އެފްއައިއޭއެމް އާއި އައިސީސީ ގުޅިގެން މިއުޒިކަލް ޝޯއެއް ބާއްވައިފި

ފްރެންޑްޝިޕް އެސޯސިއޭޝަން އޮފް މޯލްޑިވްސް އާއި އިންޑިއަން ކަލްޗަރު ސެންޓަރ (އައި ސީސީ) ގުޅިގެން މިއުޒިކަލް ޝޯއެއް ބާއްވައިފިއެވެ.

ރާއްޖޭގައި ހުންނަ އިންޑިއަން ކަލްޗަރަލް ސެންޓަރުގައި ބޭއްވުނު މި ޝޯއަކީ އިންޑިއާގެ ސަގާފަތާއި ދިވެހި ލަވަކިޔުންތެރިންގެ ހުނަރު ދައްކާލުމުގެ ގޮތުން ބޭއްވި ޝޯއެކެވެ. އެގޮތުން، އިންޑިއާ އާއި ރާއްޖޭގެ މަޝްހޫރު ލަވަކިޔުންތެރިންގެ އިތުރުން އައިސީސީގެ ދަރިވަރުން ވަނީ މި ޝޯގައި ހިތްގައިމު ލަވަތައް ހުށަހަޅާ ދީފައެވެ.

ފްރެންޑްޝިޕް އެސޯސިއޭޝަން އޮފް އިންޑިއާ މޯލްޑިވްސް ގެ ރައީސް އަހުމަދު އަމްޖަދު ރާއްޖެ އެމްވީ އަށް މައުލޫމާތު ދެއްވަމުން ވިދާޅުވީ މި ޝޯގެ މަގުސަދަކީ ރާއްޖޭގެ ކުރީގެ މިއުޒިޝަނުން، އިންޑިއާގައި އެމީހުންގެ ހުނަރު ދައްކާލުމުގެ އިވެންޓެއް ރޭވުން ކަމަށެވެ.

މީގެ އިތުރުން، އޭނާ ވިދާޅުވީ މި އަހަރު ތެރޭގައި ވަރަށް އަވަހަށް ކުރީގެ މިއުޒިޝަނުން ގޮވައިގެން އިންޑިއާއަށް ދަތުރެއް ރާވާފައިވާ ކަމަށެވެ.

މި ޝޯގައި އިންޑިއަން ކަލްޗަރ ސެންޓަރުގެ ޑައިރެކްޓަރ ތަންވީރް ނާސްނީގެ އިތުރުން އެމްބެސެޑަރ ސަންޖޭ ސުދިރް ބައިވެރި ވެލެއްވިއެވެ.