ޝަރީފު ދޮގުމައުލޫމާތު ދެއްވާފައިވަނީ މަޖިލީހުގެ މާލިއްޔަތު ކޮމިޓީއަށް
ބޭންކް އޮފް މޯލްޑިވްސްގެ ޑެޕިއުޓީ ސީއީއޯ މުހައްމަދު ޝަރީފް ރައްޔިތުންގެ މަޖިލީހުގެ ކޮމެޓީގައި
ބޭންކް އޮފް މޯލްޑިވްސް (ބީއެމްއެލް) ގެ ޑެޕިއުޓީ ސީއީއޯ މުހައްމަދު ޝަރީފު ރައްޔިތުންގެ މަޖިލީހުގެ މާލިއްޔަތު ކޮމިޓީއަށް އެއްބާރުލުން ދެއްވައި, ތެދު މައުލޫމާތު ހިއްސާކޮށްދެއްވާނެކަމަށް ވިދާޅުވުން ފުލުހުންގެ އިދާރާއަށް ހުށަހެޅި މައްސަލަ ނެގުމަށް ވިސްނަމުންދާކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ހޯމަ ދުވަހު އޮތް ރައްޔިތުންގެ މަޖިލީހުގެ ޖަލްސާ ފެއްޓެވުމަށްފަހު ވާހަކަފުޅުދައްކަވަމުން މަޖިލީހުގެ ރައީސް، ރައީސް ނަޝީދު ވިދާޅުވީ ޝަރީފު މަޖިލީހަށް ސިޓީއެއް ފޮނުއްވާފައިވާކަމަށާއި, އެ ސިޓީގައި މާލިއްޔަތު ކޮމިޓީގައި އަލުން ވާހަކަ ދެއްކެވުމަށް އެދިވަޑައިގެންފައިވާ ކަމަށެވެ. ޝަރީފު ރައްޔިތުންގެ މަޖިލީހަށް އެގޮތަށް ސިޓީ ފޮނުއްވާފައިވަނީ އެ މަޖިލީހުން އޭނާގެ މައްޗަށް ދޮގު މައުލޫމާތު ދިންކަމުގެ ތަހުޤީޤު ކޮށްދިނުމަށް އެދި ފުލުހުންނަށް ހުށައެޅުމުންނެވެ.
މިދިޔަ އަންގާރަ ދުވަހު އޮތް މާލިއްޔަތު ކޮމިޓީއަށް ބޭންކުގެ އިސްވެރިން ވަނީ އެމްއެމްޕީއާރުސީގެ 1.3 ބިލިއަން ރުފިޔާގެ ޚިޔާނާތާ ގުޅިގެން ޖަވާބުދާރީ ކުރުވުމަށް ހާޒިރު ކޮށްފައެވެ. އެ ކޮމިޓީއަށް ހާޒިރުކޮށް މެމްބަރަކު "ނޮޓް ނެގޯޝިއަބަލް" ޗެކްތައް ބީއެމްއެލުން އެސްއޯއެފްގެ އެކައުންޓަށް ޖަމާކޮށްފައިވޭތޯ އެއްސެވުމުން ޝަރީފު ވިދާޅުވީ ޗެކް ކްރޮސް ކުރުމުގައި އެއްފަރާތުން އަނެއްފަރާތަށް ބަދަލު ނުކުރެވޭ ޗެކެއް ގޮތުގައި ކަނޑައެޅެނީ ގާނޫނު ބުނާ ގޮތުން " ނޮޓް ނެގޯޝިއަބަލް ޖަހާފައި ކްރޮސް ކުރުމުން ކަމަށެވެ. . ނަމަވެސް އެ ކޮމިޓީ ނިމުނުފަހުން ސޯޝަލް މީޑިއާގައި ވަނީ ބީއެމްއެލްއިން އެސްއޯއެފްގެ އެކައުންޓަށް ޖަމާކޮށްފައިވާ "ނޮޓް ނެގޯޝިއަބަލް" ޗެކްތަކެއް ދައުރުވެފައެވެ.
ރައީސް ނަޝީދު ވިދާޅުވީ ޝަރީފުގެ ސިޓީގައި އޭނާ ކޮމިޓީއަށް ހާޒިރުވެވަޑައިގެންނެވިއިރު އެކަން އެނގިނުގަންނަވާކަމަށާއި، އެކަން ސަމާލުކަމަށް އައީ ސޯޝަލް މީޑިއާގައި އެ ޗެކްތައް ދައުރުވުމުން ކަމަށް ވިދާޅުވެފައިވާ ކަމަށެވެ. އަދި އިތުރު ފުރުސަތަކަށް އެދި އެ ޗެކުތަކާއި ބެހޭގޮތުން މުތާލިއާ ކުރުމަށްފަހު ސައްހަ މައުލޫމާތު ކޮމިޓީއަށް ދެއްވާނެކަމަށް ވިދާޅުވެފައިވާ ކަމަށެވެ.
ރައީސް ނަޝީދު ވިދާޅުވީ ޝަރީފު އެގޮތަށް ވިދާޅުވުމުން މާލިއްޔަތު ކޮމިޓީގައި މުގައްރިރާއި ވާހަކަ ދެއްކެވުމަށްފަހު ފުލުހުންނަށް ފޮނުވާފައިވާ މައްސަލަ އަލުން އަނބުރާ ގެންނެވުމަށް ވިސްނަވާނެކަމަށެވެ.
ރައްޔިތުންގެ މަޖިލީހުގައި ދޮގު މައުލޫމާތު ދިނުމަކީ ގާނޫނު އަސާސީ ބުނާ ގޮތުން ޖިނާއީ ކުށް އުފުލިދާނެ ކަމެކެވެ.
އެމްއެމްޕީއާރުސީގެ ހިޔާނާތާއި ގުޅިގެން ދައުލަތުގެ އެކި އިދާރާތައް ހާޒިރުކޮށް އަންނަނީ މަޖިލީހުން މައުލޫމާތު އޮޅުންފިލުއްވަމުންނެވެ. އެގޮތުން ބީއެމްއެލްއާއި، އޭސީސީ ހާޒިރުކޮށް ސުވާލުކޮށްފައިވެއެވެ.
