ޔޫއެފާ 15 އަހަރުންދަށުގެ އިންޓަރނޭޝަނަލް ފުޓުބޯޅަ މުބާރާތުގައި ރާއްޖެ ކުޅުނު ފުރަތަމަ މެޗުން ބަލިވެއްޖެ
މި މެޗުން ރާއްޖެ ބަލިވީ 2-1 ގެ ނަތީޖާ އަކުން
ނައިބުރައީސް މެޗު ޝަރަފުވެރި ކޮށްދެނީ
އައްޑޫ ސިޓީގައި މިހާރު ކުރިޔައްދާ ޔޫއެފާ 15 އަހަރުންދަށުގެ ފުޓުބޯޅަ މުބާރާތުގައި ހޮނިހިރު ދުވަހު ރާއްޖެއާއި ބޫޓާން ބައްދަލުކުރި މެޗުން ރާއްޖެ ބަލިވެއްޖެއެވެ.
މި މެޗުން ރާއްޖޭގެ 15 އަހަރުންދަށުގެ ފުޓުބޯޅަ ޓީމު ބަލިވީ 2-1 ގެ ނަތީޖާ އަކުންނެވެ.
މި މެޗު ޝަރަފުވެރި ކޮށްދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.
މެޗު ފަށައިގެން މާގިނައިރުތަކެއްނުވެ، ބޫޓާނުން ވަނީ ލަނޑުޖަހާ ލީޑު ނަގައިފައެވެ. މި ލަނޑު މެޗުގެ ހަވަނަ މިނެޓުގައި ބޫޓާންއަށް ކާމިޔާބު ކޮށްދިނީ ޖުގްމޭއެވެ. މި ލަނޑަށް ފަހު ވެސް ބޫޓާނުން ވަނީ ރާއްޖޭގެ ގޯލަށް ނުރައްކާތެރި ހަމަލާތަކެއް ފޮނުވައިލައިފައެވެ.
ބޫޓާނުން ލީޑު ފުޅާ ކުރީ މެޗުގައި އެޓީމުގެ ކެޕްޓަން ބިކާޝް ކާމިޔާބުކުރި ލަނޑުންނެވެ. މި ލަނޑަށް ފަހު ރާއްޖެއިން ވަނީ ކުޅުން ރަނގަޅު ކޮށްފައެވެ. އެގޮތުން ރާއްޖެއިން ވަނީ ފުރަތަމަ ހާފް ނިމުމުގެ ކުރިން ބޫޓާންގެ ގޯލަށް ނުރައްކާ ކޮށްފައެވެ.
މެޗުގައި ދިވެހިރާއްޖެއިން ކާމިޔާބުކުރި ހަމައެކަނި ލަނޑު މެޗުގެ 69 ވަނަ މިނެޓުގައި ކާމިޔާބު ކޮށްދިނީ ކެޕްޓަން ހަނާންއެވެ. މި ލަނޑާއިއެކު، ރާއްޖެއިން އައީ ފުލުފުލުގައި ބޫޓާން ގޯލަށް ހަމަލާތައް އުފައްދަމުންނެވެ. ނަމަވެސް ރާއްޖެއަށް ލަނޑެއް ކާމިޔާބުކުރެވޭ ގޮތެއް ނުވެއެވެ.
މި މެޗު ބަލަން އައްޑޫގެ ގިނަ އަދަދެއްގެ ރައްޔިތުން ވަނީ ދަނޑަށް ހާޒިރުވެފައެވެ.
މުބާރާތުގައި އާދީއްތަ ދުވަހު ހަވީރު ބައްދަލު ކުރާނީ ސައުދީ އާއި ލެޓްވިޔާއެވެ.
