސެއިން ރަޝީދު ހަސަން ބޭރުގެ ހިލޭ އެހީގެ ދަށުން ކުރިއަށް ގެންދާ މަޝްރޫއުތަކުގައި ބޭނުންވާ ހަލުހި މިނުމުގައި މަސައްކަތްތައް ނުފެށި ލަސްވެދާނެ ކަމަށެވެ.
