ކަބީރު ސިންގް: 10 ރެކޯޑެއް މުގުރާލައިފި
މި ފިލްމަށް މިހާތަނަށް ވަނީ ޖުމްލަ އާމްދނީގެ ގޮތުގައި 266.62 ކްރޯޑް ރުޕީސް ލިބިފައި
ޝާހިދު ކަޕޫރާއި ކިއާރާ އަދުވާނީ
ބޮލީވުޑް އެކްޓަރ ޝާހިދު ކަޕޫރު އެންމެ ފަހުން ކުޅުނު ފިލްމް "ކަބީރު ސިންގް" ވަނީ ފިލްމަށް މަހެއް ނުވަނީސް 10 ރެކޯޑެއް މުގުރާލައިފިއެވެ.
ޖޫން 21 ގައި ރިލީޒް ކޮށްފައިވާ މި ފިލްމަށް މިހާތަނަށް ބޮކްސް އޮފީހުގައި އާމްދަނީގެ ގޮތުގައި ވަނީ 266.62 ކްރޯޑް ރުޕީސް ލިބިފައެވެ. އެހެންކަމުން މި ފިލްމަށް ލިބުނު އާމްދަނީ ވަނީ މިއަހަރު ރިލީޒް ކުރި އެންމެ ކާމިޔާބު ދެފިލްމު ކަމަށްވާ ސަލްމާން ޚާންގެ "ބާރަތް" އަދި ވިކީ ކައުޝަލްގެ "ޔޫރީ - ދަ ސަރޖިކަލް ސްޓްރައިކް" އަށްވުރެވެސް މައްޗަށް އަރާފައެވެ.
ޓްރޭޑް އެނަލިސްޓް، ތަރަން އާދަޝް ކޮށްފައިވާ ޓްވީޓްގައި ވާގޮތުން ފިލްމް ރިލީޒް ކުރި ފުރަތަމަ ހަފްތާގައި 134.42 ކްރޯޑް ރުޕީސް ލިބިފައި ވެއެވެ. ދެވަނަ ހަފްތާގައި 78.78 ކްރޯޑް ރުޕީސް، ތިން ވަނަ ހަފްތާގައި 36.40 ކްރޯޑް އަދި ހަތަރު ވަނަ ހަފްތާގައި 16.66 ކްރޯޑް ރުޕީސް ވަނީ ލިބިފައެވެ.
ބޮކްސް އޮފީސް އިންޑިއާ ރިޕޯޓްތަކުން ދައްކާގޮތުން ވިކީގެ "އުރީ" އަށް ހަތަރު ހަފްތާ ތެރޭގައި ލިބިފައިވަނީ 245 ކްރޯޑް ރުޕީސް އެވެ. ސަލްމާންގެ "ބާރަތް" އަށް ހަތަރު ހަފްތާގެ ތެރޭގައި ލިބިފައިވަނީ 210 ކްރޯޑް ރުޕީސް އެވެ.
ސަންދީޕް ވަންގާ ރެޑީ ޑައިރެކްޓް ކޮށްފައިވާ މި ފިލްމަކީ 2017 ވަނަ އަހަރު ރިލީޒް ކުރި ކާމިޔާބު ތެލުގު ފިލްމް "އަރުޖުން ރެޑީ"ގެ ރީމޭކް އެކެވެ.
މި ފިލްމްގައި ފެނިގެންދަނީ ވަރަށް ތޫނުފިލި މެޑިކަލް ސުޓޫޑެންޓެއްގެ ދިރިއުޅުން ބަނަވެގެންދާ ގޮތެވެ. އޭނާގެ ލޯބިވެރިޔާ އެހެން މީހަކާއި ކައިވެނި ކުރުމުން އެކަމާއި ރުޅިގަދަވެ މަސްތުގެ ހާލަތުގައި ހުރެ އަމިއްލަ ނަފްސަށް ގެއްލުން ދޭ މަންޒަރު މި ފިލްމުން ފެނިގެންދެއެވެ.
މި ފިލްމްގައި ޝާހިދު އާއި އެކު ލީޑް ރޯލުން ފެނިގެން ގޮސްފައިވަނީ ކިއާރާ އަދުވާނީ އެވެ.
